दिस.वचन 7

इसराइल रिनकु मि लाख चौवालीस हजार होड़

1 # जिर 49:36; दानि 7:2; जखरि 6:5 नोःआँ तयोम ईङ धरती रेनअः चाईरो कोना रे चाईर सिरमादूत तिंगु उनकु नेल लिकुईंङ। हुंकू धरती रेनअः चाईरो होय के थंभाव थिलाआकु जेकर से धरती चाहे समुदर चाहे जहान सिंङ रे होय आलु चलाव कोअ। 2तेकर ईङ आउर मियांड सिरमादूत के जिवीःड परमेसर आला मरका के सा:ब केते पुरूब तरअः तेंग रकाबोअ नेल लियीङ, हुनी हुंकू चाईरो सिरमादूत तरअः जेके धरती आउर समुदर रअः हराकाईत लःअय हक एमा ताही लिकुआकु, जोर से हकाव केते कंहड़ी लअकु, 3#जहेज 9:4,6“आले अपन परमेसर आलकु बंधाउवाकु आला समांग रे मरका काले लगाय जगुत, धरती आउर समुदर आउर सिंङ के आलपे हराकाईत के।”

4आउर जेकर रे मरका लगाव ताही लअकु हुंकू आला गनती आयुम लाईङ, माने कि इसराइल आलकु होपोन आलकु जामा गोतोर मेसे मि लाख चौवालीस हजार रे मरका लगाव लअकु। 5जहुदा आला गोतोर मेसे बारा हजार रे मरका लगाव लअकु, रूबेन आला गोतोर मेसे बारा हजार रे, गाद आला गोतोर मेसे बारा हजार रे, 6आसेर आला गोतोर मेसे बारा हजार रे, नपताली आला गोतोर मेसे बारा हजार रे, मनस्सेस आला गोतोर मेसे बारा हजार रे, 7सिमोन आला गोतोर मेसे बारा हजार रे, लेवी आला गोतोर मेसे बारा हजार रे, इसकार आला गोतोर मेसे बारा हजार रे, 8जबुलोन आला गोतोर मेसे बारा हजार रे, जोसेफ आला गोतोर मेसे बारा हजार रे, आउर बिनयामिन आला गोतोर मेसे बारा हजार रे मरका लगाव लअकु।

मियांड बड़े भींड़

9नोःआँ तयोम ईङ नजाईर लिईङ, आउर नेल लाईङ, आउर नेलेपे, जामा जाईत आउर बंसवाईर आउर होड़ आउर भाखा मेसे मियांड नोकान भींड़, जेके ओके होः काकु लेखा दाड़ीकेना, हुंकू पुँड़ी गेन्दरअ सोलोंग केते आउर अपन तीः रे किन्दा:ड रअः डाईड़ इदी केते राईज गदी आउर पठरु रेनअः मड़ांग तिंगु ताही नेनाकु। 10आउर जोर से हकाव-हकाव कंहड़ी केनाकु, “उधार आबु आली परमेसर जे राईज गदी रे दुड़ूः तनाय, आउर पठरु तरअः एदनाआ!” 11आउर जामा सिरमादूत होना राईज गदी आउर परधान कु आउर चाईरो परानीकु चौगिरदा तिंगु तानाकु; फिन हुंकू राईज गदी मड़ांग हुबहुबू नुर नेनाकु आउर परमेसर के आराधना लियाकु। 12हुंकू कंहड़ी लअकु, “आमीन! आले आली परमेसर आला इसतुती आउर महिमा आउर बुधी आउर धन्यवाद आउर इमान आउर समरथ आउर सकती जुग-जुग बनाल ताहिन। आमीन!”

13परधान कु मेसे मिहोंड़ ईङ के बेता लिङाय “नुकू पुँड़ी गेन्दरअ सोलोंग उनकु ओके हेके? आउर ओका तरअः हीःग तानाकु?”

14 # दानि 12:1; सं.मत्‍ती 24:21; सं.मर 13:19 ईङ हुनी के बेता लियीङ, “ए गोमके, आमगी पड़ीआम।”

हुनी ईङ के बेता लिङाय, “नुकू हुंकू हेके, जे होना मुरुक बड़े बिपाईत तरअः उडुंग केते हीःग तानाकु, नुकू अपन-अपन गेन्दरअ पठरु आला मयोम तरअः नुरहा केते पुँड़ी तदाकु। 15हिना लःअय हुंकू परमेसर आला राईज गदी दुबाःड़े तिंगु ताही नोआकु, आउर निदा ना सिंङ हुनी आला ओड़ाअ रे हुनी के सेवाई याकु, आउर जे राईज गदी रे दुड़ूः तनाय, हुनी हुंकू लोः ताही केते जतन किकुआय। 16#जसा 49:10हुंकू फिन इरकु रांगे:ग तेतांगोआ; आउर ना हुंकू तेंग रे सितोम, ना सेकाव कोआकु, 17#सिरिंग 23:1; जहेज 34:23; सिरिंग 23:2; जसा 49:10; जसा 25:8एता लःअय ची राईज गदी रेनअः ताला रे पठरु एदानिया हुंकू के होरहो किकुआय, आउर हुंकू के जिनगी रुपी दाअः रेनअः सोत दुबाःड़े डहराव इदी किकुआय, आउर परमेसर हुंकू आला मेःड तरअः जामा मेःड दाअः के जो:ड केआय।”

Currently Selected:

दिस.वचन 7: ASR

Highlight

Copy

Compare