2TI 2
2
सेवा इचांग नमुना — 2:1-26
ख्रिस्त येशुन शिंगार सैनिक
1हे ना कोडका, नु ख्रिस्त येशुन कृपाला बलवान आयकेन फो. 2ना तीकेल याय माटलु नु शेंगेम साक्षीदारला मुंदार इंटी आय तिस्को इंगा इंगोगो मंदीक नेरपेदेंक योग्य उंड्यार, इल्लोन विश्वासी मंदीक इचकाड.
3ख्रिस्त येशुन शिंगार सैनिक लेका ना जताक दुख सहन शेय. 4सैनिकदी फनी शेशेतोड यवाडुच संसारलोन फनुलाला फसायाड. दिनिचांग की वानकी वान फेद्दा अधिकारीलान प्रसन्न शेशेद उंटाद. 5जर यवाडाना यादाना प्रतियोगिताला भाग तिस्कुंटाड, तर वानकी आड नंताक मुकुट शिक्काद, याड नंताक वाड नियमलाद पालन शेय्याड. 6यवाड शेतकरी कष्ट शेस्ताड, फंटाद पहिला हिस्सा वानकी शिक्काबेक. 7निन येम आंटुनान, दान तीकुड लक्ष इ, येनटीक की प्रभुड निक आन्नी माटलाद समज इच्ची.
8निन शप्पीने सुवार्तालेका, यवाड सच्चीनोर लोन्केल लेशीनाड इंगा दाविद वंश लोन्टोड उंडाड, आ येशु ख्रिस्तद, ध्यानाम शेय. 9यवान इचांग निन दुख सहन शेस्तुनान, इड नंताक की अपराधी लेका साखळीलाता कट्टीनोड उंडान, पण परमेश्वरदी वचन कट्टेदेंक दालेद. 10दिनिचांग परमेश्वर निवडाशीने मंदी इचांग निन आंताच सहन शेस्तुनान, दिनिचांग की वारकी पण ख्रिस्त येशुन तीकेल शिक्केद तारण इंगा अनंतकाळदी गौरव प्राप्त कावाला.
11इदी वचन विश्वासयोग्य उंडाद जर मनाम वान जताक सच्ची फोयनाम, तर मनाम वान जताक जित्ता पण उंड्याम.
12जर मनाम दुख सहन शेस्तीम तर मनाम वान जताक राज्य पण शेशाम
जर मनाम वान नाकारीस्तीम, तर वाड पण मनालनी नाकारीच्ची
13मनाम अविश्वासयोग्य जरी उंडना, तरी पण वाड विश्वासयोग्य निलस्ताड, येनटीक की वाड स्वता विरुद्ध फोई शकायाड.
शिंगार सेवक
14मंदीक इ माटलाद ध्यानाम इच्का उंड. प्रभुन मुंदार वारकी चेतावनी इच्ची शप की, तीटलाडा कुंडा. इल्लोन जगडाल येमीच फायदाय लेव, पण आय इनेतोर इचांग नाशदी कारण आयताय. 15नु परमेश्वरकी आवडाशेतोड सेवक इंगा इल्लोन फनुल शेशेतोड आय्येद प्रयत्न शेय, यवानकी शिग्गु फडेद येमीच कारण लेद, इंगा यवाड निष्कपट रुपता सत्यद प्रचार शेस्ताड. 16पण अशुद्ध माटलाकेल धुराम उंड, येनटीक की इ माटलु मंदीन परमेश्वर केल धुराम येका फोयताय. 17इंगा इल्लोन मंदीद शिक्षण कर्करोग लेका पसरास्ताद. इ मंदीला हुमनाय इंगा फिलेत इर उंडार, 18वार सत्यकेल धुराम आय फोयनार. पुनरुत्थान आय्यी फोयनाद इल्ला शप्पीगास वार यंता तरी मंदी विश्वासदी नाश शेशीनार. 19तरी पण परमेश्वरदी पक्का जोता टीकाशी उंडाद, इंगा दान मिंदा वानदी इदी शिक्का उंडाद की, “प्रभुड वान मंदीन गुरतु फटताड,” इंगा “यवाड पण प्रभुनदी फेर तिस्कुंटाड वाड पापकेल धुराम उंडाला.”#नहूम 1:7.
20फेद्दा इंडलाला फक्त बंगार-यंडीये बतकुल उंटाय इल्ला लेद तर कटलाय इंगा मन्नुय बतकुल पण उंटाय. काही महत्वपुर्ण उद्देश इचांग इंगा काही साधारण उद्देश इचांग बनाय मतीनेय उंटाय. 21दिनिचांग जर यवाडाना आटला केल धुराम उंडी स्वतान शुद्ध शेशी, तर वाड पवित्र आयनोड, मालकुन फनीक फडेतोड, इंगा प्रत्येक शिंगार फनी इचांग तैयार शेशीनोड इल्ला आदरदी पात्र आय्यी.
22जवानी वासनाल केल धुराम फार इंगा यवार शुद्ध मनता प्रभुनदी फेर तिस्कुंटार इंगा प्रभुन मिंदा विश्वास फेटतार, इल्लोन मंदी जताक नितीमत्व, विश्वास, प्रेम इंगा शांती यंका आंट. 23पण व्यर्थ इंगा अज्ञानी वादविवादला केल धुराम उंड, येनटीक की नीक यरका उंडाद की, आटला इचांग जगडाल निर्माण आयताय.
24परमेश्वर सेवक जगडाल आडाराद, तर आंता मंदी जताक शिंगार निलवाला, आल्ले शिक्षणला कुशल इंगा सहनशील उंडाला. 25यवार वानकी विरोध शेस्तार, वारकी वाड शांतीता समजाय मताला, दिनिचांग की वार सत्यन ओळखायाला आंका परमेश्वर वारकी पश्चात्ताप शेशेद बुद्धी इच्ची. 26इंगा शैतान वान इच्छा लेका शेशेदेंक फटकेन येका फोयनोर, वान जाळी लोन्केल इडी शुद्धी मिंदीक वच्यार.
Currently Selected:
2TI 2: WNT
Highlight
Copy
Compare
Share
Want to have your highlights saved across all your devices? Sign up or sign in
