مَتّی 11
11
قِصَلِ عیسی دربارَه یحیااِ تعمیددهندَه
1بعد اَژ اِئیکه عیسی اِئی دستورَلَ وَدُوازَه شاگردِ گُوژی داتی، اَژ اُورَ چی تا نُمِ شهرَلِ آنَ تعلیم بِ و موعظَه کِ.
2وخدی یحیی نُمِ زِندُون، تِعریفِ کارَلِ مسیحَ شِنَفتی، شاگردَلِ گُوژیَ رِ کِردیَ لا اَوَ 3تا بِپِرسِن: «آیا تو هر اَوِینَ که با بای، یا کَمَری یَکی تِرِك بِإیمُون؟» 4عیسی جواُو داتی: «بِچِن و اَچیکِ مِإینینُون و مَشنِإینُون بوشِنَ یحیی، که 5کورَل مِإینِن، شَلَل ریَ مَچِن، جذامیَل شفااَ مَگِرِن، کَرَل مَشنِن، مِردیَل زِنیَ مِن و خَوَرِ خوش پاتشاهی خداوندَ اعلومَ مُاواَ فقیرَل. 6خَشالَ کسی که وَبینِم شِک نَکِ.»
7مِقِاِئیکه شاگردَلِ یحیی مَچان، عیسی شروع کِردیَ قِصَ کِردِن دربارَه یحیی و فِتیَه مردم: «اَرا دیدَنیِ چَ چینُونَ بیُااُون؟ اَرا دیدَنیِ نِإی که وَباد تَکُونَ میری؟ 8اَگَر نَه، پس اَرا دیدَنیِ چَ چینُون؟ اَرا دیدَنیِ پییائی که کِراسِ نَرمی وَری بیتی؟ آنَ که کِراسَلِ نَرم مَکَنَ وَر هانَ نُمِ کاخَلِ پاتشاهَل. 9پس اَرا دیدَنیِ چَ چینُون؟ اَرا دیدَنیِ پیغمبری؟ اَرِ، وَبینِتُونَ موشِم کسی که اَژ یِ پیغمبریژ سرتِرَ. 10چیکِ اَوَ هرَ کسی کَ که دربارِاِئی نُمِ کِتُواِ مَلاکی پیغمبر نیسایَ:
”اِسگَ مِ رسولِ گُوژِمَ وِرَژ تو رِاَ مَم،
که اَوَ ریتَ وِرَژ تو آمادَه مِ.“
11حقیقتاً، وَهُمَ موشِم، که کَلِنگتِرَژ یحیااِ تعمیددهندَه اَژ دای ناهاتییَسَ دینیا، بااِئیحال هُوردِلَتِرین نُمِ پاتشاهیِ آسِمُون اَژِنی کَلِنگتِرَ. 12اَژ زمُونِ یحیااِ تعمیددهندَه تا اَلُون، پاتشاهی آسِمُون آزار و اَذیَتَلِ فِرِاِئی دیِسی و آیمَل زورگو اَوَ وَزورَ مَگِرِنی. 13چیکِ گِشتِ پیغمبرَل و تورات تا زمُونِ یحیی، اَژ چیَلی که با بو خَوَر دان. 14و اَگَر بِخواین قبول کِإینُون، یحیی هرَ ایلیا پیغمبرَ که با بای. 15هر که گوش اَرا شِنَفتِن دیری، بِشنِ.
16مِ اِئی نسلَ مِثادِ چَ بوشِم؟ آنَ مِثادِ اُویلَلی کِن که مَنیشِنَ نُمِ بازار و هَنااَ مَنَ هُمبازیَلِ گُوژِن و موشِن.
17”اَرا هُمَ نِإ ژَنتیمُون،
بازی نَکِردینُون؛
لُواُونیمُون، نَگیراینُون.“
18چیکِ یحیی یاهات که نَه مُهاردی و نَه هُرتَماتی؛ موشِن: ”دیو دیری.“ 19کُرِ انسُون یاهات که هَم میری و هَم هُرتَمِ؛ موشِن: ”نگاه کِنی پییائی کَ لَمِن و یِسرَه مَسَ، دوسِ خراجگیرَل و گناهکارَلَ.“ امّا دُرُسی حکمت وَثمره کارَلی ثابتَ مُاو.»
هِرو اَرِ شهرَلی که تواَ نِمَکَن
20اِیندا عیسی شروع کِردی وَسرزنش کِردِن شهرَلی که بیشتِرِ معجزَلی نُمِ آنَ انجوم داتیبی، چیکِ تواَ نَکِردیبین. 21«هِرو اَرِنِت، اِ شهر خورَزین! هِرو اَرِنِت، اِ شهر بِیتصِیْدا! چیکِ اَگَر معجزَلی که نُمِ هُمَ انجوم بی، نُمِ شهرَلِ صور و صیدون انجومَ میا، مردم اُورَ خیلی زیتِرَژ یَ، پَلاس کِردیبینَ وَرِن و نُمِ هَری تواَ کِردیبین. 22امّا وَبینِتُونَ موشِم که نُمِ روژِ داوری، تحمل مِجازات اَرا صور و صیدون آسُونتِرَ مُاو، تا اَرا هُمَ. 23و تو اِ شهر کَفَرناحوم، یعنی سرتَ تا فلک میَرینَ ری؟هرگِس، بلکم تا تَه جَندِم سرنگونَ مِإین. چیکِ اَگَر معجزَلی که نُمِ تو انجوم بیئَه نُمِ سُدوم انجومَ میا، تا اِیمِرو مَمَنتَ جا. 24امّا وَبینِتُونَ موشِم که نُمِ روژِ داوری، تحمل مِجازات اَرا سُدوم آسُونتِرَ مُاو، تا اَرا تو.»
بورِنَ لا مِ
25نُمِ اَ وخدَ، عیسی فِتی: «اِ بُاواَ، خداوند آسِمُون و زمین، شکرِتَ مَم که اِئی چیَلَ اَژ حکیمَل و آیمَلِ دُونا پنهُون کِردینَ و اَرا اُویلَلِ هُوردِلَ آشکار کِردینَ. 26اَرِ، اِ بُاواَ، چیکِ خواسِ پِرَژ فیضِت یَ بی. 27بُاواَم گِشتِ چی وَبینِم سِپاردِسی. هیشکس کُرَ نِمَشناسی بِخِرَژ بُاواَ، هیشکس بُاواَ نِمَشناسی بِخِرَژ کُر و هر که کُر بِخوای، بُاواَ وَبینی آشکارَ مِ.
28بورِنَ لا مِ، اِ گِشتِ کسَلی که نُمِ زحمَتینُون و بارَلِ سنگینی هُاواَ کولِتُون، مِ آسایشَ مِمَ بینِتُون. 29دارُبَرگ مِ بُاوژِنَ مِلِتُون و اَژ مِ تعلیم بِگِرِن، چیکِ ملایم و فروتَنِم، و نُمِ گُونِتُون آسایش پیا مَکِإینُون. 30چیکِ دارُبَرگ مِ آسُونَ و بارِم سِئِکَ.»
Currently Selected:
مَتّی 11: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
