1TH 5
5
आखरीद प्रार्थना इंगा निष्ठा — 5:23-28
प्रभुड वापस वच्ची तैयार उंडना
1हे आक्का तम्मुळ्ळालाला, काळ इंगा वेळ दीन बद्दल मिक येमीच राशेद गरज लेद. 2येनटीक की मिक स्वताक यरका उंडाद की यल्ला मोब्बुला दोंगा वस्ताड, आल्ले प्रभुनदी दिनमु वच्ची. 3“शांती उंडाद, सुरक्षित उंडाम” इल्ला वार आंटार, आप्पुड रंजलमनशी आंडीदानकी यल्ला अचानक त्रास आयताद आल्ले अचानक वारदी नाश आय्यी इंगा वार यल्लाच बतकाक फोयार. 4पण हे आक्का तम्मुळ्ळालाला, आदी दिनमु दोंगा लेका मी मिंदा वच्ची इल्ला मीर मोब्बुला लेर. 5येनटीक की मीर आंदार यलगुटोर इंगा दिनमुटोर बिळ्ळु उंडार; मनाम मोब्बुटोर इंगा अंधकारटोर लेम. 6दिनिचांग मनाम इंगोगार लेका फंडका निल्वाराद, तर मेल्का इंगा सावध निल्वाला. 7येनटीक की फंडेतोर मोब्बुलाने फंडकुंटार इंगा सराय तागेतोर पण मोब्बुलाने तागतार. 8पण यवार मनाम दिनमुटोर उंडाम, विश्वासदी इंगा प्रेमदी कवच फेटकेन इंगा तारणदी आशाद टोप फेटकेन सावध उंडाला. 9येनटीक की परमेश्वर मनालनी कोफाम इचांग लेद, तर मना प्रभु येशु ख्रिस्तन तीकेल मनाद तारण कावाला आंका मनालनी निवडाशीनाड. 10प्रभु येशुड मना इचांग दिनिचांग सच्या की, मनाम जित्ता उंटे का सच्चीनोर उंटे तरी मनाम वान जताक जित्ता उंडाला.
11दिनिचांग मीर वगामेगारकी उत्तेजन इंडा इंगा वगामेगारदी उन्नती शेयना; यल्ला की मीर शेस्का पण उंडार.
मंडळीक उपदेश
12पण हे आक्का तम्मुळ्ळालाला, मिम मिक विनंती शेस्ताम की, यवार मी नडमा परिश्रम शेस्तार, यवार प्रभुला मी अधिकारी उंडार इंगा मिक नेरपुतार वारदी आदर शेयना; 13इंगा वार फनी इचांग प्रेमता वारनी शेंगेम आदरयोग्य समजायना इंगा वगामेगार जताक शांतीता निलना.
14हे आक्का तम्मुळ्ळालाला, मिम मिक विनंती शेस्ताम की, यवार आळशी उंडार वारकी समजाय मतना, यवार निरुत्साहित उंडार वारनी उत्साहीत शेयना, यवार अशक्त उंडार वारनी सांभाळींडा; इंगा आंदार जताक सहनशील उंडना. 15इंगा मीर इदी सुडना की, यवाडुच वाईट बद्दल वाईट शेयाराद; पण मीर वगामेगार इचांग इंगा आंता मंदीक इचांग येम बागा उंडाद आदी शेशेद प्रयत्न शेयना.
16नेहमी आनंदीत उंडना. 17निरंतर प्रार्थना शेयना. 18प्रत्येक परीस्थीला परमेश्वरकी धन्यवाद इंडा येनटीक की मी इचांग ख्रिस्त येशुला परमेश्वरदी इच्छा इद्दे उंडाद. 19पवित्र आत्मान आरपाकुंडा. 20भविष्यवाणीलान तुच्छ समजायाकुंडा. 21आन्नी माटलाद पारख शेयना. याय शिंगार उंडाय आटलान फट्टी फेटना. 22वाईट उंडीने आन्नी माटलाकेल धुराम निलना.
23इंगा शांती इच्चेतोड परमेश्वर स्वता मिमलान पुर्णपणे पवित्र शेयाला; इंगा मना प्रभु येशु ख्रिस्तड वच्ची नंताक मिद आत्मा, जेम इंगा शरीर पुर्ण निर्दोष उंडाला. 24मिमलान यवाड फिल्चीनाड वाड विश्वासयोग्य उंडाड; इंगा वाड इल्ले शेशी.
25इंगा हे आक्का तम्मुळ्ळालाला, मा इचांग प्रार्थना शेयना.
26आंता आक्का तम्मुळ्ळाक पवित्र प्रेमता शेतल्या शेय इच्ची दंडाम शेयना.
27निन मिक प्रभुन फेरता आज्ञा इस्तान की, इदी पत्र आंता आक्का तम्मुळ्ळाक वाचाशी सुपना.
28निन प्रार्थना शेस्तान की मना प्रभु येशु ख्रिस्तद कृपा मी जताक उंडाला. आमेन.
Currently Selected:
1TH 5: WNT
Highlight
Copy
Compare
Share
Want to have your highlights saved across all your devices? Sign up or sign in
