مَرقُس 3
3
شفا پییائی که دَسی حُشک بی
1عیسی یِگِلِ تِرِك چیَ کنیسه. اُورَ پییائی بی که یِ دَسی حُشک بی. 2آنَ عیسااَ وَرِنظر داشتِن تا اَگَر نُمِ روژ شَمَه مقدّس اَ پییااَ شفا بِ، چیئِی اَرا محکوم کِردِنی، پیا کَن. 3عیسی فِتیَه پییائی که دَسی حُشک بی: «بوسَ اِیرَ.» 4اِیندا اَژِنِن پِرسیتی: «آیا نُمِ روژِ شَمَه خواِئی کِردِن دُرُسَ یا بدی کِردِن؟ گُونِ کسی نجات داتِن دُرُسَ یا کُشتِنی؟» امّا آنَ چیئِی نِتِن. 5عیسی، وَعصبونی نگاه کِردیَ آنَلی که دِری بینی و ناراحت اَژ سنگدلیِن، وَاَ پییا فِتی: «دَسِتَ دیریژ کَ.» اَوَ دَسِ گُوژیَ دیریژ کِردی و دَسی مِثادِ اوّلی آزا بی. 6اِیندا شیخَلِ فرقَه فریسی چِنَ دَشت و هرَلَزَ وَگَردِ طرفتارَلِ هیرودیس پاتشاه دربارَه عیسی مشورَت کِردِن که چُطِر اَوَ بُکُشِن.
آیمَلِ فِرِاِئی مَچانَ دُمِ عیسی
7عیسی وَگَردِ شاگردَلِ گُوژی چیَ میلِ دریاچَه. آیمَلِ فِرِاِئی اَژ مردم جلیل کَتِنَ ری، چِنَ دُمی. 8هَمیژ آیمَلِ فِرِاِئی اَژ مردمِ یهودیَه و اورشلیم و اَدومیه و اَلا رواِ اردن و دِرِوَرِ شهرَلِ صور و صیدون، وخدی خَوَرِ گِشتِ کارَلِ عیسااَ شِنَفتِن، یاهاتِنَ لای. 9اَراخاطرِ جمیَت فِرِاِئی که بی، عیسی وَشاگردَلی فِتی قایقی اَرِنی آمادَه کَن، تا مردم لِیاِئی نَکَن. 10چیکِ آیمَلِ فِرِاِئی شفا داتیتی، کسَلی که دردمن بین، مَرِشانَ سری تا دَس بِنِنَر قِئِی. 11هر وخد روحَلِ گَن اَوَ مِإینان، جِلِاِئی مَکَتِنَ خاک و دادَ مَکیشان: «تو کُرِ خدائین!» 12امّا عیسی سِفدِسخت قَدَخَ بینِنَ مَکِردی که نوشِنَ کسَلِ تِرِك که اَوَ کیَه.
دُوازَه رسول
13عیسی چیَ وِرازِ کواُی۟ و اَ کسَلی که وَرِ نظر داشتی، هَنا کِردیَ لا گُوژی و آنَ یاهاتِنَ لای. 14اَوَ دُوازَه نفرَ جیا کِردی و آنَلَ رسول نُوم ناتی، تا وَگَردِ اَوَ بِن و آنَلَ اَرا موعظَه کِردِن رِ کِ، 15و اِئی قدرت و اختیار داشتون که دیوَلَ بِکَنَ دَشت. 16اَ دُوازَه نفری که جیا کِردی، یانَ بین: شَمعون (که عیسی اَوَ، پطرس نُوم ناتی)؛ 17یعقوب کُرِ زِبِدی و بِرااِئی یوحنا (که آنَلَ «بوآنِرجِس»، یعنی «کُرَلِ تَشَوَرَق» نُوم ناتی)؛ 18آندریاس، فیلیپُس، بَرتولْما، مَتّی، توما، یعقوب کُرِ حَلْفای، تَدّای، شَمعونِ غیور، 19و یهودا اَسخَریوطی که عیسااَ تسلیم دشمن کِردی.
20روژی تِرِك عیسی چیَ مال و دُوارَه بِری جمع بین، جوری که اَوَ و شاگردَلی حتی وخد ناشتِن غذا بیرِن. 21وخدی کس و کارَلِ عیسی یَ شِنَفتِن، چِن تا اَوَ اَگَردِ گُوژِن بیَرِن، چیکِ مِتِن: «داسَر کَلِاِئی.»
کِفِر کِردِن وَروحالقدس
22معلمَلِ توراتیژ که اَژ شهرِ اورشلیم یاهاتیبین، مِتِن: «دیو دیری و دیوَلَ وَکمک بعِلزبول که رئیس دیوَلَسَ، مَکِاَ دَشت.» 23پس عیسی آنَلَ هَنا کِردی و مَتَلی اَرِنِن آاُوردی و فِتی: «چُطِرَ مُاو شِطُون، شِطُونَ بِکِاَ دَشت؟ 24اَگَر مملکتی وَضدِ گُوژ کُتکُت بو، نِمِتِنی سرِپا بِمینی. 25هَمیژ اَگَر مالی وَضدِ گُوژ کُتکُت بو، اَ مالَ سرِپا نِمَمینی. 26شِطُونیژ اَگَر وَضدِ گُوژ وِرزیِر و کُتکُت بو، نِمِتِنی طاقت باری، بلکم رَسیَسَ آخِرِ کاری. 27هَمیژ هیشکس نِمِتِنی بِچواَ نُمِ مالِ پییااِ زورداری و مالِمِنالیَ غارت کِ، مَر یَ که اوّل اَ پییااَ بِإنی. ایسا مِتِنی مال اَوَ غارت کِ.
28حقیقتاً، وَهُمَ موشِم که گِشتِ گناهَلِ آدمیزاد و هر کِفِری کِ، بَشقیدَه مُاو؛ 29امّا هر کس وَروحالقدس کِفِر کِ، هرگِس بَشقیدَه نِمُاو، بلکم وَیِ گناهِ ابدی، مجرمَ.» 30اِئی قِصَ عیسی اَژی خاطر بی که مِتِن: «روحِ گَن دیری.»
دا و بِرالِ عیسی
31اِیندا دا و بِرال عیسی یاهاتِن. آنَ دَمِ در هوسان و کسی رِ کِردِن تا اَوَ هَنا کِ. 32جمیَتی که دِرِ عیسی نیشتیبین، فِتِنَ بینی: «دا و بِرالِت دَمِ در هوسانَ و مینِتَ مَن.» 33عیسی جواُو داتی: «دا و بِرالِ مِ کیِن؟» 34اِیندا کَم آاُوتیَ آنَلی که دِری نیشتیبین و فِتی: « دا و بِرالِ مِ یانَنَ! 35چیکِ هر کس خواسِ خدااَ باریَ جا، بِرا و خُویَ و دا مِنَ.»
Currently Selected:
مَرقُس 3: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
