OMAPSALOME 139
139
Omwene omushiivi waaishe nomukali waapeshe
Epsalome laDavid, la pewa enyakwa lolwiimbo.
1Omwene, Oove to konakona nge, ndele to koneke nge;
2nande ndi li omutumba, ile nda fikama, owe shi shiiva;
omadiladilo ange ou a uditile kokule;
3nande ohandi ende, ile nda nangala, ou shi wete;
neendjila dange adishe ou di shii;
4osheshi fimbo etumbulo inali uya kelaka lange,
Omwene, Ove we li koneka.
5Konima nokomesho owa dingilila nge,
neke loye owe li tenheka nge.
6Eshiivo eli, olo oixuna kwaame,
ola nyengana, itandi dulu oku li hanga.
7Omhepo yoye, ohandi i henukile peni?
Noshipala shoye ohandi shi i onhapo peni?
8Ngeno ondi londe keulu, oko u li,
nongeno ndi ka nangale moshovafi, naamo omo u li,
9ngeno ondi kufe omavava eluwa,
ndi vilole komeva efuta fiyo okexulilo lao,
oko ndi ka wile,
10naako, ngeno eke loye otali endifile nge ko,
nolulyo loye otali kwata nge;
11nonande ngeno ondi tye:
Omulaulu wa laula fokofoko, nau tuvike nge,
nouyelele ou u li pwaame, nau shituke omulaulu,
12hano opo nomulaulu inau laula pwoove,
noufiku ngeno tau ku minikile ngaashi omutenya;
nomulaulu ngeno kwoove ouyelele.
13Osheshi Oove ou omushiti weefiyo dange,
owa dutila nge medimo lameme.
14Ohandi ku pandula, eshi nda tungwa nda tungikika;
oilonga yoye oya longekeka,
nomwenyo wange otau shi shiiva nawa.
15Oukipa vange kava li ve ku holekwa,
eshi nda mewa meholeko,
onda mewa moule wedu nounyakwa.
16Omesho oye okwa li taa shipununa nge,
fimbo nda li engwili inandi tongoka,
nomembo loye omo omwa nyolelwa
omafiku ange aeshe, aa nda sheyelwa,
fimbo inapa holoka nande limwe lao.
17Ndelenee kwaame, oidiladilwa yoye, Kalunga,
oinyenga, shi fike peni!
Oitulwakumwe yayo aishe, oihapu unenenene!
18Ngeno ondi hetekele oku i vala:
omuvalu wayo, ou dule womawe ehekedu;
ngeenge handi penduka, natango opo ndi li pwoove.
19Akutu, Kalunga ngeno u dipae ovakolokoshi,
Ove u kandule pwaame ovakauli vonyanga,
20ava have ku lundakanene nai,
nedina loye otave li tumbulile mowii.
21Ava ovatondi voye, havo nandi tonde yo?
Ame mbela ndiha nyonyodolifwe kovakondjifi voye?
22Ohandi va tondo noutondwe wefyo;
ondi wete, ovo ovatondi vange.
23Kalunga, konakone nge,
u koneke omutima wange!
Yeleke nge, u dilakane omadiladilo ange,
24opo u mone, ngeenge ondi li mondjila yepukifo,
Ove u endife nge mondjila,
ei tai twala moukwaalushe.
Currently Selected:
OMAPSALOME 139: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
