2 EEHAMBA 14
14
Amasia ohamba yaJuda Joas ohamba yaIsrael
1Momudo omutivali waJoas yaJoahas, ohamba yaIsrael, Amasia yaJoas, ohamba yaJuda, a ninga ohamba. 2Omido daye da li omilongo mbali nanhano, ye eshi a ninga ohamba. Nokwa pangela omido omilongo mbali nomugoi muJerusalem. Nedina laina la li Joaddan wokuJerusalem. 3Nokwa ninga osho sha yuka momesho Omwene, ndelenee hangaashi xe David. Ndelenee ngaashi xe Joas a ninga, osho yo ye a ninga. 4Ashike oikulundu yokuyambela inai efuwa. Ovanhu va yamba ndele tava twimine natango koikulundu. 5Ndelenee eshi epangelo la pamekwa momake aye, okwa dipaa ovapiya vaye, ovadipai vaxe, ohamba. 6Ndelenee ina dipaa ovana vovadipai, ngaashi pa shangwa momhango yaMoses, omo Omwene ta ti: “Ooxe itava ka fila ovana vavo, novana itava ka fila ooxe. Ndelenee keshe umwe ota file etimba laye mwene.” 7Ye okwa finda Ovaedom mEfilu lomongwa, ovalumenhu omayovi omulongo nokwa finda Sela molwoodi nokwe shi luka Jokteel, fiyo onena eli.
8Opo nee Amasia a tuma ovatumwa kuJoas yaJoahas yaJehu, ohamba yaIsrael, va tye: “Ila, tu lwe!” 9Ndelenee Joas, ohamba yaIsrael, ya shiivifila Amasia, ohamba yaJuda, tai ti: “Oshiyoosheuta shomuLibanon sha lombwela omusederi womuLibanon: ‘Omona woye okakadona, mu pa omumwange omumati, winya a ninge omwalikadi waye!’ Ndelenee oifitukuti i li muLibanon oya lyataula oshiyoosheuta mokweenda po kwayo. 10Amasia, eshi wa finda Ovaedom, osho nee to linenepekele! Ame ohandi ku kunghilile u kale wa mwena meumbo. Omolwashike wa hala okweeta oudjuu, ove u kokele ovanhu naave mwene momupya?”
11Ndelenee Amasia ina pwilikina odo. Opo nee Joas, ohamba yaIsrael ya fikama. Ndele Amasia, ohamba yaJuda naainya, da shakena muBet-Semes shomuJuda. 12Ndelenee Ovajuda va tewa kOvaisraeli, ndele va ya onhapo, keshe umwe keumbo laye. 13Ndele Joas, ohamba yaIsrael, oya kwata onghwate Amasia yaJoas yaAhasia, ohamba yaJuda, puBet-Semes. Nokwe uya kuJerusalem, ndele a ngumauna po ohotekuma yaJerusalem oule wayo oshinano shi fike pomaludimbo omafele ane, okudja koshivelo shaEfraim fiyo okOshivelo shokolonela. 14Nokwa kufa oshingoldo ashishe noshisiliveli noinima aishe ya monika mongulu yOmwene nomomalimba emona longulu yohamba neenghwate yo, ndele ta shuna kuSamaria.
15Noinima imwe tai hepaulula Joas, naaishe e i ninga, noilonga yaye yeenghono, nonhumbi a lwifa Amasia, ohamba yaJuda, inai shangelwa mbela membo lomafimbo eehamba daIsrael? 16Ndele Joas okwa ka nangala pooxe nokwa pakwa muSamaria peehamba daIsrael. Nomona waye omumati Jerobeam a ninga ohamba ponhele yaye.
17Ndele Amasia yaJoas, ohamba yaJuda, okwa kala nomwenyo konima yefyo laJoas yaJoahas, ohamba yaIsrael, omido 15. 18Noinima imwe ei tai hepaulula Amasia, inai shangelwa mbela membo lomafimbo eehamba daJuda? 19Ndele venya ve mu hangakena muJerusalem, onghee ye a ya onhapo kuLakis. Ndelenee va tuma ovalumenhu kuLakis ndele ve mu dipaela ko. 20Ndele oshimhu shaye ve shi londeka konghambe nove shi shunifa kuJerusalem; ndele okwa pakwa meembila deehamba moshilando shaDavid. 21Novanhu aveshe vaJuda va kufa Asaria, omido daye da li pefimbo olo, omido omulongo nahamano, ndele ve mu ninga ohamba ponhele yaxe Amasia. 22Ye okwa pameka Elat nohotekuma nokwe shi alula kuJuda, ohamba eshi ya ka nangala pooxe.
Jerobeam omutivali ohamba yaIsrael
23Momudo omutimulongo nomutitano waAmasia yaJoas, ohamba yaJuda, Jerobeam yaJoas, ohamba yaIsrael, a ninga ohamba muSamaria. Nokwa pangela omido omilongo nhee naimwe. 24Ndele ye okwa ninga osho inashi yuka momesho Omwene, ina kanduka mo momatimba aeshe aJerobeam yaNebat, ou a hongaula Israel okunyona. 25Ye okwa alula oshitukulwalongo shaIsrael okudja komhito yokuya kuHamat fiyo okEfuta loluhaela, pandjovo yOmwene, Ye e i lombwela omupiya waye Jona yaAmittai, omuxunganeki wokuGat-Hefer. 26Osheshi Omwene a mona oluhepo linene nolilula laIsrael, nhumbi aveshe va pwa mo, ndelenee Israel sha li shihe nomukwafi. 27NOmwene ina popya natango nokutya, ta ka dima po edina laIsrael koshi yeulu. Onghee hano e va xupififa Jerobeam yaJoas. 28Noinima imwe tai hepaulula Jerobeam naaishe e i ninga noilonga yaye yeenghono, nhumbi a homona ndele a alulila Israel Damaskus naHamat momake aJuda, inai shangelwa mbela membo lomafimbo eehamba daIsrael? 29Ndele Jerobeam okwa ka nangala pooxe pamwe neehamba daIsrael, nomona waye Sakaria a ninga ohamba ponhele yaye.
Currently Selected:
2 EEHAMBA 14: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
