1TI 6
6
दासलाद कर्तव्य
1यंता मंदी दासत्व जुफणी किंदा उंडार वार मना मालकुन आदरयोग्य समजायाला, दिनिचांग की परमेश्वर फेरुद इंगा शिकवनदी निंदा कावाराद. 2इंगा यवार मालकुल विश्वासी उंडार, वारकी वार तम्मुळ्ळु उंडार आंका वारदी अपमान शेयाराद इंगा जास्त सेवा शेयाला येनटीक की यवारकी सेवाद फायदा आयताद वार विश्वासी इंगा प्रिय उंडार. इ माटलु नेरपुका उंड इंगा बोध शेस्का उंड.
खोटा शिक्षण इंगा संपतीद लालुच
3जर यवाडाना इंगोगो प्रकारता नेरपुताड इंगा मना प्रभु येशु ख्रिस्तन शिंगार माटलान इंगा परमेश्वर सेवाद शुद्ध शिक्षण स्वीकार शेयाड 4तर वाड घमंडता फुगाशीनोड उंडाड इंगा वानकी येमीच तेल्वाद. तर वाड जगडाल इंगा शब्दकललता पागल आयनाड. इ माटलाता हेवा, जगडाम, निंदा, वाईट शकलु 5इंगा आ मंदी नडमा जगडाल निर्माण आयताय, यवारी मनलु बिघडाशी वार सत्यकेल भटकाशी फोयनार इंगा इल्ला समजास्तार की भक्ती इदी कमाईद साधन उंडाद, इल्लोन मंदी तीकेल धुराम निलना. 6खरेम सुस्ते आनंदता परमेश्वरदी सेवा शेशे दिंटल्या शेंगेम फेद्दाद फायदा उंडाद. 7येनटीक की मनाम दुन्यामलोंग येमी येका दालेद इंगा मनाम इ दुन्याम लोन्केल येमीच येका पण फोई शकायाम.#ईयोब 1:21; स्तोत्रसंहिता 49:17. 8जर मना देगार आन्नाम इंगा बट्टाल उंडाय तर मनाम दिंटल्याने आनंदीत उंडाला. 9पण यवारकी श्रीमंत आय्येद उंडाद वार परीक्षाला इंगा जाळीला इंगा शेंगेम व्यर्थ इंगा हानिकारक वासनालला फसाशी नाश आयतार.#नीतिसुत्र 23:4. 10येनटीक की दुडलाद लालुच इदी आन्नी वाईट माटलाद मुळ#6:10 आन्नी वाईट माटलाद मुळ आन्नी वाईट माटलाक जन्म इस्ताद उंडाद. इद्दे लालुचला फडी काही मंदी विश्वासकेल भटकाशी, स्वताके शेंगेम दुख इच्चीनार.
शिंगार अंगीकार
11परमेश्वर सेवक उंडाव आंका नु इ माटलाकेल धुराम उंड. नितीमत्व, सुभक्ती, विश्वास इंगा प्रेम, सहनशीलता इंगा नम्रता यंका बेनांट. 12विश्वासदी शिंगार युद्ध शेय, येनटी इचांग निन्नु फिल्चेदेंक वच्चीनाद आ सार्वकालिक जीवननी फट्टी फेट. नु शेंगेम साक्षीदारला मुंदार शिंगार साक्ष इच्चीनाव, 13यवाड आंदारकी जीवन इस्ताड आ परमेश्वर मुंदार इंगा पंत पिलात मुंदार यवाड शिंगार साक्ष इच्या आ ख्रिस्त येशुन मुंदार निन निक आज्ञा इस्तान, 14की मना प्रभु येशु ख्रिस्तड प्रकट आय्यी नंताक निष्कलंक इंगा निर्दोष उंडाला आंका इ आज्ञाल पाळाय. 15यवाड धन्य, वक्काडे अधिपती, राजालकी राजाड इंगा प्रभुलाक प्रभुड, #स्तोत्रसंहिता 47:2. 16यवानकी वक्कानकी अमरत्व उंडाद, यवाड अगम्य यलगुला निलस्ताड, यवान यादुच मनशी सुडालेद इंगा यवारुच सुशी पण शकायार, वाड वानदी प्रकट आय्येद योग्य वेळला सुपीच्ची, वानकी सन्मान इंगा सामर्थ्य युगानयुग उंडाद. आमेन.#१तीमथी 1:17.
श्रीमंत मंदीक आदेश
17इ युगलोन श्रीमंत मंदीक आज्ञा इ की, वार गर्विष्ठ कावाराद. दुडलु याय ठीकायाव आटला मिंदा वार आशा फेट्टाराद, पण परमेश्वर मिंदा आशा फेट्टाला यवाड मना सुकुम इचांग आंताच भरपुरीता इस्ताड.#स्तोत्रसंहिता 62:10. 18वार शिंगार शेयाला इंगा शिंगार फनुलाला श्रीमंत कावाला, इच्चेदेंक उदार इंगा मदत शेशेदेंक तत्पर उंडाला. 19इंगा भविष्यलोन जीवन इचांग वगाट आधार आय्यी, इल्लोनदी धन स्वता इचांग जमा शेशी फेट्टाला.
विश्वासदी रक्षा
20हे तीमथ्य, नी देगार विश्वासता सांभाळीच्चेदेंक इच्चीने धनदी रक्षा शेय. इंगा या ज्ञाननी ज्ञान आनेदे चुक उंडाद, दान अशुद्ध इंगा विरोधी माटलाकेल धुराम निल. 21आदी ज्ञान स्वीकार शेशी यंता तरी मंदी विश्वासकेल भटकाशी फोयनार.
निन प्रार्थना शेस्तान की, परमेश्वरदी कृपा मी आंदार जताक उंडाला.
Currently Selected:
1TI 6: WNT
Highlight
Copy
Compare
Share
Want to have your highlights saved across all your devices? Sign up or sign in
