फिलिप्पी 2

मिजुट केते हुनी-नुई के धेयान एमा कुपे

1जदि ख्रीस्त रे थोड़ेक संतवाना, आउर दुलार तरअः साहस आउर आतमा रअः भागीदारी एदानमेआ, आउर थोड़ेक करुना आउर माया एदनअ, 2दो ईङ के पुरा खुस चिङ पे, ईङ चाहाईंग, ची आपे मि-मन तहिनपे, हुनी-नुई के मि लकान पेरेम कुपे, आतमा रे मि-जामुक ताहिन पे, आउर मि लकान गी लछ दोहोय पे। 3हिसंगा आउर बेकार रअः घमंडी तरअः एतान होः आपे एतान के, बकिर नमर बनाअः पे, एटाअकु के अपन तरअः बढ़ियाँ समझाअ पे। 4आपे मेसे जामा झन के चाही ची अपन भाईर लःअय कोवान, बकिर एटाअकु आला इकछा के होः धेयान एमपे।

ख्रीस्त आला स्वाभाव

5जे लकान ख्रीस्त ईसु आला बिचार ताहिना, हिना लकान गी आपे आला होः बिचार हुयाअः चाही।

6जे परमेसर आला भेस रे हुयाव केते होः

परमेसर आला बराबईर हुयाअः के अपन कबजा रे दो-दोहो रेनअः जिनीस काय समझाव नेना।

7बकिर अपने के सुन्य लःअय

हुनी बंधाउवा रअः भेस रे इदी केते,

आउर मनवाकु बराबईर बनाव नेनाय,

8आउर हुनी होड़ रअः भेस रे दिसतार केते अपन के नमर नेनाय,

हाँ, अपन जिनगी एमोअ जगुत आउर कुरूस रे गोजोअः जगुत, हुकूम मनाअ वाला बनाव नेनाय।

9हिना लःअय परमेसर हुनी के अगम महान बनाव लियाय,

आउर हुनी के होना नुमू एमा लियाय, जे जामा नुमू तरअः तेंग एदनाआ,

10 # जसा 45:23 जेकर से ची ईसु आला नुमू रे सिरमा,

ओत आउर पताल रिनकु जामा ताहिनोःकु इकड़ूमेकु,

11आउर बाबा परमेसर आला महिमा लःअय जामा होड़ नोःआँ गरहानेकु,

ची ईसु ख्रीस्त गी परभु हेके।

दुनिया रे ढिबरी लकान लवकाः पे

12दुलार बोकोकु, आपे जामा बेरा ईङ आला बात के मनाव एकानपे, हिना लकान नहाअः होः ईङ आपे होड़कु तरअः लंका रे ताहिनोईंग, सेरे होः आपे बोर आउर थरथराअते अपन उधार रअः कामी लःअय लगाव ताहिन पे। 13एता लःअय ची हुनी परमेसर गी हेके, जे अपन बेस इकछा रअः चलते, आपे के होना कामी रअः इकछा आउर होना कामी के पुपुराव लःअय समरथ एमेआय।

14आपे बेगार जहान सिकाईत चाहे लड़ाई-झगड़ा केते जामा कामी एकायपे, 15#कन 32:5जेकर से आपे बेकासुर आउर सीधा-सधा बनाव ताहिन पे, आउर नुकू टेढ़हा आउर मि-हठिया होड़कु ताला रे परमेसर आलकु निसकपट होपोन बनाअः पे, सिरमा रिनकु इपील लकान दुनिया रे लवकाअ पे। 16जब आम हुंकू के जिनगी रअः बेस खभाईर उदूऊ कुआम दो आम निकानेमे गी, नोःआँ लकान फिन ख्रीस्त दोबारा रूवाड़ोः बेरा नोःआँ के नेल केते ची ईङ आला जिनगी रअः नीर बेकार का सेन ताना, ईङ आपे बारे रे घंमन्ड दाड़ींग।

17जदि ईङ के आपे आला बिसवास रुपी बलिदान आउर धरम सेवा रे अपन जीव होः दान रकाःब पड़ाअ, सेरे होः ईङ खुस इदानिङा, आउर आपे लोः होः खुसी मनायींग। 18हिना लकान आपे होः खुस ताहिन पे, आउर ईङ लोः होः खुसी मनायपे।

तिमुथियुस आउर इपफ्रुदीतुस

19ईङ के परभु ईसु रे आसरा एदनअ ची ईङ हिजोअ हिला रे तिमुथियुस के आपे दुबाःड़े कुलगोःडियीङ, जेकर से आपे रअः बारे रे खभाईर पाड़ी केते ईङ के सानती भेटाअः। 20ईङ दुबाःड़े ओके होः नोकान होड़ कनिकुआ, जे तिमुथी लकान सचा मन तरअः आपे के भलाई रअः धेयान एमेकु। 21एता लःअय ची जामा ईसु ख्रीस्त आला कोवान, बकिर अपन हित रअः खोजाईर रे ताहिनोआकु। 22बकिर आपे तिमुथी आला चाईल के पड़ीआपे, जे लकान जाहें होपोन अपन बाबा लोः ताही केते कामीआय, हिना लकान हुनी बेस खभाईर रअः कामी गाती ईङ के सेवा गाती तदिङाय। 23ईङ आसरा दोहोयिङ ची जाइसने गी ईङ के पता चलाआ ची ईङ लोः एतान हुयाअः वाला एदनअ, ताइसने ईङ तिमुथी के तुरते आपे दुबाःड़े कुलगोःडियीङ। 24आउर ईङ आला बिसवास एदनअ ची परभु आला मदाईत तरअः ईङ होः तुरते गी हिजोईंग।

25ईङ अपन बोको, साँघे ककामी वाला आउर गाती-गाती लड़ाअ वाला इपफ्रुदीतुस के आपे दुबाःड़े कु-कुलगोःड जरूरी समझाव नेनिंग। आपे हुनी के ईङ आला दरकार के पुपुराव लःअय अपन से-सेवाई रअः भेस रे ईङ दुबाःड़े कुलगोःड ताही लियापे। 26एता लःअय ची हुनी आला मन आपे रे लगाव ताहीना, हिना चलते हुनी मुरुक ललाईत ताहिनाय ची आपे नोःआँ आयुम ताही लआपे ची हुनी बेमार रे पड़ाव ताहिनाय। 27सही माने रे हुनी मुरुक बेमार ताहिनाय, आउर गोजोअ-गोजोअ तरअः बंचाव नेनाय, बकिर परमेसर हुनी के दया लियाय, आउर हुनी भाईर रे कोवान, बकिर ईङ रे होः गी जेकर से ची ईङ के दुख तेंग रे दुख आलु सासहाव पड़ाव कोअ। 28हिना लःअय ईङ हुनी के झट-पट कु-कुलगोःड लःअय सोंचाव तादिंग ची आपे हुनी लोः भेंट केते खुसोअ पे, आउर ईङ आला चिन्ता होः घटाव कोआ। 29आपे परभु रे खुसी ते हुनी के स्वागतिपे। आपे के नोकान होड़कु के अ-आदर चाही। 30एता लःअय ची हिनी ख्रीस्त आला कामी लःअय अपन जीव ताय के कठिन रे पड़ाव केते, गोजोअः लकान ताहिनाय, जे घटी आपे पखी तरअः ईङ आला सेवा हुयाव ताहिना, होना के पुरायाय।

Currently Selected:

फिलिप्पी 2: ASR

Highlight

Copy

Compare