HEB 6
6
भटकाशेद परिणाम
1दिनिचांग मनाम ख्रिस्त शिक्षनलोनी सुरुवाती माटलु इडशी परिपुर्णता तीकुड वाढास्का फदाम. इंगा वगातुक परमेश्वर मिंदा विश्वास फेट्टेद, निर्जीव फनुलाद पश्चात्ताप, 2बाप्तिस्मा, नत्ती मिंदा शेय फेट्टेद, सच्चीनोर लोन्केल पुनरुत्थान इंगा सार्वकालिक न्याय बद्दल शिक्षण, इ माटलाद जोता मनाम वापस येयाराद. 3जर परमेश्वरदी इच्छा उंटे तर मनाम इद्दे शेयदाम.
4येनटीक की यवारकी वगातुक यलगु शिक्या, यवार स्वर्गीय दानलाद अनुभव तिस्कुंडार इंगा यवार पवित्र आत्मा भागीदार आयनार, 5इंगा यवार परमेश्वर उत्तम वचनदी इंगा वच्चे युगलोन सामर्थ्यद अनुभव तिस्कुंडार, 6यंकसार जर वार ख्रिस्तन देगाटेल धुराम आय फोयतार तर वारनी पश्चात्ताप तिकुड तीप्पेद अशक्य उंडाद, येनटीक की वार स्वता नुकसान इचांग वार परमेश्वर कोडकुन वापस क्रुस मिंदा खिळास्तार इंगा आंदार मुंदार वानदी अपमान शेस्तार. 7येनटीक की याद भुमी वेळोवेळी फडे वानाय नेळ तागताद इंगा या मंदी तीकेल दानदी पेरणी आयताद वार इचांग फंटा वस्ताद दानकी परमेश्वर तीकेल आशिर्वाद शिकताद. 8पण याद भुमी मुंडलु इंगा कुसळ्याल इस्ताद, आदी येमीच फनीक लेद इंगा दान मिंदा श्राप वच्चेद उंटाद; आदी आग्गीता नाश आय फोई.#योहान 15:6.
9हे प्रिय मंदीलाला, मीर शिंगार फनी शेस्तुनार, येनटीक की परमेश्वर मिद पहिलाने तारण शेशीनाड दिनिचांग इ चेतावनील मी इचांग लेव. 10येनटीक की परमेश्वर अन्यायी लेड, की मीर शेशीनेय फनुल, इंगा आ प्रेमनी मती मरशी फोई, याय मीर वान फेर इचांग इल्ला सुपीस्तीर, की परमेश्वर मंदीद सेवा शेस्तीर, इंगा इप्पुड पण शेस्तुनार. 11पण माद इल्ला इच्छा उंडाद की, मी आशाद पुर्ण खात्री आय्येदेंक मी दिंटल्योन्टोर आंदार आखरी नंताक फनी इचांग इल्ले आवड सुपीयाला. 12दिनिचांग की, मीर आळशी कावाराद. तर या मंदी विश्वासता इंगा हिम्मतता परमेश्वर इच्चीनेद अभिवचनदी वारसा मिळाय मततार इल्लोन मंदी लेका शेशेतोर मीर कावाला.
विश्वासयोग्य अभिवचन
13यप्पुड परमेश्वर अब्राहामकी वचन इच्या, आप्पुड वान काना फेद्दावोड यवाडुच लेकुंड्या आंका परमेश्वर वान फेरुद वट्टु येस्कुन्या. 14वाड आन्या, “निन निक भरपुरीता आशिर्वाद इच्यान इंगा निन नी बिळ्ळान महान रितीता वाढाय मतका फोयान.”#उत्पत्ती 22:17. 15दिनिचांग धीर्यामता दावा सुशी नेंका परमेश्वर याद वचन वानकी इच्चीन्या आदी पुर्ण आय्या. 16मंदी, नेहमी वट्लु येस्कुने ताप्पुड मना काना यवाड फेद्दावोड उंटाड वान फेरुद उपयोग शेस्तार येनटीक की वट्टु येस्कुनेद इदी सत्यद खात्री शेशेदेंक इंगा आन्नी जगडालदी शेवट शेशे इचांग उंटाद.#निर्गम 22:11. 17दिनिचांग यप्पुड परमेश्वरकी अभिवचन वारसदारलाक इदी स्पष्ट शेशी सुपेद उंड्या, की वानदी योजना बदलाशी शकायाद आप्पुड वाड वट्टु येस्कुन्या. 18परमेश्वर दिनिचांग वट्टु येस्कुन्या इंगा अभिवचन इच्या की इ रोंडु माटलु बदलाशी यकायाव, येनटीक की परमेश्वर खोटा माटलाडाड, दिनिचांग मनाम यवार वानदी आश्रय तिस्कुंडाम, आ आशान फट्टी महान विश्वास फेट्टी शकास्ताम याद मना मुंदार फेटनेद उंडाद.#गणना 23:19; 1 शमुवेल 15:29; मत्तय 18:16. 19आदी आशा मना जेम इचांग इल्लोनदी नांगर उंडाद याद सुरक्षित इंगा मजबुत उंडाद इंगा इदी आशा परमेश्वर भवनलोन परदा यंकाटेल लोनीक फोयताद,#गणना 23:19; १तीमथी 2:13. 20यंदुक येशुड मना अग्रदुत मना इचांग लोनीक फोयनाड. वाड मलकीसदेक लेका युगानयुग महायाजक आयनाड.
Currently Selected:
HEB 6: WNT
Highlight
Copy
Compare
Share
Want to have your highlights saved across all your devices? Sign up or sign in
