1TI 4
4
सेवाद जबाबदारी — 4:1—6:21
खोटा शिक्षण इच्चेतोर तीकेल सावधान
1परमेश्वरदी आत्मा स्पष्ट आंटाद की, वच्चे काळला काही मंदी विश्वास इडस्काड्यार, वार भविष्य शप्पे आत्माल, याय फसाय मतताय आटला तीकुड तीरग्यार, 2इदी आ लबाड मंदी कपट इचांग आय्यी, यवार अंतकरण मिंदा डाग आंटीनेद उंडाद. 3वार मंदीन फेंडली शेस्कुना नियाक फोयार इंगा याद आन्नाम विश्वास फेटेतोर इंगा सत्य ओळखाशेतोर धन्यवाद इच्ची तिनाला आंका परमेश्वर बनायमत्या दान तिना नियाक फोयार.#उत्पत्ती 9:3. 4परमेश्वर येम पण बनायमत्या आदी प्रत्येक वस्तु शिंगार उंडाद इंगा तिनेदेंक योग्य उंडाद, पण इंते उंडाद की परमेश्वरकी धन्यवाद इच्ची तिनाला. 5येनटीक की आदी परमेश्वर वचनता इंगा प्रार्थनाता पवित्र आय फोयताद.
6जर नु इ माटलु विश्वासी आक्का तम्मुळ्ळाक नेरपुती, तर नु यवाड सत्यला इंगा विश्वासला वाढाशीनाव इंगा शिंगार शिक्षणदी अनुकरण शेशीनाव, वाड नु ख्रिस्त येशुन शिंगार सेवक आय्याव. 7पण अशुद्ध इंगा मुसली आंड्योर कथालनोट धुराम निल, नु स्वतान परमेश्वर भक्तीला तैयार शेय. 8येनटीक की शारीरिक व्यायामता रव्वा फायदा तर आयताद पण परमेश्वर सेवाला आन्नी प्रकारे फायदा उंडाद येनटीक की आदी इप्पुड जीवन बद्दल इंगा भविष्यलोन जीवन बद्दल आशिर्वादीत अभिवचन उंडाद. 9इदी वचन विश्वासयोग्य उंडाद याद नेहमी स्वीकार शेशेदेंक योग्य उंडाद. 10दिनिचांग मिम कष्ट इंगा संघर्ष शेस्ताम, येनटीक की माद आशा आ जित्ता परमेश्वर मिंदा उंडाद, यवाड आंता मंदीद इंगा विशेष रुपता विश्वासी मंदीद तारण शेशेतोड उंडाड.
तीमथ्यद खाजगी जीवनक्रम इंगा शिक्षण
11इ माटलाद आज्ञा इ इंगा नेरपुका उंड. 12यवारुच नी जवानीन तुच्छ समजायाराद, तर माटलाडेद, चालचलन, प्रेम, (आत्माला) विश्वास इंगा शुद्धता इ माटलाला विश्वासी मंदी इचांग आदर्श बनाय. 13निन वच्ची नंताक वाचाशेद, बोध शेशेद इंगा नेरपेद, इ माटला तीकुड लक्ष इ. 14आब्बागार नी मिंदा शेय फेट्टी भविष्यवाणी शेशीर आंका याद कृपादान नीक शिक्या, दान तीकुड दुर्लक्ष शेयाक. 15आ आन्नी माटला तीकुड पुर्ण लक्ष इ, आटलालाने मन आंची फेट. दिनिचांग की नीद उन्नती आंता मंदीक कमसाला. 16नु स्वता बद्दल इंगा नी शिक्षण बद्दल सावध उंड इंगा इ माटलाला टीकाशी उंड, येनटीक की जर नु इल्ला शेस्का उंटी तर नु स्वतान इंगा यवार नीद इंटार वारनी पण बतका मत्याव.
Currently Selected:
1TI 4: WNT
Highlight
Copy
Compare
Share
Want to have your highlights saved across all your devices? Sign up or sign in
