مَتّی 18
18
کی اَژ کل کَلِنگتِرَ؟
1نُمِ اَ وخدَ، شاگردَلَ یاهاتِنَ لا عیسی و پِرسین: «کی نُمِ پاتشاهی آسِمُون اَژ کل کَلِنگتِرَ؟» 2عیسی یِ اُویلِ هُوردِلِاِئی هَنا کِردی و اَوَ ناتیَ وسطِ آنَ 3و فِتی: «حقیقتاً، وَبینِتُونَ موشِم، تا عوض نِإینُون و مِثادِ اُویلَل نِإینُون، هرگِس وَپاتشاهی آسِمُون ری پیا نِمِإینُون. 4پس، هر که گُوژیَ مِثادِ اِئی اُویلَ فروتَن کِ، نُمِ پاتشاهی آسِمُون اَژ کل کَلِنگتِرَ. 5و هر که هُنَ اُویلیَ وَنُومِ مِ قبول کِ، مِ قبول کِردِسی.
6امّا هر که باعث بو یَکی اَژ اِئی هُوردِلَلَ که وَبینِم ایمُون دیری اَژ ایمُون بِکِ، اَرا اَوَ بیتِر یَسَ که بَردِ اَسیُواِ کَلِنگی بِإنیَ مِلی، و تَه دریا غرق بو! 7هِرو اَرِ اِئی دینیا که اَگَردِ وسوسَلی باعثِ گناهَ مُاو! چیکِ هرچَن وسوسَلَ همیشَه هَن، امّا هِرو اَرِ اَوَ که باعثِ وسوسَه بو!
8پس اَگَر دَسِت یا پات باعثِ گناه کِردِنِتَ مُاو، اَوَ بِر و بُاوژَ دَشت، چیکِ اَرا تو بیتِرَ که شلِلنگ بِچینَ نُمِ زندَگونی ابدی تا اِئیکه وَدو دَس یا دو پا بِکِإینَ نُمِ آگِر ابدی. 9و اَگَر کَمِت باعثِ گناه کِردِنِتَ مُاو، اَوَ بارَدَشت و بُاوژَ دَشت، چیکِ اَرا تو بیتِرَژ یَسَ که وَیِ کَم بِچینَ نُمِ زندَگونی ابدی تا اِئیکه وَدو کَم بِکِإینَ نُمِ آگِر جَندِم.
مَتَلِ دینایِ گُمبی
10حُاواُسِتُون بو که هیش کُمَژ اِئی هُوردِلَلَ خوار نَکِإینُون، چیکِ وَبینِتُونَ موشِم که نُمِ آسِمُون فرشتَلِ آنَ همیشَه ریِ بُاواَ مِ که نُمِ آسِمُونَ، مِإینِن. 11[چیکِ کُرِ انسُون یاهاتیَ تا اَوَ که گُم بیئَه نجات بِ.] 12چَ گِمُونَ مِإینُون؟ اَگَر پییائی صد کُااُوری داشتوتی و یَکی اَژ آنَ گُم بو، یعنی اَ نَود و نُه کُااُورَ نُمِ کواُی۟کَمَرَل نِمِإیلیَجا و مینِ اَوَ که گُم بیئَه نِمَکِ؟ 13حقیقتاً، وَبینِتُونَ موشِم، که اَگَر اَوَ پیا کِ، اَرا اَ یِ کُااُور بیشتِر خوشیَ مِ تا اَرا اَ نَود و نُه کُااُورَلی که گُم نِإینَ. 14و هریجورَ، خواس بُاواَ هُمَ که ها نُمِ آسِمُون یَ نییَه که حتی یَکی اَژ اِئی هُوردِلَلَ اَژ بین بِچو.
چُطِر اَگَردِ بِرا خطاکار رفتار کِإینُون
15اَگَر بِرات وَبینِت گناه کِ، بِچواَ لای و اَنُمِ گُوژِتُون خطائی وَبینی بوش. اَگَر قِصَت قبول کِردی، بِراتَ اَدُوارَه آاُوردینَ دَس؛ 16امّا اَگَر قبول نَکِردی، یَکی یا دو نفر تِرِك وَگَردِ گُوژِت بیَر تا ”هر قِصِاِئی وَشاهادَت دو یا سه شاهد ثابت بو.“ 17اَگَر نَگِستی وَآنیژ گوش بِ، وَکلیسا بوش؛ و اَگَر حتی حرفِ کلیساإیژَ قبول نَکِردی، اِیندا اَوَ غریبَ یا خراجگیر بِزان. 18حقیقتاً، وَبینِتُونَ موشِم، هر چی که ری زمین بِنینُون، نُمِ آسِمُون بَسَ مُاو؛ و هر چی که ری زمین وا کِإینُون، نُمِ آسِمُون وازَ مُاو. 19اَدُوارَه وَبینِتُونَ موشِم که هر وخد دو نفر اَژ هُمَ ری زمین دربارَه هرچی که بِخوان وَگَردِ یَک یِ دل بِن، اَژ جانبِ بُاواَ مِ که ها نُمِ آسِمُون اَرا آنَ انجومَ مُاو. 20چیکِ جائی که دو یا سه نفر وَنُومِ مِ جمع بِن، مِ اُورَ هامَ نُمِ آنَ.»
مَتَل خادمی که نِمَبَشقی
21اِیندا پطرس یاهاتَ لا عیسی و پِرسیتی: «اِ آقا، تا چَن گِل اَگَر بِرام وَبینِم گناه کِ، اَوَ با بِبَشقِم؟ آیا تا هفت گِل؟» 22عیسی جواُو داتی: «وَبینِتَ موشِم نَه هفت گِل، بلکم هفتادْ گِل هفت گِل.
23اَرایَسَ، پاتشاهی آسِمُون مِثادِ پاتشاهی کَ که تصمیم گِرتی اَگَردِ خادمَلِ گُوژی تسویَه حِسُاو کِ. 24وخدی شروع کِردیَ حِسُاوکِتُو کِردِن، آیمیَ آاُوردِنَ لای که ده هزار قنطار وَاندازَه دَسمِزدِ دویس هزار سال یِ کارگر وَبینی بِدِکار بی. 25امّا چیکِ اَوَ نِمِتِنیستی قرضِ گُوژی بیئَهدُما، اَربابی دستور داتی، اَوَ وَگَردِ ژَن و اُویلَلی و گِشتِ مالِمِنالی بُفروشِن تا طلبی اَژِنی بِگِرِن. 26خادمَ جِلِ پا اَربابَ زُنی داتی وَالتماس فِتی: ”وَبینِم مِهلت بیئَه تا گِشتِ قرضِ گُوژِمَ بیَمَدُما.“ 27اِیندا دلِ اَربابَ اَرِ اَوَ سُوت و اَوَ آزاد کِردی و قَرضیَ بَشقیتی. 28امّا هریَکه خادمَ چیَ دَشت، یَکی اَژ هُمکارَلِ گُوژیَ دیتی که صد دینار وَاندازَه سه مُاو دَسمِزد وَبینی بِدِکار بی. اِیندا اَوَ گِرتی و چِنگ داتیَ تینیاِئی و فِتی: ”قَرضِتَ بیئَه دُما!“ 29هُمکاری جِلِ پای اَوَ زُنی داتی وَالتماس فِتی: ”وَبینِم مِهلت بیئَه تا گِشتِ قرضِ گُوژِمَ بیَمَدُما.“ 30امّا اَوَ قبول نَکِردی، بلکم چی و اَوَ آاُوشتیَ نُمِ زِندُون تا قرضِ گُوژیَ بیئَهدُما. 31وخدی که خادمَلِ تِرِك اِئی اتفاقَ دین، خیلی ناراحت بین و چِنَ لا اَربابِ گُوژِن و گِشتِ اِئی ماجرااَ اَرا اَوَ تِعریف کِردِن. 32اِیندا اَربابَ، اَ خادمَ هَنا کِردیَ لا گُوژ و فِتی: ”اِ خادم شَرَبار، مِ اَراخاطرِ اِئیکه لالِکین گِشتِ قَرضَلِتَ بَشقیم. 33آیا نَباس تونیژ اَگَردِ هُمکار گُوژِت رحمَ مَکِردین، هرَجورَ که مِ وَبینِت رحم کِردِم؟“ 34پس اَربابَ آگِر اَبینی چیتی، اَوَ آاُوشتی نُمِ زِندُون تا شکنجه بو و گِشتِ قرضِ گُوژیَ بیئَهدُما. 35هریجورَ اَگَر هُمِإیژ بِرا گُوژِتُونَ اَژ تَه دل نَبَشقینُون، بُاواِ آسِمُونی مِنیژ وَهر کُمَژ هُمَ هُنَ رفتارَ مِ.»
Currently Selected:
مَتّی 18: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
