HEB 7
7
मलकीसदेक
1इड मलकीसदेक शालेमटोड#7:1 शालेमटोड शालेमदी अर्थ शांती, शालेम इदी यरुशलेमदी फाताद फेर उंडी शकास्ताद राजा इंगा सर्वोच्च परमेश्वर याजक उंड्या. अब्राहाम राजालनी हरायमती वापस वच्चेताप्पुड मलकीसदेक वानकी भेटाशा, इंगा वानकी आशिर्वाद इच्या.#उत्पत्ती 14:17-20. 2इंगा अब्राहाम लढाईला झिकाशीने आंता संपत्तीद दहावा भाग मलकीसदेककी इच्या. मलकीसदेक फेरदी अर्थ “नितीमत्वटोड राजा” आल्ले वाड शालेमटोड राजा उंड्या आंका वानदी अर्थ “शांतीटोड राजा” इल्ला आयताद. 3मलकीसदेक आम्मा-आब्बानदी लेकाते वान पुर्वजलाद, वानदी जन्मद लेकाते सच्चेद नोंद शिक्काद. परमेश्वर कोडकु लेका उंडीने इचांग वाड पण अनंतकाळ इचांग याजक आय्यी उंटाड.
4दिन मिंदकेल मीर तेल्चकोंडा, मलकीसदेक यंता महान मनशी उंड्या! कुलाधीपती अब्राहाम इड पण लढाईला झिकाशीने आंता संपत्ती लोन्केल दहावा भाग वानकी इच्या. 5इंगा लेवीलोन वंशजलु यवार याजक आय्यीर वार मोशेन नियमशास्त्रलोन आज्ञा लेका इस्राएल मंदी तीकेल आंटे अब्राहाम तीकेल फुट्टीने मना आक्का-तम्मुळ्ळा तीकेल, मोशेन नियमशास्त्र लेका दशमांश जमा शेयदुर.#गणना 18:21. 6मलकीसदेक लेवी वंश लोन्टोड लेकुंड्या, तरी पण वाड अब्राहाम तीकेल दशमांश तिस्कुन्या इंगा यवानकी परमेश्वर तीकेल अभिवचन शिक्कीन्या, वानकी वाड आशिर्वाद इच्या. 7दिंटल्या येमीच शक लेद की, फेद्दावोड शिन्नावोनकी आशिर्वाद इस्ताड. 8इंदु सुस्ते तर या मनशी सच्चेतोड उंडाड वाड दशमांश जमा शेस्ताड, पण इंगोगो तीकुड सुस्ते तर, पवित्र शास्त्रला राशीनेलेका दशमांश इल्ला मनशी तिस्कुन्या यवाड इंगाना पण जित्ता उंडाड. 9यवाडाना इल्ला पण आनी शकास्ताड की, लेवी मंदी याद दशमांश जमा शेस्तार, खरेम आंटे वार पण अब्राहाम तीकेल मलकीसदेककी दशमांश इस्तार. 10येनटीक की यप्पुड मलकीसदेक अब्राहामनी भेटाशा आप्पुड लेवीड वार पुर्वज अब्राहाम शरीरला बीजरुपता उंडीर#उत्पत्ती 14:18-20..
वगा कोत्ता याजकदी गरज
11जर लेवीय याजकीय पद्धतीता परिपुर्णता शिक्की शकास्ताद, यादानता मंदीक नियमशास्त्र इच्चेदेंक वच्या, तर मंग इंगोगो याजक मलकीसदेक लेका नीला फडा मतेद येम गरज उंड्या यवाड अहरोन वंश लोन्टोड लेकुंड्या. 12येनटीक की यप्पुड याजक बदलास्ताड आप्पुड नियमशास्त्र पण बदलास्ताद. 13येनटीक की इ आन्नी माटलु यवार बद्दल आनीनेय उंडाय, वाड लेवी वंश लोन्टोड लेकुंड्या इंगोगो वंशटोड उंड्या इंगा वान वंश लोन्केल यवारुच वेदी देगार इल्लोनदी याजकीय सेवा शेयालेद. 14इदी स्पष्ट उंडाद की, मना प्रभु येशुड यहूदा वंश लोन्टोड उंड्या इंगा इ वंश बद्दल मोशेड याजकपद बद्दल येमीच शप्पालेद.#उत्पत्ती 49:10; यशया 11:1. 15इंगा यप्पुड इंगोगोड कोत्ता याजक मलकीसदेक लेका वस्ताड आप्पुड इदी माटा जास्त स्पष्ट आयताद. 16मनशी नियमशास्त्र लेका वान याजक बनाय मतेदेंक दालेकुंड्या तर अक्षय जीवन सामर्थ्यता वान याजक बनाय मतेदेंक वच्या. 17येनटीक की इल्ला वान बद्दल स्तोत्रसंहिता साक्ष इस्ताद,
“नु मलकीसदेक लेका
युगानयुग याजक उंडाव.”
18फाताद नियम वगा तीकुड फेट्टेदेंक वच्चीनाद, येनटीक की आदी कमजोर उंड्या इंगा येमीच फनीक लेकुंड्या. 19येनटीक की मोशेन नियमशास्त्रता यादुच माटा परिपुर्ण कालेद इंगा इप्पुड वगाट शिंगार आशा मनाक इच्चेदेंक वच्चीनाद, यादानता मनाम परमेश्वर देगार वस्ताम. 20इंगा दिनिचांग वट्टुताने परमेश्वर ख्रिस्तन निवडाशा. 21यप्पुड बाकी मंदीन याजक बनाय मतेदेंक वच्या आप्पुड वार वट्टु येस्कुनांदे याजक आय्यीर पण यप्पुड येशुड याजक बनाशा, आप्पुड वाड वट्टु येस्केन बनाशा. यवाड वान आन्या की,
“प्रभुड वट्टु येस्कुन्नाड इंगा वाड स्वताद मन बदलायाड,
नु युगानयुग याजक उंडाव.”
22दिनदी अर्थ इल्ला की येशुड वगा शिंगार करारदी जमीनदार बनाशीनाड 23आल्ले, इंगोगोर शेंगेम याजकलु उंडीर. पण साव इचांग निरंतर वार याजक निलची शकायालेद. 24वानदी याजकपद नेहमी उंटाद, येनटीक की येशुड 'युगानयुग' उंटाड. 25दिनिचांग, यवार येशुन तीकेल परमेश्वर देगार वस्तार वारदी वाड अनंतकाळ इचांग तारण शेशेदेंक समर्थ उंडाड येनटीक की वार इचांग मध्यस्थी शेशेदेंक वाड नेहमी जित्ता उंडाड.#१योहान 2:1-2; १तीमथी 2:5.
26दिनिचांग इल्लोन्टोडे महायाजक मना इचांग योग्य उंडाड. वाड पवित्र, निष्कपट इंगा निष्कलंक उंडाड; वाड पापी मंदी लोन्केल अलग शेशीनोड उंडाड. वान स्वर्गकाना पण उंच शेशेदेंक वच्चीनाद. 27वार महायाजकलु यवार अहरोन वंशजलु उंडीर वार स्वता पापला इचांग इंगा मंदी पापला इचांग यल्ला अर्पण शेयदुर आल्ला वानकी शेशेद गरज लेद. येशुड यप्पुड स्वतान अर्पण शेशा आप्पुड वक्कातुक इंगा आंदार इचांग अर्पण शेशीनाड.#लेवी 16:6; इब्री 10:10-14. 28येनटीक की मोशेन नियमशास्त्र तर कमजोर मनशीन मंदी महायाजक निवडास्ताद. पण नियमशास्त्र आयनेंका वट्टुद वचन “युगानयुग” इचांग परिपुर्ण शेशेदेंक वच्चीनाद, दिनिचांग परमेश्वर कोडकु इड अनंतकाळ इचांग परिपुर्ण महायाजक बनाशीनाड.
Currently Selected:
HEB 7: WNT
Highlight
Copy
Compare
Share
Want to have your highlights saved across all your devices? Sign up or sign in
