2 EEHAMBA 16
16
Ahas ohamba yaJuda
1Momudo omutimulongo nomutiheyali waPeka yaRemalja, Ahas yaJotam a ninga ohamba yaJuda. 2Omido daAhas da li omilongo mbali, ye eshi a ninga ohamba, nokwa pangela omido omulongo nahamano muJerusalem, ndele ina ninga osho sha yuka momesho Omwene Kalunga kaye, ngaashi xe David, 3ndelenee okwa enda nondjila yeehamba daIsrael. Heeno, ye mwene okwa endifila omona waye momundilo paififahoni yoiwana oyo Omwene e i taataa komesho yaIsrael. 4Nokwa twimina yo koikulundu nokomitune nopomuti keshe mutalala.
5Opo nee Resin, ohamba yaAram, naPeka yaRemalja, ohamba yaIsrael, da ya kuJerusalem di ka lwe, Ndele da fitikinina Ahas. Ndelenee da nyengwa oku shi nangala. 6Pomafiku tuu enya Resin, ohamba yaAram, ya alulila Aram Elat, ndele ya taataa mo Ovajuda muElat, nOvaedom ve uya muElat eshi omo va kala fiyo onena eli. 7Opo nee Ahas ta tumu ovatumwa kuTiglat-Pileser, ohamba yaAsiria va tye: “Aame omupiya woye nomumwoye. Ila u mangulule nge momake ohamba yaAram nomomake ohamba yaIsrael, odo tadi lwifa nge.” 8Ndele Ahas okwa kufa oshisiliveli noshingoldo osho sha monika mongulu yOmwene nomomalimba emona ongulu yohamba, ndele e shi tuma omulongelo kohamba yaAsiria. 9Nohamba yaAsiria ye mu uda. Nohamba yaAsiria ya ya kuDamaskus ndele ye shi nangala ndele ye va twala moukwatwa kuKir, ndele ya dipaa Resin.
10Opo nee Ahas a ya kuDamaskus a ka shakene naTiglat-Pileser, ohamba yaAsiria. Ndele eshi a mona oaltari ya li muDamaskus, ohamba Ahas ya tuma kuUria, omupristeli, efano noshihongwafano shoaltari pakuyeleka kwayo. 11Nomupristeli Uria okwa tunga oaltari naanaa palombwelo lohamba Ahas yokuDamaskus. Osho ngaha omupristeli Uria a ninga, fimbo Ahas ina aluka kuDamaskus. 12Nohamba eshi ya dja kuDamaskus ndele tai mono oaltari, yo ya ehena popepi noaltari ndele tai londo kuyo. 13Ndele ya xwikila po exwikiloyambo layo neendjayambo dayo ndele ya tila ko epanduloyambo layo, nohonde yomapanduloyambo ayo vene ye i tila koaltari. 14Ndelenee oaltari yoshikushu, oyo ya li koshipala shOmwene, yo ye i lundulula po kombinga yokomesho yongulu, pokati koaltari yayo nongulu yOmwene, ndele ye i tula kombinga yokoumbangalanhu woaltari yayo. 15Nohamba Ahas ya lombwela omupristeli Uria ndele tai ti: “Xwikila moaltari inene exwikiloyambo longula neendjayambo donguloshi nexwikiloyambo lohamba neendjayambo dayo nexwikiloyambo loshiwana ashishe shoshilongo neendjayambo dasho, noikunwayambo yasho. Nohonde aishe yomatomenoyambo i tila kusho. Ndelenee handi ka diladila nhumbi oaltari yoshikushu tai ka ningwa.” 16Nomupristeli Uria osho a ninga ngaashi ohamba Ahas ye mu lombwela. 17Nohamba Ahas ya tetifa eembinga doweendifotemba voshikushu ndele ya kufa muwo eembalisha. Nefuta yo ye li yelulifa po keengobe doshikushu da li koshi yalo, ndele ye li tula kolupanda lomamanya. 18Epandavanda lefiku lEshabata la li li nonduda, lo la ningwa potembeli, noshivelo shopondje sha dikilwa ohamba, yo ye shi ehenifa ko kule ongulu yOmwene omolwohamba yaAsiria. 19Noinima imwe tai hepaulula Ahas, oyo e i ninga, inai shangelwa mbela membo lomafimbo eehamba daJuda? 20Ndele Ahas okwa ka nangala pooxe nokwa pakwa pooxe moshilando shaDavid, nomona waye Hiskia a ninga ohamba ponhele yaye.
Currently Selected:
2 EEHAMBA 16: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
