दिस.वचन 6

सात गोड़ मरका के खो-खोलाव

1आउर ईङ नेल लाईङ ची पठरु होना सात मरका मेसे मियांड के खोलाव लःअय, आउर होना चाईरो परानी मेसे मियांड आला घिड़काअ लकान सबद आयुम लाईङ, “हिजोअ मे!” 2#जखरि 1:8; 6:3,6आउर ईङ आला मेःड मड़ांग रे मियांड पुँड़ी घोंड़ा नेल नेनाय। जे हुनी रे देःग उनी आअसार साःब उनी थिनाय, हुनी आअसार इदी थिलाआय। हुनी के मियांड मुकूट एमा लियाकु आउर हुनी जीताअ लःअय जीताव यअते उडुंग नेनाय।

3जब हुनी दुसरा मरका खोलाव लःअय, दो ईङ एटाअ परानी के नोःआँ कंहड़ी यअते आयुम लियीङ, “हिजोअ मे!” 4#जखरि 1:8; 6:2फिन आउर मियांड घोंड़ा उडुंग नेनाय, जे गोला ताही नेनाय, हुनी तेङ रे देःग उनी के नोःआँ हक एमा लियाकु ची दुनिया रेनअः मेल मिलाप के इदी गुल ताय, जेकर से ची होड़कु हुनी-नुई के गोएःग कु, आउर हुनी के मियांड बड़ेअ केन तलवाईर एमा लियाकु।

5 # जखरि 6:2,6 जब हुनी तीसरा मरका खोलाव लःअय, दो तीसरा परानी के नोःआँ कंहड़ी यअते आयुम लियीङ, “हिजोअ मे!” ईङ नेल लाईङ, आउर नेलेपे, मियांड कड़िया घोंड़ा एदानिया, हुनी रे रकाःब उनी आला तीः रे मियांड सेर-ढारा एदनाआ; 6आउर ईङ हुंकू चाईरो परानी रअः ताला तरअः नोःआँ सबद कंहड़ी यअते आयुम लाईङ, ची आकाल बेरा “मुसिङ रेनअः बनहींयारी रेनअः मि किलो गोहोम, आउर मुसिङ रेनअः बनहींयारी रेनअः पे किलो जाव, आउर सुनूम आउर जोजो लअः अंगुर रस के आलुम हराकाईत के।”

7आउर जब हुनी चौथा मरका खोलाव लःअय, दो चौथा परानी के नोःआँ कंहड़ी यअते आयुम लियीङ, “एला!” 8#जहेज 14:21ईङ नजाईर लाईङ, आउर नेल लाईङ ची मियांड ससांग रंग लकान घोंड़ा एदानिया आउर हुनी आला नुमू मराईन हेके, आउर होना तयोम-तयोम पताल एदनाआ, आउर हुनी के धरती रेनअः चाईर हिसा मेसे मि हिसा रे नोःआँ हक एमा लियाकु, ची तलवाईर, आउर आकाल, आउर मारी, आउर धरती रिनकु बुरु जनवर तरअः होड़कु के गोएःग कु।

9हुनी पाचवाँ मरका के खोलाव लःअय, दो ईङ बिदी रेनअः लतार रे हुंकू आला जीव के नेल लाईङ, जे परमेसर आला बचन रेनअः चलते आउर होना गोवाही रअः चलते जे हुंकू एम ताही लअकु के गोएःग थिलकुआकु। 10हुंकू जोर से हकाव केते कंहड़ी लअकु, “ए गोमके, ए पबितर आउर सचाई आम ओका हिला जगुत एरोम नेयाया? आउर धरती रे ताहिनोअ कु तरअः आले आला मयोम रेनअः बदला ओका बेरा जगुत एरोम इदिया?” 11हुंकू मेसे जामाकु के पुँड़ी गेन्दरअ एमा लिकुआकु, आउर हुंकू के बेता लिकुआकु ची आउर थोड़ेक दिरी जगुत सथाअ पे, जब तक ची आपे आलकु बंधाउवा गाती आउर बोकोकु जे आपे लकान बलिदानोअ वाला एदान कुआ हुंकू आला होः गनती आलु पुरायोअ।

12 # दि.वचन 11:13; 16:18; जसा 13:10; जोए 2:10,31; 3:15; सं.मत्‍ती 24:29; सं.मर 13:24,25; सं.लुका 21:25 जब हुनी छटवाँ मरका खोलाव लःअय, दो ईङ नेल लाईङ ची अजमजोर भुईंडोल हुयाव नेना, आउर सिंङ बोंगा भेंड़ा कंबड़ा लकान कड़िया, आउर चानु मयोम लकान पुरा गोलाअ नाय। 13#जसा 34:4आउर सिरमा रिनकु इपील धरती रे नोकान नुर नेनाकु जे लकान ची गर्ड़रा तरअः हिलाव केते अंजीर सिंङ तरअः बेरेल जोअ झड़ाआ। 14#दि.वचन 16:20आउर सिरमा नोकान फाड़ा केते कुंड़ा नेना जे लकान कागज कोड़मोड़य रे कुंड़ा जुनोआ, आउर जामा बुरु, आउर टापु, अपन-अपन ठाँव तरअः ओचोअ ना। 15#जसा 2:19,21आउर दुनिया रिनकु राजा, आउर परधान कु, आउर सरदारकु, आउर धनगारकु, आउर सवांगियाकु, आउर जामा बंधाउवाकु, आउर आजादकु बुरु रेनअः मांड़ा रे आउर सेरेंग खटखुंड़ खोड़पा: रे सेन ऊकुअ नाकु, 16#होसे 10:8; सं.लुका 23:30 आउर बुरु आउर सेरेंग खटखुंड़ आउर खोड़पा: तरअः कंहड़ीः दाकु, “आले तेंग रे नुरोअ पे, आउर आले के हुनी आला आहा तरअः जे राईज गदी रे दुड़ूः तनाय, आउर पठरु आला खीस तरअः उकु लेमे। 17#जोए 2:11; मला 3:2एता लःअय ची हुंकू आला खीस रेनअः भयभयान दिन हीःग सोदोर ताना। नोकान ओके एदानिया जे नोःआँ के झेलाव दड़ीआय?”

Currently Selected:

दिस.वचन 6: ASR

Highlight

Copy

Compare