مَرقُس 2
2
شفا پییااِ فلج
1ایسا که چَن روژی چی، وخدی عیسی یِگِلِ تِرِك گِلَهاردیَ نُمِ شهرِ کَفَرناحوم، مردم باخَوَر بین که عیسی یاهاتِسَرَ مال. 2آیمَلِ فِرِاِئی اُورَ جمع بینَ دِرِ یَک، جوری که حتی جِلِ دَریژ جا نِإی، عیسی کلومِ خدااَ اَرِنِن موعظَه مَکِردی. 3نُمِ اِئی وخدَ، بِری یاهاتِن و پییااِ فلجی که چُوار نفر اَوَ گِرتینَ دَس، آاُوردِنَ جِلِ. 4وخدی که اَراخاطرِ جمیَت نِتِنِستِن اَوَ بارِنَ لا عیسی، طاقِ وِرازِ سر عیسی داشتِنِر. ایسا که طاقِ مالَ وا کِردِن، جابُونی که فلجَ نُمی هَتیبی، رِ کِردِنَ هار. 5وخدی عیسی ایمُونِ آنَلَ دیتی، فِتیَه فلجَ: «رولَ، گناهَلِت بَشقیدَه بی.» 6بِری اَژ معلمَلِ تورات که اُورَ نیشتیبین، نُمِ دلِن مِتِن: 7«اَراچَ اِئی پییا هُنَ قِصِاِئی ماریَ زُاُن؟ یَ کِفِرَ! کی بِخِرِ خدا مِتِنی گناهَلَ بِبَشقی؟» 8عیسی هرَلَزَ نُمِ روحِ گُوژی فهمی که وَگَردِ گُوژِن چِ فکریَ مَن و فِتیَه بینِن: «اَراچَ نُمِ دلِتُون هُنَ فکِرَ مِإینُون؟ 9وَاِئی فلجَ فِتِنِ کُمُنی آسُونتِرَ، یَ که ”گناهَلِت بَشقیدَه بی“ یا ”وِرزِر و جابُونِتَ بِگِر و بِچو“؟ 10امّا تا بِزانینُون که کُرِ انسُون ری زمین اِئی قدرت و اختیارَ دیری تا گناهَلَ بِبَشقی» - عیسی فِتیَه فلجَ: 11«وَبینِتَ موشِم، وِرزِر، جابُونِتَ جمع کَ و بِچَرَ مال!» 12اَ پییا فلجَ وِرزااِر و هرَلَزَ جابُون گُوژی بِردیِر و جِلِ کَمَلِ کلکس اَژ اُورَ چیَ دَشت. گِشتِن بِلِإیژِنِن یاهات و هر هُنَ که خدااَ جِلالَ ماتِن، فِتِن: «هرگِس هُنَ چیئِی نِإیمُونَ.»
دعوت اَژ لاوی
13عیسی یِگِلِ تِرِك چیَ پیلی دریاچَه. مردم گِشتِن یاهاتِنَ لای و اَوَ وَبینِن تعلیمَ ماتی. 14مِقِاِئیکه ریَ مَچا، لاوی کُرِ حَلْفایَ دیتی که نُمِ دَکِاِئی که خراجَ مَگِرتی، نیشتیبی. عیسی فِتیَه بینی: «بواَ دُمِ مِ !» اَوَ وِرزااِر و چیتَ دُمی.
15وخدی عیسی نُمِ مالِ لاوی سر سِفرَه نیشتیبی، آیمَلِ فِرِاِئی اَژ خراجگیرَل و گناهکارَل اَگَردِ اَوَ و شاگردَلی هُمسِفرَه بین، چیکِ بِری اَژِنِن مریدی بینی. 16وخدی معلمَلِ تورات که اَژ شیخَلِ فرقَه فریسی بین، عیسااَ دین که وَگَردِ گناهکارَل و خراجگیرَل هُمسِفریَ، فِتِنَ شاگردَلِ عیسی: «اَراچَ عیسی اَگَردِ خراجگیرَل و گناهکارَل غذا میری؟» 17عیسی وخدی یَ شِنَفتی، فِتیَه بینِن: «مریضَلِن که طبیبِنَ مِ، نَه آیمَلِ سالم. مِ اَرا دَنگِ کِردِنِ آیمَلِ صالح ناهاتِمَ بلکم یاهاتِمَ تا گناهکارَلَ دعوت کَم.»
سؤال دربارَه روژی گِرتِن
18اِسگَ شاگردَلِ یحیی و فریسیَل نُمِ روژی بین، بِری یاهاتِنَ لا عیسی و فِتِن: «اَراچَ شاگردَلِ یحیی و شاگردَلِ فریسیَل روژیَ مَگِرِن، امّا شاگردَلِت روژی نِمَگِرِن؟» 19عیسی جواُو داتی: «یعنی مُاو میمُونَلِ عروسی تا وخدی که شاداماد هُاواَ گَردِن، روژی بِگِرِن؟ تا وخدی که شاداماد هُاواَ گَردِن نِمِتِنِن روژی بِگِرِن. 20زمُونی مای که شادامادَ اَژِنِن مَگِرِن. پس نُمِ اَ روژَلَ روژیَ مَگِرِن.
21هیشکس پارچَه نُواِئی که هَنو آاُو نَچیَ، قِ جِنِکِ کُوإینَ گِت نِمِ. اَگَر هُنَ کِ، وَصلَه اَژِنی جیااَ مُاو، نُو اَژ کُوإینَ جیااَ مُاو و بدتِرَ مِری. 22و هَمیژ هیشکس شِراُو نُواَ نُمِ مَشگَلِ کُوإینَ نِمَرِشِنی. اَگَر هُنَ کِ، اَ شِراُواَ مَشگَلَ مَتوقِنی، و هر هُنَ، هَم شِراُو و هَمیژ مَشگَلَ هر دِك حیفِ میلَ مِن. بلکم شِراُواِ نُو با نُمِ مَشگَلِ نُو بِرِشی.»
صُاُاِ روژِ شَمَه مقدّس
23نُمِ یَکی اَژ روژَل شَمَه مقدّس، عیسی اَنُمِ زمینَلِ گَنِم ردَ میا و شاگردَلی هر هُنَ که داشتِن مَچان، شروع کِردِنَ چینینِ گُلَلِ گَنِم. 24فریسیَل فِتِنَ عیسی: «اَراچَ شاگردَلِت کاری مَن که نُمِ روژِ شَمَه جایز نیئَه؟» 25جواُو داتی: «مَر تا اِسگَ نُمِ نیوِیشتَلِ مقدّس نَخوانتینُونَ که داوود پاتشاه چَ کِردی، وخدی که گُوژی و هُمراهَلی میحتاج و وِرسِنی بین؟ 26که چُطِر اَوَ نُمِ زمُونِ اَبیّاتار، کاهنِ اعظم، چیَ نُمِ مالِ خدا و نُونی که وَخدا پیشکَشی بی، هاردی وَهُمراهَلیژی داتی، هر چَن فَقَد کاهنَلَ اجازَه داشتِن اَ نُونَ بیرِن.» 27اِیندا فِتیَه آنَ: «شَمَه مقدّس اَرا انسُون نانَ نَه انسُونَ اَرا شَمَه. 28پس، کُرِ انسُون حتی صُاُاِ روژِ شَمِهإیژ هَس.»
Currently Selected:
مَرقُس 2: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
