مَتّی 4
4
عیسی امتحُونَ مُاو
1اِیندا روحالقدس، عیسااَ هدایت کِردیَ وِیرِ بیُااُون تا ابلیس امتحُونی کِتی. 2عیسی چِل شِ و چِل روژ روژی گِرتی، بعدِ تمُوم بیِنی، وِرسِنی بیتی. 3اِیندا اَ وسوسَهکَر یعنی ابلیس، یاهاتَ لا عیسی و فِتی: «اَگَر کُرِ خدائین، دستور بیئَه اِئی بَردَلَ تا بِنَ نُون!» 4عیسی جواُو داتی، فِتی: «نُمِ تورات نیسایَ که:
”انسُون فَقَد وَنُون زِنی نییَه،
بلکم وَهر کلومی که
اَژ دَمِ خدا مایَ دَشت.“»
5اِیندا ابلیس اَوَ بِردیَ شهر مقدّسِ و ناتیتَ ری وِرازِ معبد خداوند 6فِتیَه بینی: «اَگَر کُرِ خدائین، گُوژِتَ بُاوژَ هار، چیکِ نُمِ کِتُواِ زبور داوود نیسایَ:
”خدا دربارَه تو وَفرشتَلی
دستورَ مِ و آنَ
تونَ ری دَسَلِن مَگِرِن،
ناخُاو پالِتَ بِإینَر بَردی.“»
7عیسی جواُو داتیَ بینی:
«یِإیژَ نُمِ تورات نیسایَ که،
”خداوند، خدااِ گُوژِتَ امتحُون نَکَ.“»
8یِگِلِ تِرِك ابلیس عیسااَ بِردیتَ وِرازِ کواُیِ خیلی بُلُنگی و گِشتِ مملکتَلِ دینیااَ و جِلالِنَ وَبینی نیشُون داتی 9و فِتی: «اَگَر جِلِ مِ بِکِإینَ ری خاک و مِ بِپَرَسین، گِشتِ یانَ مِمَ بینِت.» 10عیسی فِتیَه اَوَ: «بِچو اَلا اِ شِطُون! چیکِ نُمِ تورات نیسایَ:
”خداوند، خدااِ گُوژِتَ بِپَرَس
و فَقَد اَوَ عبادت کَ.“»
11اِیندا ابلیس اَوَ وِل کِردی و فرشتَلَ یاهاتِن، اَوَ خذمتَ مَکِردِن.
شروع خذمت عیسی نُمِ جلیل
12وخدی عیسی شِنَفتی که یحیی دسگیر بیئَه، گِلَهاردی چیَ منطقَه جلیل. 13اِیندا اَژ ناصرَه چیَ دری، چیَ کَفَرناحوم و اُورَ زندَگی کِردی. کَفَرناحوم پِلیِ دریاچَه جلیل نُمِ منطقَه زِبولون و نَفتالی بی. 14إیجورَ کلومِ اِشعیا پیغمبر انجوم بی که فِتیتی:
15«سرزمین زِبولون،
سرزمین نَفتالی،
ریِ دریا، اَکُنِ اردن،
جلیل ملتَل؛
16مردمی که نُمِ تِریکی
زندَگیَ مَکِردِن،
نوری کَلِنگی دین،
ریِ آنَ که نُمِ دیاری که
ژیرِ سا مرگ جاگیر بین،
نوری درَشخی.»
17اَژ اَ زمُونَ عیسی شروع کِردی وَموعظَه اِئی پِغُوم مِتی: «تواَ کَن، چیکِ پاتشاهیِ آسِمُون نزیکَ!»
اوّلین شاگردَلِ عیسی
18وخدی عیسی کنار دریاچَه جلیل مَچااَ ری، دو بِرا دیتی وَنُومَلِ شَمعون، معروف وَپطرس، و بِرااِئی آندریاس، که تورَ مُااَوشتِنَ نُمِ دریاچَه، چیکِ ماهیگیر بین. 19فِتیَه بینِن: «بورِنَ دُمِ مِ که هُمَلَ مَکَمَ صیادِ مردم.» 20آنَ هرَلَزَ تورَلِ گُوژِنَ هیشتِنَ جا و چِنَ دُمی. 21هرَجورَ که عیسی مَچااَ ریِ گُوژ، دو بِرا تِرِك یعنی یعقوب کُرِ زِبِدی و بِرااِئی یوحنااَ دیتی که وَگَردِ بُاواَن زِبِدی نُمِ قایق بین و تورَلِ گُوژِنَ آمادَه مَکِردِن. عیسی هَنا کِردیَ آنِإیژ؛ 22آنَ هرَلَزَ قایقَ و بُاواَ گُوژِنَ وِل کِردِن اَ دُمِ اَوَ کَتِنَ ری.
شفا مریضَل
23عیسی نُمِ گِشتِ جلیل مَگیردا و نُمِ کنیسَلِن که اُورَ یهودیَل عبادت مَکِردِن، تعلیمَ ماتی و خَوَرِ خوش پاتشاهی آسِمُونَ اعلومَ مَکِردی و هر درد و هر مرضِ مردمَ شفااَ ماتی. 24اِیندا خَوَرِ معجزَلِ عیسی پیچااَ نُمِ گِشتِ سوریه و مردم گِشتِ مریضَلی که گرفتارِ هرَجور مرضَل و دردَل بین، و هَمیژ دیوزدَل و آیمَلی که تشنُجی بین و فلجَلَ مُااُوردِنَ لا عیسی و آنَلَ شفااَ ماتی. 25اِیندا جمیَت فِرِاِئی اَژ منطقَلِ جلیل و دِکاپولیس و اورشلیم و منطقَه یهودیَه و اَکُنِ اردن اَ دُمِ اَوَ رُاُونَه بین.
Currently Selected:
مَتّی 4: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
