फिलिप्पी 1

1 # प्रे.कामी 16:12 फिलिप्पी रे ताहिनोःकु ईसु ख्रीस्त आलकु जामा पबितर होड़कु लःअय, आउर हुंकू आलकु अध्यकछ कु आउर धरम से-सेवाकु आला नुमू ख्रीस्त ईसु आलकु से-सेवाकिन पौलुस आउर तिमुथियुस आला चिठी।

2आबु आली बाबा परमेसर आउर परभु ईसु ख्रीस्त पखी तरअः आपे के दया आउर सानती भेटाव एकान।

पौलुस आला बिनती

3ईङ जब-जब आपे के उईहार पिईंग, दो तब-तब परमेसर के धन्यवाद एमायीङ। 4ईङ जामा बेरा अपन जामा बिनती रे खुसी ते आपे जामाकु लःअय बिनती यींग, 5एता लःअय ची आपे सुरू तरअः गी नहाअः जगुत बेस खभाईर रअः कामी रे भागीदार दारापेआ। 6जे आपे रे नोःआँ बेस कामी के एहेःब लःअय, होना के ख्रीस्त ईसु आला हिजोअ रअः दिन जगुत हिनी नोःआँ काम के पुरा केआय, नोःआँ रअः ईङ के पुरा बिसवास एदनाआ। 7आपे जामाकु रअः बारे रे ईङ लःअय नोकान सोसोचाव उचित एदनअ। एता लःअय ची आपे जामा ईङ आला मन रे बसाव तानापे। आउर ईङ सिक्‍काड़ रे तोल लिदी इदानिङा चाहे ईङ बेस खभाईर रअः सचाई रअः सबुत एमेईंग, दो आपे जामा ईङ आलकु दया रे भागी हुयाव तनापे। 8परमेसर गोवाह एदानिया ची ईङ ख्रीस्त ईसु आला दुलार रे बढ़ाव केते, आपे के ईकिन तरसा यिङ।

9परमेसर तरअः ईङ आला नोःआँ बिनती एदनाआ, ची आम आला पेरेम, गेयान चाहे जामा लकान समझ सहिंत आउर गी बढ़ाव सेन। 10जेकर से ची नोःआँ गुन के नाम केते बेस का-बेस रे फरक नाम केते, जामा बेरा भलाई के अपनाय पे। आउर नोःआँ लकान आपे ख्रीस्त हिजोअ जगुत पबितर चाहे बेकासुर बनाव ताहिन पे। 11आउर परमेसर आला महिमा आउर स्तुति लःअय आपे होना धरमिकता रअः जोअ तरअः पेरेःग सेनपे। जे ईसु ख्रीस्त तरअः भेटाआ।

पौलुस आला बिपाईत परभु आला कामी रे मदाईत

12ए बोको बोयहाकु, ईङ आपे के उउदूः नामिंग ची ईङ रे जे बिताव ताना, होना बेस खभाईर के प-परचार रे मदाईत भेटाव ताना। 13#प्रे.कामी 28:30नोःआँ जगुत ची कैसर आला बंगला रिनकु समुचा पलटन आउर एटाअ जामा होड़कु के नोःआँ पता चलाव ताना, ची ईङ ख्रीस्त रअः चलते गी सिक्‍काड़ रे तोल तनिङ। 14ढेर बोकोकु के ईङ आला हाथकड़ी रअः चलते साहस भेटाव ताना। हुंकू परभु रे भरसा दोहो केते, पहिल तरअः जादे हिमत ते बे बोर-भय रे बेस खभाईर के सुनायाकु।

15नोःआँ साचेआ ची हुंकू मेसे थोड़ेक हिसंगा आउर बैर रअः चलते ख्रीस्त आला परचारेआकु, बकिर एटाअ होड़ बेस इकछा तरअः ख्रीस्त आला परचारेआकु। 16नुकू होड़ पेरेम रअः चलते नोकानेआकु, एता लःअय ची नुकू पड़ीआकु, ची परमेसर बेस खभाईर रअः स-साबित लःअय गी ईङ के नोआँड़े दोहो तदिङाय। 17बकिर थोड़ेक होड़ दो सचाई लोः कोवान, बकिर अपन गदुस इकछा मोताबकि रे ख्रीस्त आला परचारेआकु, एता लःअय ची हुंकू सोंचायाकु ची नोःआँ तरअः होना हाथकड़ी ईङ लःअय बिपाईत पैदा केआय।

18बकिर नोःआँ रे एतान होः फरक का हुयाआ। जरूरी दो नोःआँ हेके ची एटाअ लकान तरअः, चाहे सचाई सोंच तरअः होः चाहे भला, परचार दो ख्रीस्त आला गी हुयाआ आउर नोःआँ तरअः ईङ के खुसी भेटाआ आउर खुसी भेटाव एका कोआ।

19एता लःअय ची ईङ पड़ीईंग ची आपे आला बिनती आउर होना मदाईत तरअः जे ईसु ख्रीस्त आला आतमा रअः दान तरअः नोःआँ रेनअः मतलोब ईङ आला उधार हुयाव कोआ। 20ईङ आला तेज इकछा आउर आसरा एदनाआ नोःआँ हेके ची, ईङ के ओका बात तरअः होः लाजोअ एरे पड़ाआ बकिर चाहे ईङ जिवीःड ताहिनोईंग चाहे गोजो-ईंग, पुरा डिढ़ते ख्रीस्त आला बड़ाई ईङ आला होड़ो तरअः जामा बेरा हुयाव एकान। 21एता लःअय ची ईङ लःअय जिवीःड ताहिनोअ ख्रीस्त हेके, आउर गोएःग जुनोः फयदा एदनाआ। 22बकिर जदि होड़ो रे जिवीःड ताहिनोअ गी ईङ आला कामी लःअय फयदा एदनाआ, दो ईङ काईंग पड़िआ, ची ओका के निबाड़िईंग। 23ईङ बनार रअः ताला रे लटकाव तानिङ, ईङ दो चहाईङ ची जिनगी तरअः बिदा केते ख्रीस्त दुबाःड़े सेनोः जुनोईंग, एता लःअय ची नोःआँ मुरुक गी बेस एदनाआ। 24बकिर होड़ो रे ताहिनोईङ के आपे लःअय आउर गी जादे दरकार एदनाआ। 25ईङ के पुरा बिसवास एदनअ ची ईङ आपे लोः साँघे ताही केते, आपे के मदाईत पिईंग, जेकर से ची आपे मड़ांग बढ़ाअः पे आउर आपे बिसवास रे खुसी ते बढ़ाअः पे। 26नोःआँ लकान जब ईङ फिन आपे दुबाःड़े हिजोईंग, दो आपे ईङ रअः चलते ख्रीस्त ईसु रे आउर गी ढेर गौरव दाड़ीपे।

27आपे मियांड बात के धेयान एम पे, आपे आला चईल-चलन ख्रीस्त आला बेस खभाईर लकान हुयाआ चाही, नोःआँ लकान ईङ हीःग केते आपे के नेल पेईंग चाहे आलुईंग हिजोअ, ईङ लंका रे ताही केते आपे रअः बारे रे आयुमेईंग, ईङ के नोःआँ पता हुयाअः चाही ची आपे मिजुट ताही केते, मजगुत बनाल एदान पेआ, मि मन केते, बेस खभाईर रे बिसवास लःअय कुरनीस दापे। 28आउर आपे बिरोधी कु तरअः काईटको होः कापे बोरा। आपे आला डिड़ परमेसर आला बरदान हेके आउर नोःआँ हुंकू बिरोधी कु लःअय मियांड चिनहा हुयाव कोआ ची हुंकू आला नसोअ हुयाव कोआ आउर आपे लःअय उधार हुयाव कोआ। 29एता लःअय ची ख्रीस्त रअः चलते आपे रे नोःआँ बरदान भेटाव ताना ची ना खाली हुनी रे बिसवासे पे, बकिर हुनी लःअय होः दुख उठायपे। 30#प्रे.कामी 16:19–40 आपे हिना बिपाईत रे मड़ांग बड़हाअ लःअय जुड़ाव तनापे, जेकर रे ईङ जुड़ाव ताहिनिंग आउर जे लकान ची आपे आयुमेआपे नहाअः जगुत ईङ हिना रेगी लगाव तानिङ।

Currently Selected:

फिलिप्पी 1: ASR

Highlight

Copy

Compare