مَتّی 19
19
تعلیم دربارَه طلاق
1وخدی که عیسی اِئی قِصَلَ تمُوم کِردی، اَژ منطقَه جلیل چیَ میلِ اَکُنِ رو اردن یاهاتَ منطقَه یهودیَه. 2جمیَت فِرِاِئی کَتِنَ دُمی و عیسی آنَلَ اُورَ شفا داتی.
3شیخَلِ فرقَه فریسی یاهاتِنَ لای تا اَوَ امتحُون کَن. آنَ پِرسین: «آیا جایزَ که پییا ژَنِ گُوژیَ وَهر دلیلی طلاق بِ؟» 4عیسی جواُو داتی: «مَر نُمِ تورات نَخوانتینُونَ که اَوَ که آنَلَ خلق کِردی، هرَژ اوّل ”آنَلَ ژَنِ پییا خلق کِردی“، 5و فِتی ”اَرایَسَ که، پییا اَژ بُاواَ و دا گُوژی جیااَ مُاو، مَچَسبیَ ژَنِ گُوژ و اَ دواَ مِنَ یِ بدن“؟ 6پس اَژیرَدُما دَ دو نیِن بلکم یَکیکِن. پس اَچیکِ خدا ناتیَ قِ یَک، انسُون نَباس جیا کِ.» 7فریسیَل فِتِنَ بینی: «پس اَراچَ موسی حُکم کِردی که پییا طلاقنامَه بیئَه ژَنِ گُوژ و اَوَ وِل کِ؟» 8عیسی فِتیَه آنَ: «موسی اَرا سنگدلی هُمَ اجازَه داسی که ژَنِ گُوژِتُونَ طلاق بِإینُون، امّا اَژ اوّل هُنَ نِإی. 9مِ وَبینِتُونَ موشِم، هر که ژَنِ گُوژیَ بِخِرِ خیزی کِردِن اَراخاطرِ چیِ تِرِك طلاق بِ و ژَنِ تِرِكی بِگِری، زِنا کِردِسی.»
10شاگردَلَ فِتِنَ بینی: «اَگَر وضعِ پییا اَگَردِ ژَنِ گُوژی هُنَسَ، پس ژَن نُهاستِن بیتِرَ!» 11عیسی فِتی: «گِشتِ آیمَل نِمِتِنِن اِئی کلومَ قبول کَن، مَر کسَلی که وَبینِن عطا بیئَه. 12چیکِ بِری خواجَن، چیکِ اَژ لَمِ دان هُنَ یاهاتِنَ دینیا؛ بِری تِرِك خواجَن چیکِ وَدَس مردم خواجَه مِن؛ و بِریژ خواجَن چیکِ اَراخاطرِ پاتشاهی آسِمُون گُوژِنَ خواجَه مَزانِن و ژَن نِمُوزِن. هر که مِتِنی یَ قبول کِ، بیلَ هُنَ کِ.»
عیسی و اُویلَل
13اِیندا مردم اُویلَلَ آاُوردِنَ لا عیسی تا دَس بِنِ سرِن و دعااِ خِر کِ. امّا شاگردَلَ تَشَر دانَ مردم. 14عیسی فِتی: «بیلِن اُویلَلِ هُوردِلَ بانَ لا مِ و جِلِ آنَ نَگِرِن، چیکِ پاتشاهیِ آسِمُون اَرا هُنَ کسَلی کَ.» 15پس دَس ناتیَ سر آنَ و اَژ اُورَ چی.
جاهِل ثروتمَن
16روژی پییائی یاهاتَ لا عیسی و پِرسیتی: «استاد چکارِ خواِئی انجوم بیَم تا زندَگونی ابدی داشتوم؟» 17عیسی جواُو داتیَ بینی: «اَراچَ دربارَه یَکه چِ کاری خواَ، اَژ مِ سوالَ مَکِإین؟ فَقَد یَکی کَ که خواَ. اَگَر مَخواین ری پیا کِإینَ نُمِ زندَگونی ابدی، حُکمَل شریعتَ انجوم بیئَه.» 18اَ پییا پِرسیتی: «کُمُنی حُکمَل؟» عیسی فِتی: «”آیم نَکُش، زِنا نَکَ، دُزی نَکَ، شاهادَتِ دُرُو نوش، 19حرمت بِنَ دا و بُاواَ گُوژِت،“ و ”هُمساتَ مِثادِ گُوژِت دوسِت داشتوت.“ 20اَ جاهِلَ فِتی: گِشتِ اِئی حُکمَلَ انجوم دامَ؛ دَ چَ با بِکَرِم؟» 21عیسی جواُو داتی: «اَگَر مَخواین کامل بِإین، بِچو و اَچیکِ دیرین بُفروش و پیلی بیئَه فقیرَل که نُمِ آسِمُون گنجی دیرین. اِیندا بواَ دُمِ مِ.» 22جاهِلَ وخدی یَ شِنَفتی، خُصَدار بی و اَژ اُورَ چی، چیکِ مالِمِنالِ فِرِاِئی داشتی.
23اِیندا عیسی فِتیَه شاگردَلی: «حقیقتاً، وَبینِتُونَ موشِم، چَنی سختَ که یِ آیمِ ثروتمَن نُمِ پاتشاهی آسِمُون ری پیا کِ. 24اَدُوارَه موشِم که رد بیِن شتِر اَژ کُنا دَرزِن آسُونتِرَژ یَسَ که آیمِ ثروتمَنی بِچواَ نُمِ پاتشاهیِ خدا.» 25وخدی شاگردَلَ یَ شِنَفتِنِ فِرَ بِلِإیژِنِن یاهات و پِرسین: «پس کی مِتِنی نجات پیا کِ؟» 26عیسی کَم آاُوتیَ آنَ و فِتی: «یَ اَرا انسُون محالَ، امّا اَرا خدا هیچی محال نییَه.»
27پطرس فِتی: «نگاه کَ، هیمَ گِشتِ چی وِل کِردیمُونَ و یاهاتیمُونَسَ دنبالِ تو. پس چَ نصیوِ هیمَ مُاو؟» 28عیسی فِتیَه آنَ: «حقیقتاً، وَبینِتُونَ موشِم، نُمِ اِئی دینیااِ جدید، وخدی که کُرِ انسُون بینیشیَر ری تختِ پاتشاهیِ باشکوه گُوژی، هُمِإیژ که اَ دُمِ مِ یاهاتینُونَ ری دُوازَه تخت مَنیشینُون، و دُوازَه قبیلَه اسرائیلَ داوری مَکِإینُون. 29و هر که اَراخاطرِ نُوم مِ مال یا بِرا یا خُویَ یا بُاواَ یا دا یا اِلاد یا مِلکِ گُوژی بیلیَجا، صد بِرابری ماریَ دَس و زندَگونی ابدیَ میراتَ میَری. 30امّا خیلی اَژ کسَلی که اوّلِن، مِنَ آخِر، و کسَلی که آخِرِن، مِنَ اوّل!»
Currently Selected:
مَتّی 19: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
