2 EEHAMBA 15
15
Asaria ohamba yaJuda
1Momudo omutimilongo mbali nomutiheyali waJerobeam, ohamba yaIsrael, Asaria yaAmasia, ohamba yaJuda, a ninga ohamba. 2Omido daye da li omulongo nahamano eshi a ninga ohamba, ndele a pangela omido omilongo nhano nambali muJerusalem. Edina laina la li Jekolia wokuJerusalem. 3Nokwa ninga osho sha yuka momesho Omwene, naanaa ngaashi xe Amasia a ninga. 4Ndelenee oikulundu yokuyambela ine i hanauna po. Ovanhu va yamba nokutwimina natango koikulundu. 5NOmwene okwa denga ohamba, onghee yo ya li omunashilundu fiyo okefiku lefyo layo. Yo ya kala mongulu ye likalela, fimbo Jotam, omona wohamba a pangela eumbo lohamba ndele a tokola eendjovo dovanhu vomoshilongo. 6Noinima imwe tai hepaulula Asaria naaishe e i ninga, inai shangelwa mbela membo lomafimbo eehamba daJuda? 7Ndele Asaria okwa ka nangala pooxe nokwa pakwa pooxe moshilando shaDavid. Nomona waye Jotam okwa ninga ohamba ponhele yaye.
Sakaria, ohamba yaIsrael
8Momudo omutimilongo nhatu nomutihetatu waAsaria, ohamba yaJuda, Sakaria yaJerobeam a ninga ohamba yaIsrael muSamaria. Nokwa pangela eehani hamano. 9Nokwa ninga osho inashi yuka momesho Omwene, ngaashi ooxe va ninga. Ye ina kanduka mo momatimba aJerobeam yaNebat, ou a hongaula Israel okunyona. 10Ndele Sallum yaJabes naava va li puye ve mu hangakena ndele ve mu dipaa muJibleam. Nokwa ninga ohamba ponhele yaye. 11Noinima imwe tai hepaulula Sakaria, tala, yoo oya shangelwa membo lomafimbo eehamba daIsrael. 12Osho ngaha ondjovo oyo yOmwene e i lombwela Jehu, oya twa, nokutya: “Ovana voye ovamati tava ka kala omutumba kolukalwapangelo laIsrael fiyo okepupi etine.” Nosho sha ningwa.
Sallum
13Sallum yaJabes okwa ninga ohamba nokwa pangela ohani imwe muSamaria momudo omutimilongo nhatu nomutimugoi waUssia, ohamba yaJuda. 14Opo nee Menahem yaGadi wokuTirsa, a fikama nokwe ya kuSamaria, ndele okwa dipaa Sallum yaJabes muSamaria, nokwa ninga ohamba ponhele yaye. 15Noinima imwe tai hepaulula Sallum nehangakeno lavo, tala, yo oya shangelwa membo lomafimbo eehamba daIsrael. 16Opo nee Menahem a hanauna po Tifsak naaveshe va kala mo, nosho yo oshitukulwalongo shasho okudja kuTirsa. Shaashi inave mu yeululila oshivelo. Okwe shi hanauna po, nokwa tandifa ovafimba aveshe.
Menahem
17Momudo omutimilongo nhatu nomutimugoi waAsaria, ohamba yaJuda, Menahem yaGadi a ninga ohamba yaIsrael muSamaria. Nokwa pangela omido omulongo. 18Ndele ye okwa ninga osho inashi yuka momesho Omwene, ndele pomafiku aeshe aye ina kanduka mo momatimba aJerobeam yaNebat, ou a hongaula Israel okunyona. 19Pul, ohamba yaAsiria, okwa homona oshilongo, ndele Menahem okwa yandja kuPul eekilograma omayovi omilongo nhatu nomayovi ane doisiliveli, opo ye e mu kwafe nokupameka epangelo momake aye. 20Ndele Menahem okwa kufa oimaliwa koipuna aishe yomuIsrael, opo e i yandje kohamba yaAsiria: omulumenhu keshe okwa li e nokufuta eesekeli omilongo nhano doisiliveli. Opo nee ohamba yaAsiria ya shuna ndele inai kala vali moshilongo. 21Noinima imwe tai hepaulula Menahem naaishe ye i ninga, inai shangelwa mbela membo lomafimbo eehamba daIsrael? 22Ndele Menahem okwa ka nangala pooxe, nomona waye Pekahja okwa ninga ohamba ponhele yaye.
Pekahja
23Momudo omutimilongo nhano waAsaria, ohamba yaJuda, Pekahja yaMenahem, okwa ninga ohamba yaIsrael muSamaria. Nokwa pangela omido mbali. 24Ndele ye okwa ninga osho inashi yuka momesho Omwene. Ye ina kanduka mo momatimba aJerobeam yaNebat, ou a hongaula Israel okunyona. 25Ndele Peka yaRemalja, elenga laPekahja, pamwe naArgob naArie, ve mu hangakena ndele ve mu dipaa muSamaria mohotengulu yohamba. NOvalumenhu omilongo nhano vomovana vOvagilead va li pamwe naye. Nokwe mu dipaa, ndele a ninga ohamba ponhele yaye. 26Noinima imwe tai hepaulula Pekahja naaishe e i ninga, tala, yoo oya shangelwa membo lomafimbo eehamba daIsrael.
Peka ohamba yaIsrael
27Momudo omutimilongo nhano nomutivali waAsaria, ohamba yaJuda, Peka yaRemalja, okwa ninga ohamba yaIsrael muSamaria. Nokwa pangela omido omilongo mbali. 28Nokwa ninga osho inashi yuka momesho Omwene, ina kanduka mo momatimba aJerobeam yaNebat, ou a hongaula Israel okunyona. 29Pomafiku enya aPeka, ohamba yaIsrael, Tiglat-Pileser, ohamba yOvaasiria, ye uya ndele tai nangala Ijon naAbel-Bet-Maaka naJanoak naKedes naHasor naGilead naGalilea, oshilongo ashishe shaNaftali. Ndele yo ye va twala moukwatwa kuAsiria. 30Ndele Hosea yaEla naavo va li puye va hangakena Peka yaRemalja ndele ve mu dipaa, nokwa ninga ohamba ponhele yaye momudo omutimilongo mbali waJotam yaUssia. 31Noinima imwe tai hepaulula Peka naaishe e i ninga, tala, yoo oya shangelwa membo lomafimbo eehamba daIsrael.
Jotam ohamba yaJuda
32Momudo omutivali waPeka yaRemalja, ohamba yaIsrael, Jotam yaUssia, ohamba yaJuda, okwa ninga ohamba. 33Omido daye da li omilongo mbali nanhano, eshi a ninga ohamba, nokwa pangela omido omulongo nahamano muJerusalem. Edina laina la li Jerusa, omona waSadok. 34Nokwa ninga eshi sha yuka momesho Omwene, ngaashi xe Ussia a ninga. 35Ashike oikulundu yokuyambela ine i hanauna po. Ovanhu va yamba natango nokutwimina koikulundu. Oye a tunga oshivelo shoketumbo ledu shongulu yOmwene. 36Noinima imwe tai hepaulula Jotam naaishe e i ninga, inai shangelwa mbela membo lomafimbo eehamba daJuda? 37Pomafiku enya Omwene okwa hovela okupendula Resin, ohamba yaAram, naPeka yaRemalja, va homone Juda. 38Ndele Jotam okwa ka nangala pooxe nokwa pakwa pooxe moshilando shaDavid. Nomona waye Ahas okwa ninga ohamba ponhele yaye.
Currently Selected:
2 EEHAMBA 15: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
