1TI 5
5
मंडळीलोन मंदी जताक वागनुक
1मुसल्योर मोड्योर जताक कठोरपणे माटलाडाक, पण आब्बान लेका समजाशी वारकी समजाय मत.#लेवी 19:32. 2जवानोरनी तम्मुळ्ळा लेका, मुसली आंड्योरनी आम्मा लेका, जवान आंड्योरनी शेल्यांला लेका समजाशी वार जताक पुर्ण शुद्ध मनता निल.
विधवालदी मदत
3या विधवा आंड्योरकी खरेमे गरज उंडाद, वारदी आदर शेय. 4पण जर यादाना विधवा दानकी बिळ्ळु लेकाते मनमाल-मनमारानलु उंटे, तर वार पहिला मना इंटल्योन्टोर जताक आदरता वागायाला इंगा मना आम्मा-आब्बान उपकारलान फेडायाला, येनटीक की इदी परमेश्वरकी आवडास्ताद. 5याद खरेमे विधवाद उंडाद इंगा दानदी काळजी तिस्कुना यवारुच लेर, आदी परमेश्वर मिंदा आशा फेटताद इंगा आदी मोब्बु-फगुल परमेश्वर देगार प्रार्थना इंगा विनंती शेस्का निलस्ताद.#यिर्मया 49:11. 6पण याद विधवाद सुख विलासला निलस्ताद, आदी जित्ता उंडीगास पण सच्चीनेद उंडाद. 7विश्वासी मंदी निर्दोष उंडाला आंका इ माटला बद्दल वारकी चेतावनी इ. 8पण जर यवाडाना वान गोनगोतदी इंगा विशेष रुपता वान परिवारदी काळजी तिस्कुनाड, तर वाड विश्वासनी नाकारीच्चीनाड इंगा वाड अविश्वासी काना वाईट आय फोयनाड.
9याद विधवा आंडीद साठ वर्ष लोना उंडी वक्का मोगुन वडती उंडी. 10याद शिंगार फनुला इचांग गाजाशीनेद उंडी आंटे याद दान बिळ्ळाद पालन पोषण शेशीन्याला, याद अनोळखी मंदीद स्वागत शेशीन्याला, परमेश्वर मंदी काळ कडगीन्याला, त्रासला उंडीनोरदी मदत शेशीन्याला इंगा आन्नी शिंगार फनुल शेशेदेंक समर्पण शेशीन्याला, इल्लोन विधवा आंडीदानदे यादीला फेर रायाला. 11पण जवान विधवा आंड्योरदी फेर राशेद लेद, येनटीक की यप्पुड वार वासनाल फडी फेंडली शेस्कुनेदेंक सुस्तार, आप्पुड वार ख्रिस्तन विरुद्ध वागास्तार. 12इंगा दोषी ठरास्तार, येनटीक की वार वारदी पहिला विश्वास इडस्काडनार. 13इंगा वार इल्लु इल्लुक तिरगी आळशी आयतार, इंगा इंते लेद तर वटवट शेस्तार इंगा इंगोगोर फनुलाला शेय येस्तार इंगा याय माटलु माटलाडा बेकालेद, आय माटलु माटलाडतार. 14दिनिचांग नाद इच्छा उंडाद की, जवान विधवा आंड्योर फेंडली शेस्कुनाला, इंगा बिळ्ळान पैदा शेस्कुनाला इंगा इल्लु इडपु सांभाळीयाला, इंगा विरोधी मंदीक मनाद निंदा शेशेदेंक संधी इयाराद. 15येनटीक की काही विधवा आंड्योर भटकाशी शैतान यंका नडशेदेंक आंटीनार. 16जर यादाना विश्वासीदान इंटल्या विधवाल उंटे तर आद्दे वारदी काळजी तिस्कुनाला, दिनिचांग की वारदी भोरु मंडळी मिंदा फडाराद. दिनिचांग की या विधवा आंड्योरकी खरेमे गरज उंडाद वारकी मंडळी मदत शेशी शकायाला.
17यवार आब्बागार शिंगार सेवा शेस्तार, विशेष रुपता यवार उपदेश शेस्तार इंगा नेरपुतार वारकी दुप्पट मान इंडा. 18येनटीक की पवित्र शास्त्रला इल्ला राशीनेद उंडाद, “कल्लाम शेशेताप्पुड यद्दुलाक मुचक्या कट्टाक” येनटीक की “कुल्योनकी वान कुली मिंदा अधिकार उंडाद.”#लेवी 19:13; अनुवाद 25:4. 19याड नंताक इद्दार लेकाते मुगुर साक्षीदारलु आरोप आंचेतोनदी समर्थन शेयार, आड नंताक सेवक मिंदुडदी आरोप स्वीकार शेयाक.#लेवी 17:6; अनुवाद 19:15.
20यवार पाप शेस्काने उंटार, वारदी आंदार मुंदार निषेध शेय. दिनिचांग की, इंगोगोरकी पण पाप शेशेदेंक यरपु कावाला.
21परमेश्वर, येशु ख्रिस्त इंगा निवडाशीने स्वर्गदुतला मुंदार निन चेतावनी इस्तान की, नु मन आंची इ माटलाद पालन शेय इंगा पक्षपात शेशी येमीच शेयाक. 22घाईता यवार मिंदाच शेय फेट्टाक इंगा इंगोगोर पापला भागीदार काक. नेहमी स्वतान शुद्ध फेट.
23इंदुकेल मुंदारकी फक्त नेळ तागेतोड निलवाक, तर नी कडपु इचांग इंगा घडी-घडीक बिमार फडीने इचांग रव्वा अंगुरदी रस पण तागता फो.
24काही मंदी पापलु प्रकट उंडाय इंगा वारी पापलु पहिलाने न्याय इचांग मुंदारकी फोयताय इंगा काही मंदी पापलु यंकाटेल फोयताय. 25दिन लेकाने शिंगार फनुल पण प्रकट उंडाय इंगा याय प्रकट लेव, आय पण नेहमी इचांग दागी शकायाव.
Currently Selected:
1TI 5: WNT
Highlight
Copy
Compare
Share
Want to have your highlights saved across all your devices? Sign up or sign in
