Jakob 2
2
Hámu pungu ovantu
1Vakwetu, himu na eitavelo muMuhona wetu Jesus Kristus, Muhona wetumbalo, hámu kala nokapungulula. 2Mosinagoga yen̯i andaa mwe ya omuyenda ngwaa dhala onela yotjingoldo nomidhalo vyouhona, mo hamu ya wo omuthona ngwaa dhala omidhalo mbyaa tandauka, 3mu tala ngwaa dhala omidhalo vyouhona, hamu tyaa: “Kala pohi hempa popawa,” iya omuthona mu mu heela hamu tyaa: “Ove kulama hoka ne kala pohi hempa pondambo podhompadhi dhandje.” 4Amamu lipungaulula nyahoka, kaamu undapa ovipuka ovivi? 5Vakwetu ovahivilikwa, teelelen̯i! Kalunga ka holowolele nan̯i mbava talwa mouye okutya ovathona, va ile ovahona meitavelo nodhompinga dhotjilongo tjaKalunga hitja udhikilwa mboka mbave mu hole? 6Iya n̯e mwa tomba ovathona. Mbave mu tatetha nambave mu twala movipopya nan̯i havahona? 7Ovahona hawo va penya ena ndyoka ewa mumwa lukilwa? 8Mamu ningi nawa, andaa mamu hwithile po oveta yopauhamba mOmisonekwa ndjimai tyaa: “Kala au hole omukwen̯i ngahi u lihole ove omwene.”#Lev. 19:18 9Iya andaa mamu ningi okapungulula, mamu lundha, noveta mai mu pengele, n̯e ovayoni woveta. 10Iya nguma kambulitha oveta aihe, atjaa ha yono otjitumino tjimo okutya wa yono ovitumino avihe. 11Iya ngwaa popya ha tyaa: “Hó yono olukupo,” oye a popya wo okutyaa: “Hó dhipaa.” Iya ove nandaku tiwa ku yonene olukupo, atjaa ove ho dhipaa, wa ile omuyoni woveta.#Eks. 20:13-14; Deut. 5:17-18 12Popyen̯i ne mu undape ngovantu mbamava ka koywa koveta ndjimai ve kutulula. 13Mbahave na onkenda novakwawo kaava ka t̯ilwa onkenda, iya mbave na onkenda mava ka ton̯a ekoyo.
Eitavelo ndihali undapa lya t̯a
14Vakwetu, tji na ouwa watji, amo tya u na eitavelo, ove himo undapa ahamatji yulike okutya u na eitavelo? Eitavelo ndii li nyahoka mali ku hupitha? 15Andaa omukwen̯i u li nyahinya ne ke na tja ovikulya, 16atjaa umo owomun̯e he mu heele ha tyaa: “Enda po nawa, dhala omidhalo omiwa, lya ovikulya oviwa,” matji popile tji, andaa n̯e kaamu mu pa soka hima hepa. 17Iya eitavelo ndii li nyahoka kali na tja ovilinga, lya t̯a. 18Pamo pe na nguma tyaa: “Matji tjiiwa okukala neitavelo ndihali na tja ovilinga.” Ame me mu yaka ame tyaa: “Ndjulikila ndje eitavelo ndihali na tja ovilinga, ame me mu yulikile eitavelo lyandje movilinga vyandje.” 19Ove wa itavela okutya Kalunga yuumo, iinga wa ninga nawa, iya nodhondemoni dhe tji itavela, dhi teketa. 20Muvahima vanavi! Mamu hala okuyulikilwa okutya eitavelo ndihali na tja ovilinga lya t̯a? 21Tateombwale Abraham wa ningwa omuvyuuki kovilinga hiaa yamba omuna Isak kotjiyambelo.#Gen. 22:1-14 22U lwete atjaa eitavelo hilya undapa pamo novilinga vye, neitavelo hilya hwithilwa po kovilinga? 23Omusonekwa wa hwithilwa po mbumau tyaa: “Abraham wa itavela muKalunga, Kalunga we mu tala okutya omuvyuuki.” Iya okutya wa li aa tiwa epanga lyaKalunga.#Gen. 15:6; 2 Hip. 20:7; Jes. 41:8 24Mu lwete okutya omuntu ma ulu okuningwa omuvyuuki kovilinga, hakeitavelo vala aliika. 25Hátjo ngahi tja ningwa wo kekunga ndinya Rahab, ngwaa ningilwe omuvyuuki kotjipala tjaKalunga, mena lyovilinga vye? Rahab wa yandja omala kodhontumwa dhOvaisraeli, he ve yulikile ondjila imo.#Jos. 2:1-21 26Iya olutu ahalu na tja omwenyo, lwa t̯a, iya neitavelo wo ahali na tja ovilinga, lya t̯a.
Dhimba New Testament © Bible Society in Namibia, 2010.