2TI 3
3
खोटा शिक्षण विरुद्ध चेतावनी — 3:1-17
देगार वच्ची टेकाशीनेय संकटलु
1आखरी दिनमुलाला संकटदी वेळ वच्ची इदी तेल्ची तिस्को. 2मंदी स्वार्थी, धनलोभी, फेद्दा फेद्दाय माटलु माटलाडेतोर, घमंडी, निंदा शेशेतोर, आम्मा-आब्बानदी अवज्ञा शेशेतोर, अनुपकारी, अपवित्र 3इंगोगार मिंदा प्रेम शेयानोर, क्षमा शेयानोर, चुगली शेशेतोर, असंयमी, क्रुर, शिंगार माटला शत्रुल, 4विश्वासघाती, हट्टी, घमंडता फुगाशीनोर, परमेश्वर मिंदा लेद तर सुख विलास मिंदा प्रेम शेशेतोर आय्यार; 5वार परमेश्वर सेवाद ढोंग तर शेशार पण वान सामर्थ्यन स्वीकार शेयाक फोयार. वार तीकेल धुराम उंड. 6निन इल्ला दिनिचांग आंटान की, वार दिंटल्योन्केले काही मंदी इंगोगोर इंडलालोंग दुरतार इंगा पापता निंडीने, आन्नी प्रकारला वाईट वासनालता निंडीने, कमजोर आंड्योरनी ताबाला तिस्कुंटार. 7इल्लोन आंड्योर नेहमी नेरशेद प्रयत्न शेस्तार. पण वार सत्यद पुर्ण ज्ञान प्राप्त शेशी शकायार. 8यल्ला यान्नेस इंगा यांब्रेस इर मोशेनदी विरोध शेशीनीर आल्ले, इ मंदी पण सत्यक विरोध शेस्तार. यवारदी मन भ्रष्ट आयनाद इंगा यवारदी विश्वास कच्चुद उंडाद, इल्लोन मंदी लेका इर उंडार.#प्रेषित 13:8. 9पण वार दिन मुंदारकी वाढाशी शकायार, येनटीक की यल्ला वारदी यल्ला मोशेन विरोधीलाद मुर्खपणा प्रकट आय्या आल्ले इरदी पण मुर्खपणा आंदार मुंदार प्रकट आय्यी.
ख्रिस्ती जीवनला मेहनत
10तरी पण नु नाद शिक्षण, चालचलन, जीवन लोनदी नाद ध्येय, नाद विश्वास, नाद धीर्याम, नाद प्रेम, नाद सहनशीलता, नाद आयनेद छळ, ना मिंदा वच्चीनेय संकटलु ओळखाशी उंडाव, 11अंत्युखिया, इकुन्या इंगा लुस्र इ शहरलाला याय माटलु ना बद्दल घडाशा, याद भयंकर छळ निन सहन शेस्तीन, आय नाय दुखलु निक यरका उंडाद, पण प्रभुड नन्नु इ आन्नी माटलालेल इडपीच्या.#स्तोत्रसंहिता 34:19. 12खरेम सुस्ते, यवार-यवार ख्रिस्त येशुला शुद्ध जीवन जगाशेदेंक सुस्तार, वार आंदारदी छळ आय्यी. 13पण दुष्ट इंगा फसाय मतेतोर मंदी इंगोगोरनी फसाय मतकाने उंड्यार इंगा स्वता पण फसाशी बिघडास्का फोयार. 14पण नी बद्दल, याय माटलु नु नेरस्ती इंगा या माटला मिंदा नीद विश्वास उंडाद आय नु आले फट्टी उंड. 15निक यरका उंडाद की, नु शिन्नावोड उंटी आप्पुडकेले नीक पवित्र शास्त्रद ज्ञान उंडाद. याद निन्नु ख्रिस्त येशुन मिंदुड विश्वास इचांग तारण प्राप्त शेशेदेंक हुशार बनायमती शकास्ताद. 16पुर्ण पवित्र शास्त्र परमेश्वर प्रेरणाता राशीनेद उंडाद इंगा नेरपेदेंक, समजाय मतेदेंक, सुधराय मतेदेंक इंगा योग्य जीवन जगाशेद नेरशेदेंक उपयोगी उंडाद. 17दिनिचांग की, परमेश्वर मनशी सिद्ध आय्यी प्रत्येक शिंगार फनी इचांग तैयार कावाला.
Currently Selected:
2TI 3: WNT
Highlight
Copy
Compare
Share
Want to have your highlights saved across all your devices? Sign up or sign in
