مَتّی 20
20
مَتَل کارگرَل باخِ اَاُنیر
1« پاتشاهی آسِمُون مِثادِ اَربابی مَمینی که صُاِ زی اَژ مال چیَ دَشت تا اَرا باخِ اَاُنیرِ گُوژی کارگرَلی روژمِزد بِگِری. 2اَوَ وَگَردِ آنَ قرارِ بَستی که روژی یِ دینار که دَسمِزد یِ روژ یِ کارگر سادَه بی، اَرا کار نُمِ باخِ اَاُنیر وَهر کُمَژ آنَ بِ. اِیندا آنَلَ رِ کِردیَ باخِ اَاُنیرِ گُوژی. 3نزیک سات نُه صُ اَدُوارَه چیَ دَشت و آیمَلیَ دیتی که نُمِ میدون بیکار هوسانَ. 4فِتیَه آنِإیژ: ”هُمِإیژ بِچِنَ نُمِ باخِ اَاُنیرِ مِ و اَچیکِ حق هُمِیَه مِمَ بینِتُون.“ 5اِیندا آنِإیژ چِن. اَدُوارَه نزیکِ سات دُوازَه و سه نیمَرو چیَ دَشت و هُنَ کِردی. 6و نزیکِ سات پنج ایوارِإیژ چیَ دَشت و اَدُوارَه دیتی که چَن نفرِ تِرِك بیکار هوسانَ. اَژِنِن پِرسیتی: ”اَراچَ گِشتِ روژ بیکار هوساینُونَ اِیرَ؟“ 7آنَ جواُو داتِن: ”چیکِ هیشکس وَبینِمُون کار ناسی.“ فِتیَه بینِن: ”هُمِإیژ بِچِنَ نُمِ باخِ اَاُنیرِ مِ.“ 8با ایوارَه، صُاُاِ باخِ اَاُنیر فِتیَه سرکارگرِ گُوژی: ”کارگرَلَ هَنا کَ و شروع کَ اَژ آخِر تا اوّل، مِزدِنَ بیئَه.“ 9کارگرَلی که نزیک سات پنج ایوارَه سرکار یاهاتیبین، هر کُم یِ دینار گِرتِن. 10وخدی نُواَت وَکسَلی رَسی که وِرَژ گِشتِن یاهاتیبین، گِمُون کِردِن که فِرَتِرَژ آیمَلِ تِرِكَ مَگِرِن. امّا هر کُمَژ آنِإیژ یِ دینار گِرتِن. 11وخدی مِزدِ گُوژِنَ مَگِرتِن، وَغُرغُر فِتِنَ صُاُاِ باخِ اَاُنیرَ: 12”یانَ که آخِرسَر یاهاتِنَ، فَقَد یِ سات کار کِردِن و تو آنَلَ وَگَردِ هیمَ که گِشتِ روژِ ژیر اَفْتُواِ داخ زحمت کیشایمُونَ، کِردینَ یَکی!“ 13صُاُاِ باخِ اَاُنیر ری کِردیَ یَکی اَژ آنَ و فِتی: ”اِ رفیق، مِ وَبینِت ظِلمی نَکِردِمَ. مَر قرارِ هیمَ یِ دینار نِإی؟ 14پس حقِ گُوژِتَ بِگِر و بِچو! مِ دلِمَ مِتی وَاِئی آخِریَ مِثادِ تو مِزد بیَم. 15مَر حق نِرِم وَپیلِ گُوژِم اَچیکِ دلِمَ مِتی بِکَم؟ یعنی کَم نِرین دَسِدِلوازیِ مِ بینین؟“ 16پس، آخِرینَل، مِنَ اوّل و اوّلینَل، مِنَ آخِر!»
سوّمین پیشگوئی عیسی دربارَه مرگ و زِنی بیِنی
17وخدی که عیسی مَچااَ اورشلیم، نُمِ ری دُوازَه شاگرد گُوژی بِردیَ سیکی و فِتیَه بینِن: 18«اِسگَ مَچیمُونَ اورشلیم. اُورَ کُرِ انسُونَ وَرئیسَلِ کاهنَل و معلمَلِ تورات تسلیمَ مَن. آنَ اَوَ وَمرگ محکومَ مَن 19و مَسپارِنَ غیریهودیَل تا تیزِتَلَکَ کِنی و شلاق بِنَرِنی و بیکیشینیَر صلیب. امّا نُمِ روژ سوّم زِنیَ مُاو.»
خواهش یِ دا
20اِیندا دا کُرَلِ زِبِدی اَگَردِ دو کُرَلی یاهاتَ لا عیسی و جِلِ اَوَ زُنی داتی و اَژِنی یِ چیئِی خواستی. 21عیسی پِرسیتی: «چَتَ مِ؟» فِتی: «اجازَه بیئَه که اِئی دو کُرِ مِ نُمِ پاتشاهیِ تو یَکی وَدَسِ راس و یَکی تِرِك وَدَسِ چپ تو بِنیشِن.» 22عیسی جواُو داتی: «هُمَ نِمَزانینُون چَتُونَ مِ! مَر مِتینینُون اَژ جُمی که مِ قرارَ هُرتبیَم، هُرتبیکیشینُون؟» جواُو داتِن: «اَرِ، مِتینیمُون.» 23عیسی فِتی: «اَل۟وَتَه که اَژ جُمِ مِ هُرتَمَکیشینُون، امّا نیشتِنِ وَدَسِ راس و چپِ مِ وَاختیار مِ نییَه تا اَوَ بِمَ کسی. اِئی جایگاهَ هِنِ کسَلی کَ که بُاواَ آسِمُونی مِ اَرِنِن تیارِک دیِسی.»
24وخدی ده شاگردِ تِرِك اَژ اِئی اتفاقَ باخَوَر بین، اَژ اَ دو بِرا حرصِن گِرتی. 25عیسی هَنا کِردیَ آنَ و فِتی: «هُمَ مَزانینُون که حاکمَلِ غیریهودیَل آقائی مَکَنَ آنَ و کَلِنگَلِن قدرت و اختیار دیرِنَ آنَ. 26امّا نُمِ هُمَ هُنَ نُاو. هر که مَخوای نُمِ هُمَ کَلِنگ بو، با خادم هُمَ بو. 27و هر که مَخوای نُومِ هُمَ اوّل بو، با نُوکرِ هُمَ بو. 28هُنَ که کُرِ انسُونیژ ناهاتیَ تا خذمتی بِکِنی، بلکم یاهاتیَ تا خذمت کِ تا گُونیَ مِثادِ قیمت آزادی اَرا آیمَلِ فِرِاِئی بِ.»
شفا دو کور
29وخدی که عیسی و شاگردَلی اَژ شهر اَریحا مَچانَ دَشت، آیمَلِ فِرِاِئی دنبالِ اَوَ کَتِنَ ری. 30لِ جَدَ، دو پییا کور نیشتیبین. وخدی شِنَفتِن عیسی اَژ اُورَ ردَ مُاو، داد کیشاتِن: «اِ آقا، اِ کُرِ داوود، وَهیمَ رحم کَ!» 31مردم تَشَر داتِنَ آنَ و خواستِن که ساکت بِن؛ امّا آنَ بیشتِر داد کیشان که: «اِ آقا، اِ کُرِ داوود، وَهیمَ رحم کَ!» 32عیسی هوسا و هَنا کِردیَ اَ دو پییا و پِرسیتی: «چَتُونَ مِ اَرِنِتُون بِکَم؟» 33اَ دو کورَ جواُو داتِن: «اِ آقا، کَمَلِمُون وا کَ.» 34عیسی وَدلسوزی دَس ناتیَ ری کَمَلِن و جُواَرجا کَمَلِن وا بی و کَتِنَ دُمی چِن.
Currently Selected:
مَتّی 20: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
