2 EEHAMBA 17
17
Hosea ohamba yaxuuninwa yaIsrael
1Momudo omutimulongo nambali waAhas, ohamba yaJuda, Hosea yaEla a ninga ohamba yaIsrael muSamaria. Nokwa pangela omido omugoi. 2Ndele ye a ninga osho inashi yuka momesho Omwene. Ndelenee hangaashi eehamba daIsrael de mu tetekelela. 3Salmaneser, ohamba yaAsiria, ye mu homona ndele Hosea a ninga omupiya wayo nokwe i pa oifendela. 4Ndelenee ohamba yaAsiria ya dimbulukwa ehangakeno laHosea novanhu vaye, nokutya ye a tuma ovatumwa kuSo, ohamba yaEgipiti, ndele ina yandja vali oifendela yomido nomido kohamba yaAsiria. Onghee hano ohamba yaAsiria ye mu kwata ndele ye mu idilila modolongo, a mangwa. 5Nohamba yaAsiria ya homona oshilongo ashishe ndele ya homona Samaria ndele tai shi kondeke omido nhatu.
Omapata omulongo taa i moupongekwa
6Momudo omutimugoi waHosea, ohamba yaAsiria ya nangala Samaria, ndele ya twala Israel moukwatwa kuAsiria. Ndele ye va tula muHalag nopuHabor omulonga womuGosan, nomoilando yomuMedia. 7Osheshi ovana vaIsrael va nyona kOmwene Kalunga kavo, ou e va pitifa mo medu laEgipiti mepangelo laFarao, ohamba yaEgipiti. Ndele vo ova tila oikalunga imwe. 8Ndele va enda paenghedimhango doiwana inya Omwene e i taataa komesho yovana vaIsrael, ndele va ninga ngaashi eehamba daIsrael. 9Novana vaIsrael va ninga meholeko osho inashi yuka koshipala shOmwene, Kalunga kavo. Ndele ve litungila oikulundu yeealtari moilando yavo aishe peeshungo dokunangela nomoilando i nohotekuma. 10Ndele ve lidikila eengudi domamanya nomalupwelele aAsera koshikulundu keshe shile nopomuti keshe mutalala. 11Ndele oko va twimina, koikulundu aishe, ngaashi oiwana inya Omwene ei taataa komesho yavo. Ndele ova ninga oinima inai yuka, va handukifa Omwene. 12Ndele va longela oikalunga oyo molwayo Omwene e va lombwelele: “Inamu shi ninga nande!” 13NOmwene okwa londwela Israel naJuda nomuxunganeki keshe nonomumonikokule keshe, ndele ta ti: “Lialulukeni keendjila deni inadi yuka, ndele diinineni oipango yange, neenghedimhango dange, pamhango oyo nde i pa ooxo, nayo nde i mu lombwelifa kovapiya vange, ovaxunganeki, ovo nde mu tumina.” 14Ndelenee inava pwilikina ndele va kukutika eefingo davo, ngaashi eefingo dooxe ovo inave lineekela Omwene Kalunga kavo. 15Ndele va ekelashi eenghedimhango daye nehangano laye, Ye e li ninga nooxe, neendobwedi nado Ye e va londwela, ndele va shikula oikalunga yongaho ndele voovene yo va ninga vongaho. Ndele va shikula oiwana tai va dingilile, molwayo Omwene e va lombwelele, vaha ninge ngaashi inya. 16Ndele va efa oipango aishe yOmwene Kalunga kavo, ndele ve li ningila omafano a telekwa, eenhana mbali doshivela, heeno, nolupwelele laAsera ve li ningila, ndele ve linyongamena keengudu adishe dokeulu nokulongela Baal. 17Ndele va endifila momundilo ovana vavo ovamati noukadona, ndele va li noundudu ndele va fatulula omadidiliko ndele ve lilandifa po mokuninga osho inashi yuka momesho Omwene, opo ve mu handukifa.
18Onghee hano Omwene okwa handukila shili Ovaisraeli, ndele e va ekelashi koshipala shaye. Inapa fyaala nande osha, epata laJuda olo alike. 19Ndele Ovajuda yo inava diinina oipango yOmwene Kalunga kavo, ndelenee va enda peenghedimhango daIsrael, vo ve di ninga. 20Onghee hano Omwene okwa ekelashi oludalo alishe laIsrael, ndele ye e va ninipika nokwe va yandja momake ovanyeki fiyo e va ekelashi koshipala shaye. 21Osheshi okwa taula Israel meumbo laDavid, ndele Ovaisraeli va ninga Jerobeam yaNebat ohamba yavo. Ndele Jerobeam okwe liteekifa Israel mOmwene nokwe shi hongaula okunyona unene. 22Novana vaIsrael va enda momatimba aeshe aa Jerobeam a ninga. Vo inava kanduka mo mwoo, 23fiyo Omwene okwa ekelashi Ovaisraeli koshipala shaye, ngaashi a popya nomakanya ovapiya vaye aveshe ovaxunganeki. NOvaisraeli va kufwa moshilongo shavo, va twalwa moukwatwa kOvaasiria fiyo onena eli.
Oshilongo shaIsrael tashi nangalwa kovafimaneki voikalunga
24Nohamba yaAsiria ya tembula mo ovanhu muBabilon nomuKuta nomuAvva nomuHamat nomuSefarvaim, ndele ye va tuma moilando yaSamaria, ponhele yovana vaIsrael. Vo ova nangala Samaria ndele va tula momikunda dasho. 25Ndele ovo va tula mo, eshi inava tila Omwene, Omwene a tuma eenghoshi mokati kavo, odo da dipaa po vamwe vomuvo. 26Opo nee va lombwela ohamba yaAsiria: “Oiwana oyo we i tembula ndele we i tula momikunda domuSamaria, inai shiiva eenghedi dokulongela Kalunga koshilongo osho. Onghee Ye a tuma eenghoshi mokati kavo, ndele tala, do otadi i dipaa shaashi inai shiiva eenghedi dokulongela Kalunga koshilongo.” 27Opo nee ohamba yaAsiria ya yandja ondaka tai ti: “Tumeni ko umwe womovapristeli venya mwe va kufa mo muSamaria, opo venya va dule okukala mo ndele tava longwa eenghedi dokulongela Kalunga koshilongo.” 28Ndele umwe womovapristeli venya va kufwa mo muSamaria, e uya nokwa tula muBetel, ndele e va longa nhumbi ve nokutila Omwene. 29Ndelenee venya vomoshiwana keshe, ve li ningila oikalunga yavo vene ndele ve i tula meetembeli davo domoikulundu, odo Ovasamaria va tunga. Keshe oshiwana shomoshilando shasho musho sha kala: 30Ovalumenhu vokuBabilon va ninga Sukkot-Benot; novalumenhu vokuKut va ninga Nergal; novalumenhu vokuHamat va ninga Asima, 31nOvaavi va ninga Nibhas naTartak, nOvasefarvaim va xwika ovana vavo ovamati, ve va xwikila Adrammelek naAnammelek, oikalunga yaSefarvaim. 32Vo ova tila yo Omwene ndele ve lihoololela mokati kavo ovapristeli voikulundu, va yakule meetembeli dokoikulundu. 33Vo ova tila Omwene ndelenee va longela yo oikalunga yavo vene paenghedi doiwana muyo va kufwa mo.
34Fiyo nena ohava longo panghedi yoshito: Ihava tila Omwene, ndele ihava longo paenghedimhango davo ile paenghedi davo ile pamhango yavo ile pashipango osho Omwene e shi yandja kovana vaJakob, ou Ye a luka Israel. 35Ndelenee Omwene okwa ninga ehangano navo ndele e va lombwela, ta ti: “Inamu li ningila oikalunga imwe ile okulinyongamena kuyo ile oku i longela ile oku i yambela, 36ndelenee nava tile Omwene, ou e va pitifa medu laEgipiti neenghono dinene nokwooko kwa yeluka ndele ve linyongamene kuye noku mu yambela. 37Neenghedimhango nomalombwelo nomhango, oyo Ye e va shangela, ve noku i diinina shili alushe, ndelenee vaha tile oikalunga imwe. 38Ndele ehangano Ame nda ninga nanye, inamu li dimbwa, ndele inamu tila oikalunga imwe. 39Ndelenee Omwene Kalunga keni mu nokutila, ndele Ye ote mu xupifa mo momake ovatondadi veni.” 40Ndele vo inava uda ko, ndelenee va longa panghedi yavo yonale. 41Osho ngaha hano oiwana oyo ya tila Omwene ndelenee va longela yo oihongwafano yayo. Nosho yo ovana vavo novatekulu vavo va ninga, ngaashi ooxe, fiyo onena eli.
Currently Selected:
2 EEHAMBA 17: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
