1 Ovatessalonika 3
3
Timoteus wa tjuna nelaka ewa
1Iya atjaa hitwa li ahamatu tji ulu okulikambulithila, twa li atu lwete okutya tji li nawa, tu thiwe moAtena.#Ovil. 17:15 2Twa tuma omukwetu, Timoteus, nguu undapa otjilinga tjaKalunga nguu teetha ondaka ombwa yaKristus, opo e mu pameke, e mu vandhipaleke meitavelo. 3Hápa kala noumo nguma teketethwa komaudheu henga. N̯e ovene mu tji i okutya omaudheu henga a tuwa po ae lukulu. 4Iya nahi twa li nan̯e, twe mu heela tjo ae lukulu okutya matu ka tatethwa, iya ngahi mu tji i, napano otjo matji ningwa. 5Ame hí tji ulile okulikambulithila, opo mba dha okutuma Timoteus e ye a tale eitavelo lyen̯i, pamo omutyolethi we mu tyoletha, ovilinga vyetu vya yonaka.
6Iya napano Timoteus hiaa dha hoka, hiee ya kunt̯e, we tu heela ondaka ombwa yeitavelo noyohole yen̯i. We tu hipululila okutya mu tu thipaluka, n̯e mwe tu dhimbaluka unene, ngant̯e wo hitwe mu dhimbaluka.#Ovil. 18:5 7Vakwetu, iya nt̯e twa vandhipalekwa momatatetho nomomaudheu etu aehe mena lyeitavelo lyen̯i. 8Iya napano tu na omwenyo, mena lyokutya mwa kola muMuhona. 9Ompandu yetu i lithike pi ndjimatu yandja kuKalunga mena lyehuluko nditu na lyo mena lyen̯i kotjipala tjaKalunga? 10Tu kumba kuKalunga apehe omutenya nout̯iku, tu mone ovipala vyen̯i, nt̯e tu mu pe soka himamu hepa meitavelo lyen̯i.
11Napano Kalunga omwene, Tate naMuhona wetu Jesus, nga vyuukithe ondjila yetu, tu ye kun̯e. 12Muhona nge mu kulithe, ye nge mu kute kumo mu kale amu lihole, n̯e mu kale amu hole ovantu avehe, ngant̯e wo hitu mu hole. 13Muhona nga koleke omitima vyen̯i, opo hámu kala nombedhi, iya mu kale ovadhilikwa kotjipala tjaKalunga Tate, Muhona wetu Jesus hime ya pamo novadhilikwa ve avehe.
Dhimba New Testament © Bible Society in Namibia, 2010.