Jakob 3
3
Lungamena elaka
1Vakwetu, ovengi hámu ile ovalongethi, mu tji i okutya nt̯e ovalongethi matu ka koywa unene okupon̯a ovakwetu. 2Iya nt̯e atuhe tu lundha unene. Andaa pe na nguha lundha ama popi, omuntu ngoka u li nawa unene, ma ulu okutumina olutu lwe aluhe. 3Atwa twaa ovitomu movinyo vyodhonkambe, tu dhi endetha, hatu dhi vyuukitha akuhe humatu hala. 4Talen̯i odhombapolo ndhii li wo odhonene, ndhii yundulwa kombepo onene. Omusungi u vyuukitha ombapolo huma hala notjisungitho otjinunu. 5Elaka nalyo wo okan̯ipo okanunu, atjaa li litangela ovipuka ovinene. Taa tuutuu, ontepantepa i hika okuti. 6Elaka omulilo, li li ngouye mbwaa lundhaka. Elaka movin̯ipo vyetu li silika olutu aluhe, hali twaa onkalamwenyo yomuntu momulilo mbwaa tema, mbuu dha moheli. 7Omuntu ma ulu okulonga, u longa ovipuka mbii na omwenyo avihe ngahi tji li: Ovithitu, ovidhila, oviyaladhi novipuka vyomomeva, 8atjaa elaka kape na omuntu noumo nguma ulu oku li dheula. Elaka ouvi mbuhau tjiiwa okudheulwa, mbwee yula oudhioo, mbuu eta et̯o. 9Elaka olyo tu hivilika nalyo Muhona Tate, atjaa olyo tu penya nalyo ovantu mbava utwa otjithika tjaKalunga.#Gen. 1:26 10Vakwetu, katja thele okukala nyahoka, motjinyo mumamu dhi odhondaka dhelao, hamu dhi uke odhondaka dhomathingo. 11Othimo mai ulu tuu okupupa mondjila yayo imo mu dhe omeva omawa nomeva ngaa lula? 12Vakwetu, omukuyu mau ulu okuma odhoholivi ne omuve mau ulu okuma omakuyu? Othimo yomeva ngaa lula kaai ulu okweeta omeva omawa.
Ounongo mbuu dha kombanda
13Aan̯i mokati ken̯i nguu na odhondunge nounongo? Nge tji yulike nonkalo ye ombwa novilinga vye oviwa vyounongo mbyaa tutuvala. 14Iya andaa mu na onki nolwiho momitima vyen̯i, hámu litanga, n̯e hámu kembe okukondjetha otjatjili. 15Ounongo mbuu li nyahoka kau dhi kombanda, iya owouye, wountu nowoundiapoli. 16Mpape na onki nokulihole ovene, pa kala okungwangwana novilinga avihe ovivi. 17Ounongo mbuu dha kombanda, olutenga wa kohoka, u na ouwa, u na olukeno noupanga, we yula onkenda novilinga oviwa, kau na tja omalimbililo ne ovineya. 18Omuntu nguu eta ouwa, aa kunu ombuto youwa, ma ka teya ouvyuuki.
Dhimba New Testament © Bible Society in Namibia, 2010.