مَتّی 14
14
کُشتِن یحیااِ تعمیددهندَه
1نُمِ اَ زمُونَ آوازَ عیسی وَگوشِ هیرودیسِ حاکم رَسی، 2و اَوَ فِتیَه خادمَلِ گُوژ: «یَ یحیااِ تعمیددهندِیَ. اَوَ اَژ مِردیَل زِنی بیئَه و اَرایَسَ که اِئی قدرتَلی که معجزِگرِن اَژ اَوَ دیارَ مُاو.»
3چیکِ هیرودیس اَراخاطرِ هیرودیا که ژَنِ بِرای فیلیپُس بی، یحیااَ گِرتیتی و اَوَ بَستیتی و آاُوشتیَ نُمِ زِندُون. 4چیکِ یحیی مِتیَ بینی: «شرعاً دُرُس نییَه تو اِئی ژَنَ بُوازین.» 5بااِئیکه هیرودیس مَگِستی یحیااَ بُکُشی، امّا اَژ مردم زَلَ مَچاتی، چیکِ مردم یحیااَ پیغمبر مَزِناستِن.
6امّا نُمِ روژِ جَشتِ وَدینیا یاهاتِنِ هیرودیس، دِتِ هیرودیا نُمِ مجلس بازی کِردی و جوری هیرودیسَ شاد کِردی 7که قَسَم هاردی هرچی بِخوای وَبینی بِ. 8دااِئی نیشتَ ژیرِ پا دِتی و دِتَ فِتی: «سر یحیااِ تعمیددهندَه اِیرَ نُمِ مَجمِاِئی بیئَه بینِم.» 9پاتشاه ناراحت بی، امّا اَراخاطرِ قَسَمِ گُوژی و حرمتِ میمُونَلی دستور داتی که بِنَ بینی، 10و آیمی رِ کِردی، سر یحیی نُمِ زِندُون بِری، 11و سری نُمِ مَجمَه آاُوردِن، دانَ دِتَ و اَوِیژ اَوَ بِردیَ لا دااِئی. 12شاگردَلِ یحیی یاهاتِن و لَشِ اَوَ بِردِن، خاکی کِردِنی و اِیندا چِن و خَوَر داتِنَ عیسی.
غذا داتِن وَپنج هزار نفر
13وخدی عیسی یَ شِنَفتی، سُواُرِ قایق بی، اَژ اُورَ چیَ جااِ دیرِ خلوتی. امّا مردم باخَوَر بین، اَژ شهرَلِ گُوژِن پا پیادَه چِنَ دُمی. 14هریَکه عیسی اَژ قایق یاهاتَ هار، جمیَتِ فِرِاِئی دیتی و دلی اَرا آنَ سُوت، مریضَلِنَ شفا داتی.
15نزیک ایوارَه، شاگردَلِ عیسی یاهاتِنَ لای و فِتِن: «اِیرَ جااِ پَرتیکَ، و دیر وخدیژَ. مردمَ رُاُونَه کَ تا بِچِنَ وِلِتَلِ دِرِوَر و اَرا گُوژِن چیئِی اَرا هاردِن بِخِرِن.» 16امّا عیسی فِتیَه آنَ: «نِمِتی مردم بِچِن. هُمَ گُوژِتُون غذا بیَنَ بینِن.» 17شاگردَلَ فِتِن: «اِیرَ چیئِی بِخِرِ پنج نُون و دو ماهی نِریمُون.» 18عیسی فِتی: «آنَلَ بارِنَ لا مِ.» 19اِیندا فِتیَه مردم تا بِنیشِنَر سر سِزَلَ. اِیندا پنج نُون و دو ماهیَ گِرتی و کَم آاُوتیَ آسِمُون، بِرَکت داتی. اِیندا نُونَلَ کُت کِردی و داتیَ شاگردَلَ و آنِإیژ دانَ مردم. 20گِشتِن هاردِن و سیر بین و اَژ هُوردَ نُونَلی که مَنتی، دُوازَه سَوَدِ پِر جمع کِردِن. 21کسَلی که هاردِن، بِخِرَژ ژَنَل و اُویلَل، پنج هزار پییا بی.
عیسی ری آاُو مَچواَ ری
22عیسی هرَلَزَ فِتیَه شاگردَلَ تا گُوژی مردمَ مِرخصَ مِ، سُواُرِ قایقَ بِن و وِرَژ اَوَ بِچِنَ اَکُنِ دریاچَه. 23عیسی بعد اَژ مِرخص کِردِنِ مردم، گُوژی چیَ سر کواُاِئی تا تَنااِئی دعا کِ. شِ بی وَعیسی اُورَ تَنا بی. 24اَ مِقَ، قایق اَژ لِ آاُو خیلی دیر بی و موجَلَ سخت مَاُوتِنَر قایقَ، چیکِ بادِ برعَسکَ مُهات. 25نزیک سات سه نِصمِ شِ، هُنَ که عیسی ری آاُواَ ریَ مَچا، یاهاتَ لا آنَ. 26وخدی شاگردَلَ اَوَ دین که ریِ آاُواَ مَچواَ ری، زَلَتَراقَ بین، و داد کیشان، فِتِن: «یَ یِ روحَ». 27امّا عیسی هرَلَزَ فِتیَه بینِن: «دلِتُون قُرص بو. یَ مِنِم، زَلَتُون نَچو!»
28پطرس جواُو داتی: «اِ آقا، اَگَر تونین، دستور بِاَ مِ تا ری آاُو بامَ لا تو.» 29عیسی فِتی: «بو!» اِیندا پطرس اَژ قایقَ یاهاتَ دَشت و ری آاُو کَتَ ری چیَ لا عیسی. 30امّا وخدی هوفَ بادَ دیتی، زَلَ چیتی و هُنَ که داشتی غرقَ میا، داد کیشاتی: «اِ آقا، نجاتِم بیئَه!» 31عیسی هرَلَزَ دَسِ گُوژیَ دیریژ کِردی و اَوَ گِرتی و فِتی: «اِ کَم ایمُون، اَراچَ شِک کِردین؟» 32وخدی یاهاتِنَ نُمِ قایق، بادَ نیشتی. 33اِیندا آیمَلی که نُمِ قایق بین عیسااَ پَرَسین، فِتِن: «واقیَن که تو کُرِ خدائین!»
شفا مریضَل نُمِ جِنیسارِت
34اِیندا وخدی رَسینَ اَکُنِ آاُواَ، چِنَ نُمِ سرزمین جِنیسارِت. 35مردم اُورَ عیسااَ شناختِن و آیمَلی رِ کِردِنَ نُمِ گِشتِ اَ سرزمین، مریضَلَ آاُوردِنَ لای. 36آنَ مَلالِکانَ عیسی که اجازَه بِ تا فَقَد دَس بِنِنَ قِ گوشه عبائی و هر که دَس مَناتیَ قِئِی، شفااَ مَگِرتی.
Currently Selected:
مَتّی 14: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
