1 Ovatessalonika 5
5
Pathumuken̯i, Muhona me ya ontukuluka
1Iya vakwetu, omatango nodhowola kaamu hepa oku dhi sonekelwa, 2mena lyokutya n̯e ovene mu tji i nawanawa okutya, etango lyaMuhona mali ya ngotjimpulu hitji ya out̯iku.#Mat. 24:43; Luk. 12:39; 2 Pet. 3:10 3Tainkolo mava tya pe na ouwa neameno, mape ya dhiva ehan̯auno, ngedhimo amali kweya, kave na humava ka inkolela. 4Iya vakwetu, kamu li met̯iku, etango ndyoka opo háli mu vadha ngotjimpulu. 5N̯e amuhe muvantu wotjiten̯i, muvantu vetango. Nt̯e katuvantu wout̯iku ne vet̯iku. 6Iya hátu lala ngavamo, ngatu pathumuken̯i, tu liyunge. 7Mbava lala, va lala out̯iku, mbava pyaluka, va pyaluka out̯iku. 8Nt̯e tuvantu vetango, ngatu liyunge, tu dhale omudhalo wokontulo weitavelo nowohole nosapeu yotjivela yeliun̯iko lyehupitho.#Jes. 59:17; Efes. 6:13-17 9Kalunga ke tu twiile po tu yumanekwe, iya tu hupithwe, mena lyaMuhona wetu Jesus Kristus, 10ngwee tu t̯ila, opo tu kale pamo naye atu na omwenyo ne atwa t̯i. 11Iya livandhipaleken̯i, n̯e mu litunge okupon̯a mpoka.
Omailikin̯o nomameneko
12Vakwetu, matu mu kumbu mu yandje nompandu kumbava undapa mokati ken̯i, mbave mu hongolela muMuhona, mbave mu pukulula, 13mu ve tumbaleke unene, mu kale amu ve hole tjatjili, mena lyotjilinga tjawo. Kalen̯i nouwa.
14Vakwetu, matu mu pukulula, mbave na ondende, ve pukululen̯i, mbava lya owoma, ve vandhipaleken̯i, popilen̯i ovingone, avehe ve talen̯i nonkenda. 15Taa tuutuu, hápa kala omuntu noumo nguma tjun̯ine omukwawo ouvi. Kalen̯i amamu undapele ovakwen̯i ouwa, mu u ningile ovantu avehe.
16Kalen̯i amwe hulukwa apehe! 17Kumben̯i, hámu petuka. 18Yandjen̯i ompandu movipuka avihe. Hehi otjo tji li ehalo lyaKalunga kun̯e muKristus Jesus.
19Ombepo Ondhilikwa hámu i tjaele. 20Odhondaka dhouprofeti hámu dhi tombo. 21Thongononen̯i nawa ovipuka avihe. Soka hitji li otjiwa tji kambulithen̯i. 22Yepen̯i ovipuka avihe ovivi.
23Kalunga wouwa nga dhilike okukala kwen̯i akuhe, ye nge mu amene, opo ombepo yen̯i nomwenyo nolutu vi kale ahavi na ombedhi, katee Muhona wetu Jesus Kristus ma tjuna. 24Ngwee mu ithana, omuliun̯ikwa, ye me ke tji ninga.
25Vakwetu, tu kumbilen̯i wo.
26Menekelen̯i po ovakwetu avehe nehupito edhilikwa.
27Me mu anetha muMuhona, omukanda hembu u tangelen̯i ovakwetu ovadhilikwa avehe.
28Et̯ilonkenda lyaMuhona wetu Jesus Kristus ngali kale nan̯e amuhe! Amen.
Dhimba New Testament © Bible Society in Namibia, 2010.