مَتّی 21
21
عیسی شاهونَه یاهاتَ اورشلیم
1وخدی عیسی و شاگردَلی نزیکِ شهر اورشلیم بین و رَسینَ وِلِتِ بِیتفاجی و پا کواُیِ زِإیتین، عیسی دو نفر اَژ شاگردَلِ گُوژیَ رِ کِردی، 2فِتیَه بینِن: «بِچِنَ وِلِتی که جِلِ ریتُونَ. وخدی رَسینُونَ اُورَ، خَری اَگَردِ کُرِاِئی مِإینینُون که بَسِنِسی. آنَلَ وا کَن و بارِنَ لا مِ. 3اَگَر کسی وَبینِتُون چیئِی فِتی، بوشِن: ”خداوند وَبینِن اِتیاج دیری،“ و اَوَ هرَلَزَ آنَلَ رِاَ مِ.» 4اِئی اتفاقَ کَت تا اَچیکِ پیغمبر فِتیتی انجوم بو که:
5«وَدِتِ صَهیون بوشِن،
”اِسگَ پاتشاهِت مایَ لا تو،
فروتَن و سُواُرِ خَری،
ری کُرِ خَری.“»
6اَ دو شاگردَ چِن و مِطاقِبِ فرمُون عیسی انجوم داتِن. 7آنَ خَرَ وَگَردِ کُرِاِئی آاُوردِن و عبااِ گُوژِنَ آاُوشتِنَ ری آنَ و اَوَ نیشتَ سر عبالَ. 8جمیَت فِرِإیژ عبالِ گُوژِنَ وِلا کِردِنَ سر ری و بِری تِرِکیژ شاخَلِ دارَلَ بِرین، وِلا کِردِنَ نُمِ ری. 9جمیَتی که وَرِ اَوَ مَچان و دَسهاِئی که پِشتِ سریَ ماهاتِن، دادَ مَکیشان، مِتِن:
«نجات بیئَه اِ کُرِ داوود»
«بِمارِکَ اَوَ که وَنُومِ خداوندَ مای!»
«نجات نُمِ عرشِ فلک!»
10وخدی اَوَ چیَ نُمِ اورشلیم، گِشتِ شهر کَتِنَ تَپِتوپ و مَپِرسان: «یَ کیَه؟» 11و جمیَت جواُو ماتِن: «یَسَ عیسااِ پیغمبر، اَژ حوزِ ناصرَه جلیل!»
عیسی معبد خداوندَ پاکَ مِ
12اِیندا عیسی یاهاتَ نُمِ معبدِ خداوند و آیمَلی که اُورَ معاملَه مَکِردِن، آاُوتیَ دَشت و تختَلِ صرافَل و بَن و بساطِ کَمُوتَرفروشَلَ چُااُوشَ کِردی 13و فِتیَه آنَ: «نُمِ کِتُواَلِ مقدّس نیسایَ که، ”وَمالِ مِنَ موشِن مالِ دعا،“ امّا هُمَ اَوَ کِردینُونَسَ لُونَه دُزَل.»
14نُمِ معبد، آیمَلِ کور و شَل یاهاتِنَ لا عیسی و اَوَ آنَلَ شفا داتی. 15امّا وخدی رئیسَلِ کاهنَل و معلمَلِ تورات کارَلِ بِلِإیژِنِ اَوَ دین و هَمیژ دین که اُویلَلَ نُمِ معبد دادَ مَکیشان: «نجات بیئَه اِ کُرِ داوود،» حرصِن گِرتی. 16پس فِتِنَ عیسی: «آیا مَشنین یانَ چَ موشِن؟» جواُو داتی: «اَرِ. مَر نُمِ کِتُواِ زبور داوود نَخوانتینُونَ که،
”دَمِ اُویلَلَ و طِلفَلَ
اَرا ستایش واز کِردین؟“»
17اِیندا عیسی آنَلَ هیشتیَ جا و اَژ شهر چیَ دَشت، چیَ بیتعَنْیا و شِ اُورَ مَنت.
حُشک بیِنِ دارِ انجیر
18دَمِ صُ عیسی نُمِ ری که گِلَمُهاردیَ شهر، وِرسِنی بیتی. 19لِ جَدَ، دارِ انجیری دیتی چیَ میلِ اَوَ، امّا بِخِرَژ بَلْگ چیئِی قِ اَوَ پیا نَکِردی. اِیندا فِتیَه دارَ: «دَ هرگِس میوه اَژ تو بار نای!» جُواَرجا دارَ حُشک بی. 20وخدی شاگردَلَ یَ دین، ماتِنَ بِرد، اَژ اَوَ پِرسین: «چُطِر دارِ انجیر هُنَ زی حُشک بی؟» 21عیسی جواُو داتی فِتیَه آنَ: «حقیقتاً، وَبینِتُونَ موشِم، اَگَر ایمُونِتُون داشتوت و شِک نَکِإینُون، نَه فَقَد مِتینینُون اَچیکِ یاهاتَ سر دارِ انجیرَ انجوم بِإینُون، بلکم هر وخد وَاِئی کواُیَ بوشینُون ”اَژ ریشی بواَ دَشت، و بِکَ نُمِ دریا،“ هُنَ مُاو. 22اَگَر ایمُونِتُون داشتوت، هر چی که نُمِ دعا بِخواینُون، مَگِرینُون.»
سؤال دربارَه قدرت و اختیار عیسی
23اِیندا عیسی چیَ نُمِ معبدِ خداوند و داشتی مردمَ تعلیمَ ماتی، که رئیسَلِ کاهنَل و شیخَلِ قوم یاهاتِنَ لا اَوَ و فِتِن: «وَچِ حقی اِئی کارَلَ مَکِإین؟ کی حق انجوم داتِنِ اِئی کارَلَ وَبینِت داسی؟» 24عیسی جواُو داتی: «مِنیژ اَژ هُمَ سوالی دیرِم. اَگَر جواُو داتینُون، مِنیژ وَبینِتُونَ موشِم وَچِ قدرت و اختیاری اِئی کارَلَ مَکَرِم. 25تعمید یحیی اَژ کو بی؟ اَژ جانب خدا یا اَژ جانب انسُون؟» آنَ اَنُمِ گُوژِن مشورَت کِردِن و فِتِن: «اَگَر بوشیمُون اَژ جانب خدا بی، وَبینِمُون موشی، ”پس اَراچَ وَبینی ایمُون نُااُوردینُون؟“ 26و اَگَر بوشیمُون اَژ جانب انسُون بی، اَژ مردم زَلَمُونَ مَچو، چیکِ گِشتِ مردم یحیااَ یِ پیغمبرَ مَزانِن.» 27پس جواُو داتِنَ عیسی: «نِمَزانیمُون.» عیسی فِتی: «مِنیژ وَهُمَ نِموشِم وَچِ قدرت و اختیاری اِئی کارَلَ مَکَرِم.»
مَتَلِ دو کُر
28«نظر هُمَ چیَ؟ پییائی دو کُر داشتی. چیَ لا کُرِ اوّل و فِتی: ”کُرِم، اِیمِرو بِچو نُمِ باخِ اَاُنیر کار کَ.“ 29جواُو داتی: ”نِمَچِم.“ امّا بعد فکری عوض بی و چی. 30بُاواَ چیَ لا کُرِ تِرِك و هر هُنَ وَبینی فِتی. کُرَ جواُو داتی: ”مَچِم، آقا،“ امّا نَچی. 31کُمُنی اَژ اَ دو کُرَ خواسِ بُاواَ انجوم داتی؟» آنَ جواُو داتِن: «اوّلینَ.» عیسی فِتیَه بینِن: «حقیقتاً، وَبینِتُونَ موشِم، خراجگیرَل و ژَنَلِ خَراُو وِرَژ هُمَ مَچِنَ نُمِ پاتشاهی خدا. 32چیکِ یحیی یاهاتَ لا هُمَ تا وَبینِتُون ریِ دُرُسَ نیشُون بِ، امّا بُااُور نَکِردینُون، ولی خراجگیرَل و ژَنَلِ خَراُو بُااُور کِردِن. بااِئیکه هُمَ یانَ دینُون، آخِری پشیمُون نِإینُون و اَوَ بُااُور نَکِردینُون.
مَتَلَ باغبُونَلِ شَرَبار
33گوش بیَنَ مَتَل تِرِك. صُاُاِ مِلکی باخِ اَاُنیری آاُوشتی و دِرِ اَوَ تیغَه کیشاتی و حوضی نُمِ اَوَ اَرا یَکه وَلَخَ آاُواِ اَاُنیرَ بِگِری و شِراُو دُرُس کِ، کَنتی و بِرجَکیژی اَرا نگبُونی آاُوتی. اِیندا باخِ اَاُنیرَ وَچَن باغبُون اجاره داتی و گُوژی چیَ مملکتی تِرِك. 34وخدی مِقِ چیِنِ محصول رَسی، غلامَلِ گُوژیَ رِ کِردیَ لا باغبُونَلَ تا اَژِنِن سهم اَوَ اَژ محصول بِگِری. 35امّا باغبُونَل غلامَلِ اَوَ گِرتِن، یَکی سیر کتک دانَرِنی و یَکی تِرِك کُشتِن و یَکیتِریژ سنگسار کِردِنی. 36یِ گِلِ تِرِك، غلامَلِ بیشتِری رِ کِردیَ لا آنَ، امّا باغبُونَلَ وَآنیژَ هرَجورَ کِردِن. 37آخِرسَر کُرِ گُوژیَ رِ کِردیَ لا باغبُونَلَ و نُمِ دلِ گُوژی فِتی: ”آنَ حرمت کُرِمَ نییَه میرِن.“ 38امّا وخدی که باغبُونَلَ کُرَ دین، وَگَردیَک فِتِن: ”یَ صُاُاِ میراتَ. بورِن اَوَ بُکُشیمُون و میراتیَ بِکِإیمُونَ هِنِ گُوژِمُون.“ 39پس اَوَ گِرتِنی و اَژ باخِ اَاُنیرَ آاُوتِنَ دَشت، کُشتِن. 40اِسگَ وخدی صُاُاِ باخَ بای وَگَردِ اِئی باغبُونَلَ چَ مَکِ؟» 41آنَ جواُو داتِن: «اَ آیمَلِ شَرَبارَ وَبیرحمیِ تمُوم نابودَ مِ و باخَ وَباغبُونَلِ تِرِك اجاره مِ تا سهمِ میوَل نُمِ فصلی وَبینی بیَن.»
42اِیندا عیسی فِتیَه بینِن: «آیا تا اَلُون نُمِ کِتُواِ زبور داوود نَخوانتینُونَ که،
”بَردی که معمارَل رد کِردِنی،
بیئَسَ بَردِ اصلی ساختمُون.
خداوند هُنَ کِردیِ
و وَکَمِ هیمَ بِلِإیژِنَ مای“
43پس وَبینِتُونَ موشِم که پاتشاهی خدا اَژ هُمَ مَگِری و مِاَ قومی که ثمر بیَن. 44[هر که وَری اَ بَردَ بِکِ، حُردَ مُاو، و هر وخد اَ بَردَ بِکِ ری کسی، اَوَ لیَ مَکِتی.]»
45وخدی رئیسَلِ کاهنَل و شیخَلِ فرقَه فریسی مَتَلَلِ عیسااَ شِنَفتِن، زِناستِن که دربارَه آنَ قِصَ مِ. 46بااِئیکه اَ دُمِ یَ بین که اَوَ دسگیری کِنی، امّا اَژ مردم زَلَن چی، چیکِ آنَ عیسااَ یِ پیغمبرَ مَزِناستِن.
Currently Selected:
مَتّی 21: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
