مَتّی 5
5
موعظَه سر کواُی۟
1وخدی عیسی اَ مردمَ دیتی، چیَ وِرازِ کواُاِئی و نیشتی. اِیندا شاگردَلی یاهاتِنَ لای 2و اَوَ شروع کِردیَ تعلیم داتِنِن و فِتی:
3«خَشالَ آنَلی که مَزانِن
نُمِ روح، فقیرِن،
چیکِ پاتشاهی آسِمُون
هِنِ آنَسَ.
4خَشالَ عزادارَل،
چیکِ آنَ دلگُائیَ مَگِرِن.
5خَشالَ آنَلی که حلیمِن،
چیکِ آنَ زمینَ میراتَ
میَرِن.
6خَشالَ آنَلی که اَرا صالحبیِن،
وِرسِنی و تینیِن،
چیکِ آنَ سیرَ مِن.
7خَشالَ آنَلی که رحمَ مَکَن،
چیکِ وَبینِن رحمَ مُاو.
8خَشالَ آیمَلی که دلِن پاکَ،
چیکِ آنَ خدااَ مِإینِن.
9خَشالَ آنَلی که صُلَ مَکَن،
چیکِ آنَلَ اُویلَلِ خدا
هَنااَ مِن.
10خَشالَ آنَلی که اَرا صالحبیِن،
آزارَ مِإینِن،
چیکِ پاتشاهی آسِمُون هِنِ آنَسَ.
11خَشالَ بینِتُون، وخدی که مردم اَراخاطرِ مِ، دُشبین بیَنَ بینِتُون و آزارِتُون بیَن و وَدُرُو هر قِصَ گَنی وَضدِ هُمَ بوشِن. 12خوشال بِن وَشادی کَن چیکِ اَجرِتُون نُمِ آسِمُون فِرَ کَلِنگَ. چیکِ هریجورَ پیغمبرَلی که وَرِ هُمَ بین، آزار داتِن.
نور و خُوآ
13هُمَ خُوآاِ دینیاإینُون. امّا اَگَر خُوآ طُمی اَژ دَس بِ، چُطِر مِتِنی دُوارَه شوری کِإینُونی؟ دَ وَکاری نِمای بِخِرِ یَ که بِرِشِنیَ دَشت و ژیر پای مردم اَژ بین بِچو.
14هُمَ نورِ دینیاإینُون. شهریَ که وِرازِ کواُاِئی آاُوتِنَ، نِمُاو قایمی کِنی. 15هیشکس گِرسوزی رُوشِن نِمَکِ تا اَوَ ژیرِ سرپوشی بِنِ، بلکم اَوَ سر چراغدُونی مَنِ تا نوری بِکِ ری گِشتِ آنَلی که نُمِ مالِن. 16پس بیلِن نورِ هُمَ بِکِ ریِ مردم تا کارَلِ خواِتُونَ بینِن و جِلال بیَنَ بُاواَ هُمَ که نُمِ آسِمُونَ.
مسیحی که با بای اَرِ کامل کِردِنِ شریعت یاهات
17فکِر نَکَن که یاهاتِمَ تا تورات و نیوِیشتَلِ پیغمبرَلَ باطل کَم؛ ناهاتِمَ تا آنَلَ باطل کَم، بلکم یاهاتِمَ تا آنَلَ تمُوم و کمال وَانجوم بِرَسُونِم. 18چیکِ حقیقتاً وَهُمَ موشِم، تا آسِمُون و زمین اَژ بین نَچو، نقطه یا همزهای اَژ تورات هرگِس اَژ بین نِمَچو، تا گِشتِن وَانجوم بِرَسی. 19پس هر که یَکی اَژ هُوردِلَتِرینِ اِئی حُکمَلَ کمهَمیَت بِزانی وَآیمَلِ تِرِكَ هُنَ تعلیم بِ، نُمِ پاتشاهیِ آسِمُون، هُوردِلَتِرین وَحِسُاواَ مای. امّا هر که اِئی حُکمَلَ وَانجوم بِرَسُونی و آنَلَ وَآیمَلِ تِرِك تعلیم بِ، اَوَ نُمِ پاتشاهیِ آسِمُون، کَلِنگ هَنااَ مُاو. 20چیکِ وَهُمَ موشِم، تا صالحبیِنِ هُمَ بیتِرَژ صالحبیِنِ معلمَلِ تورات و شیخَلِ فرقَه فریسی نُاو، هرگِس وَپاتشاهی آسِمُون ری پیا نِمِإینُون.
خشم
21شِنَفتینُونَ که وَآیمَلِ قدیمی فِتِنَ، "آیم نَکُشِن، و هر که آیم بُکُشی، سزاوار محاکمهاَ." 22امّا مِ وَبینِتُونَ موشِم، هر که وَبِرا گُوژی عصبونی بو، سزاوار محاکمَه؛ و هر که وَبِرا گُوژ ”دُشبین“ بِ، سزاوار یَسَ که جِلِ ریِ شورا یهود محاکمَه بو؛ و هر که وَبِرا گُوژی ”اَخمَخ“ بوشی، سزاوارِ آگِر جَندِمَ. 23پس اَگَر مِقِ تقدیم کِردِن پیشکَشیت ریِ قربُونگاه، یاهاتَ وِیرِت که بِرات اَژ تو چیئِی وَدل دیری، 24پیشکَشیتَ ری قربُونگاه بیلَجا و اوّل بِچو وَگَردِ بِرات آشتی کَ اِیندا بو و پیشکَشیتَ تقدیم کَ. 25وَگَردِ شاکیِ گُوژِت که تونَ میَریَ دادگاه، تا وخدی هَمِنی وَگَردی هاینَ نُمِ ری، صُل بِکَ، ناخُاو وَدَسِ قاضی بِسپاریِت و قاضیَ تو تحویل نگبُون بِ و بِکِإینَ نُمِ زِندُون. 26حقیقتاً، وَبینِتَ موشِم که تا قِرونِ آخِرَ نِإینَدُما، اَژ زِندُون نِماینَ دَشت.
شهوت
27شِنَفتینُونَ که فِتِنَ، "زِنا نَکَن." 28امّا مِ وَهُمَ موشِم، هر که وَکَمِ شهوت نگاه کِاَ ژَنی، هرَلَزَ نُمِ دلِ گُوژی وَگَردِ اَوَ زِنا کِردِسی. 29پس اَگَر کَمِ راسِت تونَ مُاوژیَ نُمِ گناه، اَوَ باریتَ دَشت و بُاوژیتَ دَشت، چیکِ اَرِنِت بیتِر یَسَ که عضوی اَژ بدنِت نابود بو تا اِئیکه گِشتِ بدنِت بِکِ نُمِ جَندِم. 30و اَگَر دَسِ راسِت تونَ مُاوژیَ نُمِ گناه، اَوَ بِر و بُاوژیتَ دَشت، چیکِ اَرِنِت بیتِرَ که عضوی اَژ بدنِت نابود بو تا اِئیکه گِشتِ بدنِت بِکِ نُمِ جَندِم.
طلاق
31هَمیژ نُمِ تورات فِتِنَ که ”هر که ژَن گُوژیَ طلاق بِ، طلاقنامَه با بِتَ بینی.“ 32امّا مِ وَهُمَ موشِم، هر که ژَنِ گُوژیَ بِخِرِ زِنا کِردِن اَراخاطرِ چیِ تِرِك طلاق بِ، باعث زِناکار بیِنِ اَوَ مُاو؛ و هر که ژَنی بِگِری که وَرِ یَ طلاق گِرتیَ، زِنااَ مِ.
قَسَم
33دُوارَه شِنَفتینُون که وَآیمَلِ قدیمی فِتِنَ، ”قَسَم دُرُو نیر، بلکم با بوسینَ سر قَسَمَلی که وَخداوند هاردینَ.“ 34امّا مِ وَبینِتُونَ موشِم، هرگِس قَسَم نیرِن، نَه وَآسِمُون، چیکِ تخت خدااَ، 35و نَه وَزمین، چیکِ کرسی ژیرِ پا اَوَسَ، و نَه وَاورشلیم، چیکِ شهر اَ پاتشاه کَلِنگَ. 36و وَسرِ گُوژیژِت قَسَم نیر، چیکِ نِمِتینین حتی میاِئی، اِسپی یا سی بِکِإین. 37پس ”اَ“ هُمَ ”اَ“ بو و ”نَه“ هُمَ ”نَه“، چیکِ بیشتِرَژ یَ اَژ شریرَ.
تَقاص
38هَمیژ شِنَفتینُونَ که فِتِنَ، ”کَم جَمَزِ کَم و دِنُون جَمَزِ دِنُون.“ 39امّا مِ وَهُمَ موشِم، نوسِنَ جِلِ ری آیمِ شَرَبار. اَگَر کسی کَشیدَ بیَر نُمِ ریِت، ریِ تِرِکِتَ بیگیردِنَ لای. 40و هر وخد کسی بِخوای اَژِنِت شکایت کِ و کِراسِتَ اَژِنِت بِسَنی، عباتَ بِتَ بینی. 41اَگَر سَرواز رومی وَبینِت دستور بِ که دو کیلومتر اَگَردی بِچین، تو چُوار کیلومتر اَگَردی بِچو. 42اَگَر کسی اَژِنِت چیئِی بِخوای که واقیَن وَبینی اِتیاج دیری، بِتَ بینی و اَژ کسی که مَخوای اَژ تو قَرض بِگِری، ریتَ اَژِنی نَگیردِن.
دشمنَلِتَ دوسِتُون داشتوت
43شِنَفتینُون که فِتِنَ، ”هُمساتَ دوسِتُون داشتوت وَگَردِ دشمنِت دشمنی کَ.“ 44امّا مِ وَهُمَ موشِم دشمنَلِتُونَ دوسِتُون داشتوت و اَرا آنَلی که هُمَلَ آزارَ مَن، دعااِ خِر کَن، 45تا اُویلَلِ بُاواِ گُوژِتُون که نُمِ آسِمُونَ، بِإینُون. چیکِ اَوَ اَفْتُواِ گُوژی مَتُااُونیَ سر آیمَلِ گَن و خو وَبارِشِ گُوژیَ مَرِشُونیَ سر آیمَلِ عادل و ظالم. 46چیکِ اَگَر فَقَد آنَلی دوسِتُون داشتوت که هُمَلَ دوس دیرِن، چِ اَجری دیرینُون؟ مَر حتی آیمَلِ خراجگیر هُنَ نِمَن؟ 47و اَگَر فَقَد وَبِرالِ گُوژِتُون سِلام کِإینُون، چِ خواِئی بیشتِرَژ آیمَلِ تِرِك دیرینُون؟ مَر حتی قومَلِ بِتپرَسیژ هُنَ نِمَن؟ 48پس هُمَ کامل بِن هُنَ که بُاواَ آسِمُونی هُمَ کاملَ.»
Currently Selected:
مَتّی 5: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
