2TI 4
4
प्रोत्साहन बोध इंगा आखरी आशिर्वाद — 4:1-22
वचनदी प्रचार शेय
1परमेश्वर मुंदार इंगा या ख्रिस्त येशुड जित्ता उंडीनोरदी इंगा सच्चीनोरदी न्याय शेशी वान मुंदार, वानदी प्रगट आय्येद इंगा वान राज्यद ध्यानाम शेशी नीक निक आदेश इस्तान की, 2वचनदी घोषणा शेय इंगा सुवेळी अवेळी तैयार उंड, आन्नी प्रकारदी सहनशीलता इंगा शिक्षणता दोष सुपी, बेद्री इंगा उत्तेजन इ. 3निन इल्ला दिनिचांग आंटान की इल्ला वेळ वच्ची यप्पुड मंदी शिंगार शिक्षणनी सहन शेयाक फोयार. पण वार स्वता इच्छा लेका इनेद आवड फट्टी, वार इचांग शेंगेम शिक्षकलान जमा शेशार. 4इंगा वारी गुम्माल वार सत्यकेल तिप्पी काल्पनिक कथाल तीकुड आंच्यार. 5पण नु आन्नी माटलाला सावधान उंड, दुख सहन शेय; सुवार्ताद घोषणा शेशेद फनी शेय; परमेश्वर इच्चीनेद सेवा पुर्ण शेय.
6येनटीक की इप्पुड नाद अर्पण आयतुनाद इंगा नाद इ दुन्याम लोन्केल फोयेद वेळ वच्चीनाद. 7निन शिंगार युद्ध शेशीनान. निन नाद शर्यत पुर्ण शेशीनान. निन विश्वासदी रक्षा शेशीनान. 8इप्पुड भविष्यला ना इचांग याद नितीमत्वद मुकुट फेट्टीनेद उंडाद, आदी आ दिनमुनाड नितीमान न्यायाधीश प्रभुड नाक इच्ची इंगा फक्त नाके लेद, तर वानदी प्रकट आय्येद यवारकी प्रिय उंडाद आ आंदारकी पण इच्ची.
व्यक्तीगत संदेश
9ना देगार लग्गान वच्चेद प्रयत्न शेय. 10येनटीक की देमास नन्नु इडशी थेस्सलनी शहरकी फोयनाड, येनटीक की वानकी दुन्यामदी सुख प्रिय उंडाद. क्रेस्केस गलतिया प्रांतकी फोयनाड इंगा तीत दालमतीया प्रांतकी फोयनाड. 11फक्त लूक ना देगार उंडाड, यप्पुड नु वच्याव आप्पुड मार्कनी पण नी जताक येकेन दा, येनटीक की सेवा इचांग वाड नाक उपयोगी उंडाड. 12तुखिकनी निन इफिस शहरकी आंपीनान. 13त्रोवस शहरला कार्पान इंटल्या निलचीनेद नाद झगा वच्चेताप्पुड येकेन दा. आल्ले नाय पुस्तकलु, विशेष आंटे चर्मपत्रल येकेन दा. 14आलेक्सांद्र तांबटाड नाद शेंगेम नुकसान शेशीनाड. वाड शेशीने फनुला लेका परमेश्वर वानकी वापस इच्ची. 15नु पण वान तीकेल सावध उंड, येनटीक की वाड मना माटलाद शेंगेम विरोध शेशीनाड.
16पहिलातुक यप्पुड नाक न्यायालयला नाद बचाव शेशेद उंड्या आप्पुड नाक यवाडुच साथ इयालेद. तर उलटा आंदार नन्नु इडशी फोईर. आशा उंडाद की दिनदी हिशोब वारकी परमेश्वर मुंदार इच्चेद फनी फडाराद. 17पण प्रभुड नाद मदत शेशा इंगा नाक सामर्थ्य इच्या दिनिचांग की, ना तीकेल सुवार्ताद घोषणा कावाला इंगा आंदार यहुदी लेनोर मंदी आदी इनाला इंगा वाड नन्नु सिंह नोटल्योन्केल इडपीच्या. 18प्रभुड नन्नु प्रत्येक वाईट फनीकेल इडपीच्ची इंगा वान स्वर्गीय राज्यला तारण शेशी नन्नु तिस्कुनी. वानकी युगानयुग गौरव उंडाला. आमेन.
आखरी शुभेच्छाल
19प्रिस्कीला, अक्वीला इंगा अनेसिफर इंटल्योन्टोरकी सलाम शप. 20एरास्त करिंथ शहरला थांबाशा. त्रफिमनी निन मिलेता शहरला इडस्तीन, येनटीक की वाड बिमार उंड्या.
21नु सलीकालाम काना मुंची वच्चेद प्रयत्न शेय. युबुल, पुदेस, लीन इंगा क्लौदिया इंगा बाकी आंदार आक्का तम्मुळ्ळु निन्नु सलाम आंटुनार.
22निन प्रार्थना शेस्तान की, प्रभुड नी आत्मा जताक उंडाला इंगा परमेश्वरदी कृपा मी आंदार जताक उंडाला.
Currently Selected:
2TI 4: WNT
Highlight
Copy
Compare
Share
Want to have your highlights saved across all your devices? Sign up or sign in
