مَتّی 2
2
یاهاتِنِ مُغَل
1اِسگَ بعدِ یَکه عیسی نُمِ زمُونِ سلطنت هیرودیسِ پاتشاه، نُمِ بِیتلِحِمِ یهودیَه وَدینیا یاهات، اِسگَ چَن مُغ دُونا که نُمِ ستارَشناسی استاد بین، اَژ مشرق زمین یاهاتِنَ شهر اورشلیم 2و پِرسین: «هُاواَ کو اَ پاتشاهِ یهود که وَدینیا یاهاتیَ؟ چیکِ ستارَه اَوَ نُمِ مشرق دیمُونَ و یاهاتیمُونَ اَوَ بِپَرَسیمُون.» 3وخدی هیرودیسِ پاتشاه یَ شِنَفتی، هراسُون بی و گِشتِ اورشلیمیژ وَگَردی هراسُون بی. 4اِیندا هیرودیس گِشتِ رئیسَلِ کاهنَلِ معبد یهود و معلمَلِ توراتِ قومَ هَنا کِردی و اَژِنِن پِرسیتی: «مسیحی که با بای، اَکو با بایَ دینیا؟» 5جواُو داتِن: «نُمِ شهر بِیتلِحِمِ یهودیَه، چیکِ میکااِ پیغمبر دربارَه یَ هُنَ نیسُونِسی:
6”تو اِ بِیتلِحِم که نُمِ
سرزمین یهوداإین،
تو اَنُمِ فرمُوندَل یهودا
وَهیچ جورَ کمتِرین نین،
چیکِ اَژ تو یِ حکمرُونی مای
که قوم مِ، اسرائیلَ، شُااُونیَ مِ.“»
7اِیندا هیرودیس یُواُشَکی اَ مُغَلَ هَنا کِردیَ لا گُوژی و اَژِنِن پِرسیتی که کِ اَ ستارَه ظاهر بیئَه. 8اِیندا آنَلَ رُاُونَه کِردیَ بِیتلِحِم، فِتیَه آنَ: «بِچِن وَدقت مینِ اَ طِلفَ کَن. وخدی اَوَ پیا کِردینُون، خَوَرِم کَن تا مِنیژ بام، بِپَرَسِمی.» 9مُغَل بعد اَژ شِنَفتِن قِصَلِ پاتشاه، کَتِنَ ری. و اَ ستارِاِئی که نُمِ مشرق دینِنی، جِلِتِرَژ آنَ مَچا تا آخِرسَر وِرازِ جائی که طِلفَ بی، هوسا. 10وخدی آنَ اَ ستارَه دین، بیحد شاد بین. 11وخدی یاهاتِنَ نُمِ مالَ و طِلفَ وَگَردِ دااِئی مریم دین، وَری کَتِنَر زمین ، اَ طِلفَ پَرَسین. اِیندا صندوقچَلِ گُوژِنَ وا کِردِن و خَلئَتی اَژ طِلا و جاجِگ تَلَه و مومِنااِنی پیشکَش کِردِن. 12و چیکِ نُمِ خُاو هُشتار دینَ که گِلَنیرِنَ لا هیرودیس، اَژ ریِ تِرِك کَتِنَ ری چِنَ مملکت گُوژِن.
هیواینَ میلِ مصر
13بعد اَژ اِئیکه مُغَلَ چِن، اِسگَ فرشتَه خداوند یاهاتَ نُمِ خُاواِ یوسف و فِتی: «وِرزِر، طِلفَ و دااِئیَ بِگِر و بیهانَ میلِ مصر و اُورَ بیمین تا وَبینِت خَوَر بیَم، چیکِ هیرودیس پاتشاه مینِ طِلفَ مِ تا اَوَ بُکُشی.» 14اِیندا یوسف وَشِ وِرزااِر، طِلفَ و دااِئیَ گِرتی و چیَ مصر، 15و تا زمُون مِردِن هیرودیسِ پاتشاه اُورَ مَنت. اِئی اتفاقَ کَت، تا اَچیکِ خداوند وَزُاُنِ هوشع پیغمبر فِتیتی وَانجوم بِرَسی که «کُرِ گُوژِمَ اَژ مصر هَنا کِردِم.»
16وخدی هیرودیسِ پاتشاه زِناستی که مُغَلَ فَنی دانَ، خیلی عصبونی بی و آیمَلی رِ کِردی تا گِشتِ کُرَلِ دو سالَه و کمتِرَژ اَوَ، که نُمِ شهر بِیتلِحِم و گِشتِ اَ منطقَه بین، مِطاقِبِ زمُونی که مُغَلَ معلومِن کِرد، بُکُشِن. 17اِیندا اَچیکِ وَزُاُنِ اِرمیااِ پیغمبر فِتیتی، انجوم بی که:
18«دَنگی اَژ رامَه مَرَسیَ گوش،
دَنگِ گیری زاری و شین کَلِنگی.
راحیل اَرا اُویلَلی مَگیری
و نِمِتی دلگُائی بِگِری،
چیکِ دَ نین.»
گِلَهاردِنَ ناصرَه
19بعدِ مِردِنِ هیرودیس، اِسگَ فرشتَه خداوند نُمِ مصر یاهاتَ نُمِ خُاواِ یوسف 20و فِتی: «وِرزِر، طِفلَ و دااِئی بِگِر و بِچو سرزمین اسرائیل، چیکِ آنَلی که قَصِ گُونِ طِفلَ داشتِن، مِردِنَ.» 21اِیندا یوسف وِرزااِر، طِفلَ و دااِئیَ گِرتی و چیَ سرزمینِ اسرائیل. 22امّا وخدی شِنَفتی آرکِلائوس جَمَزِ بُاواِئی هیرودیس نُمِ یهودیَه حکمرُونیَ مِ، زَلَ چیتی بِچواَ اُورَ، چیکِ نُمِ خُاو هُشتار گِرتی، ری کِردیَ منطقَه جلیل چی 23و نُمِ شهری وَنُومِ ناصرَه جاگیر بی. اِئی اتفاقَ کَت تا کلومِ پیغمبرَل انجوم بِگِری که فِتین «ناصری» وَبینی موشِن.
Currently Selected:
مَتّی 2: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
