2TH 1
1
दंडाम — 1:1, 2
दंडाम
1निन पौल, सिल्वान इंगा तीमथ्यन जताक मना परमेश्वर आब्बाड इंगा प्रभु येशु ख्रिस्तला थेस्सलनी शहरलोन मंडळीक इदी पत्र रास्तुनान. 2निन प्रार्थना शेस्तान की परमेश्वर आब्बाड इंगा प्रभु येशु ख्रिस्तन तीकेल मिक कृपा इंगा शांती उंडाला.
अडचणला सांत्वन — 1:3-12
न्यायदी दिनमु
3हे आक्का तम्मुळ्ळालाला, मिम नेहमी मी बद्दल परमेश्वरकी धन्यवाद इस्ताम इंगा इदी योग्य पण उंडाद येनटीक की मिद विश्वास शेंगेम वाढास्तुनाद इंगा मिद आंदारदी वगामेगार मिंदुडदी प्रेम शेंगेम वाढास्तुनाद; 4दिनिचांग मी आंता त्रासला इंगा दुखला मिद सहन शेशेद क्षमता इंगा याद विश्वास सुपीस्तार, दानिचांग परमेश्वर मंडळीलाला मिम मी बद्दल घमंड शेस्ताम. 5इदी परमेश्वरदी योग्य न्यायदी प्रमाण उंडाद; न्याय इदी की, यवार इचांग मीर दुखलु सहन शेस्तुनार आ परमेश्वर राज्यला मीर योग्य ठरायाला. 6मिक यवार दुख इस्तार वारकी दुख इच्चेद इंगा कष्ट शेशेतोर मिक मा जताक विश्रांती इच्चेद, इदी परमेश्वर कंडलाला न्याय उंडाद, 7इदी आप्पुड आय्यी यप्पुड प्रभु येशुड वान सामर्थी स्वर्गदुतला जताक स्वर्गलेल अग्निज्वाला जताक प्रकट आय्यी.#योहान 1:14-15; प्रकटीकरण 14:13. 8आप्पुड यवार परमेश्वरनी गुरतु फट्टार इंगा मना प्रभु येशुन सुवार्ताद स्वीकार शेयार, वारकी परमेश्वर दंड इच्ची.#स्तोत्रसंहिता 79:6; यशया 66:15; यिर्मया 10:25. 9आप्पुड वारनी प्रभुन मुंदाटेल इंगा वान सामर्थी गौरवकेल धुराम शेशेदेंक वच्ची, वारकी सार्वकालिक नाशदी दंड शिक्की.#प्रकटीकरण 21:8; मत्तय 25:41,46; यशया 2:19,21. 10इदी आबद आय्यी, यप्पुड परमेश्वर वान मंदी तीकेल गौरव शिक्काला आंका इंगा विश्वास फेटेतोरला आश्चर्यद कारण आय्येदेंक वच्ची; येनटीक की मीर मिम इच्चीने साक्ष मिंदा विश्वास फेटतीर.#स्तोत्रसंहिता 89:7; यशया 49:3. 11दिनिचांग मिम मी इचांग नेहमी इल्ला प्रार्थना शेस्ताम की, मना परमेश्वर मिमलान इ पाचारण योग्य समजायाला इंगा मिद प्रत्येक शिंगार इच्छा इंगा विश्वासदी प्रत्येक फनी सामर्थ्यता पुर्ण शेयाला; 12दिनिचांग की, मना परमेश्वर इंगा प्रभु येशु ख्रिस्तन कृपाता मना प्रभु येशुनदी फेर मी दिंटल्या इंगा मिक वान दिंटल्या, गौरव शिक्काला.#यशया 24:15; 66:5; १पेत्र 1:7-8.
Currently Selected:
2TH 1: WNT
Highlight
Copy
Compare
Share
Want to have your highlights saved across all your devices? Sign up or sign in