1 Ovatessalonika 2
2
Otjilinga tjaPaulus moTessalonika
1Vakwetu, n̯e ovene mu tji i okutya hitwe ya okuvalula, katu liulithilwe. 2Ngahi mu tji i ae okutya twa tatethelwe moFilippi, hatu monethwa ovihuna. Iya twa li nouvandhi muKalunga ketu oku mu teethela ondaka ombwa nandaku tiwa pa li ekondjo enene.#Ovil. 16:19-24; 17:1-9 3Iya epukululo lyetu haku mu pukitha, haku mu tyoletha, haku mu enda movineya. 4Iya ngahi twa tambulwa kuKalunga, hatu liun̯ikilwa okuteetha ondaka ombwa, kaatu popi himatji hulukitha ovantu, iya oKalunga nguu thongonona omitima vyetu. 5Ngahi mu tji i, nt̯e katu dhile nodhondaka dhokuhekela ne okulitaendhela emona movineya, Kalunga oye e li ombangi yetu. 6Nt̯e kaatu taendha etumbalo lyovantu, hatumbalo lyen̯i ne lyovantu vamo. 7Nt̯e ngahi tu li ovayapostoli vaKristus twa thele okutumbalekwa kun̯e, atjaa katu halele okutumbalekwa, twa li vala nawa mokati ken̯i ngomwali hiaa tekula odhondele dhe. 8Tu na oupanga nehalo enene nan̯e, hitwa li amatu hala, haku mu pa vala ondaka ombwa yaKalunga, iya nokuyandja wo omienyo vyetu, mena lyokutya mwa ila ovahivilikwa vetu. 9Iya vakwetu, mamu thipaluka ovilinga vyetu hitwe mu teethela ondaka ombwa yaKalunga, hitwa undapa nodhonkono out̯iku nomutenya, katu yandjele omutenge komuntu noumo mun̯e.
10N̯e naKalunga mudhombangi dhetu, hitwa kala mokati ken̯i n̯e ovaitaveli, twa kala ovantu ovawa, ovavyuuki, mbahatu na mbedhi. 11Amuhe ngahi mu tji i, nt̯e twa li ngomulumentu ae li nodhondele dhe omwene. 12Twe mu pukulula, hatu mu vandhipaleke, hatu mu heele mu ende ngahi matji thevelwa Kalunga ngwee mu ithanena motjilongo tje nometumbalo lye.
13Iya nt̯e apehe tu pandula Kalunga, mena lyokutya mwa itavela ondaka yaKalunga ndjitwe mu teethela. Iya kamu i itavelele ngandjaa dha kovantu, iya mwe i itavela ngondaka yaKalunga nguu undapa mun̯e ngumwa itavela. 14Iya vakwetu, mwa ila ovalanduli womaongalo aKalunga, ngaa kala moJudea, ngae li muKristus Jesus, mena lyokutya nan̯e wo mwa tatethelwe kowoyen̯i ngawo hiva tatethelwe wo kOvajuda,#Ovil. 17:5 15wo owo va dhipaa Muhona Jesus, hava dhipaa uke ovaprofeti, wo have tu tatetha. Wo kave hulukithile Kalunga, va kondjetha ovantu avehe.#Ovil. 9:23,29; 13:45,50; 14:2,5,19; 17:5,13; 18:12 16Ve tu tjaela hitu teethela ovapaani okutya va hupithwe. Iya nyahoka mave yulitha apehe oulundhi wawo. Iya okudha mpoka oluyuma lwaKalunga halu ya kombanda yawo.
Paulus wa dhimbaluka Ovatessalonika
17Iya vakwetu, nt̯e twa yapulwa okalule, twa yapulwa omalutu, hamienyo. Twa li amatu hala unene okumona ovipala vyen̯i. 18Iya twa li amatu hala okuya kun̯e unene tuu ame Paulus. Mbe tji ninga ovikando ovingi, atjaa Satana wa ntjaela. 19Eliun̯iko lyetu ne ehuluko ne ohala yokulitanga kwetu oyatji kotjipala tjaMuhona wetu Jesus hime ya, andaa han̯e? 20Iya n̯e, on̯e mu li etumbalo nehuluko lyetu.
Dhimba New Testament © Bible Society in Namibia, 2010.