1 Ovatessalonika 4
4
Onkalamwenyo ndjimai hulukitha Kalunga
1Iya vakwetu, twe mu heela himu tha okukala, opo mu hulukithe Kalunga. Hehi otjo mu ninga ae. Iya matu mu kumbu, hatu mu vandhipaleke, mena lyaMuhona Jesus mu ninge ngahi mu ninganinga ae. 2Omapukululo ngatwe mu heela mena lyaMuhona Jesus mu e i. 3Ehalo lyaKalunga hoolyondi, mu kale ovadhilikwa, mu yepe ovihulo. 4Omulumentu auhe mokati ken̯i nga kale ae tji i hiaa thele okukala nomukadhintu we, monkalo ndjaa vyuuka noyokutumbaleka. 5Hámu kala notjipando otjivi, hámu ngala ovapaani mbahave i Kalunga. 6Motjipuka hehi hápa kala nguma kengelele ne nguma ningi navi omukwawo. Hehi otjo twe mu heela hatu mu ilikin̯a tjo ae unene okutya Muhona oye e li omuyumaneki wovantu avehe hemba. 7Iya Kalunga ke tu ithanene tu kale movihulo, iya we tu ithana tu kale mouvyuuki. 8Nguma tombo ovipuka hembi, ka tombele omuntu, wa tombo Kalunga ngwaa yandja Ombepo ye Ondhilikwa kunt̯e.
9Iya napano kaamu hepa okusonekelwa ouhunga nokukala amu hole ovakwen̯i, mena lyokutya Kalunga omwene we mu longa mu kale amu lihole. 10Ohole yen̯i mwe i yulikila ae ovakwen̯i avehe mbava kala moMakedonia. Iya matu mu vandhipaleke mu kale amu lihole okupon̯a mpoka. 11Kalen̯i nontanto okutya mu kale amwa tutuvala, mu undape ovipuka vyen̯i ovene, mu undape nomawoko en̯i ngahi twe mu heela, 12opo mu kale nonkalo ombwa movipathi vyovantu mbahave thi ovaitaveli, ahamamu hepa.
Eimuko lyovat̯e nokutjuna kwaMuhona
13Iya vakwetu, nt̯e kaatu hala mu kale ahamu tji i ouhunga nambava ka thuva okutya ve li vi, hámu ve etethele mo onkenda ngambahave na eliun̯iko. 14Nt̯e twa itavela okutya Jesus wa t̯ile, ha imunwa kout̯e. Iya soka otjo twa itavela wo okutya Jesus hime ya, ovantu mboka mbava itavela muye, Kalunga me ke ve eta pamo naye.
15Nt̯e matu mu heele ondaka hendji ndjaa dhi kuMuhona okutya nt̯e mbamatu ka vadhwa atu na omwenyo metango lyaMuhona hime ya, kaatu ka tenga po kumboka mbava t̯a.#1 Kor. 15:51-52 16Iya Muhona omwene ma ka heluka meulu nondaka ndjimai tumine, ondaka yomweengeli omunene nondaka yonkwino yaKalunga. Ovat̯e mbava t̯ila muKristus, owo mava imuka kout̯e olutenga. 17Okudha mpoka atjaa mbatu na omwenyo, mbatwe thiwa po, matu ka kaulwa pamo nawo, hatu twalwa momakaka, tu ka wanene naMuhona meulu, hatu ka kala naMuhona katee apehe. 18Iya livandhipaleken̯i nodhondaka hendhi.
Dhimba New Testament © Bible Society in Namibia, 2010.