संत.मत्‍ती 23

परमेसर आला बचन सि-सिखावकु आउर फरीसीकु तरअः बंचाव केते ताहीनोः पे

(संत.मरकुस 12:38–40; संत.लुकास 11:43,46; 20:45–46)

1हिमीन बेरा ईसु तुन्दरा होड़कु के आउर आनेःग आलकु चेलाकु के बेता लिकुआय, 2“धरम पुथी सि-सिखावकु आउर फरीसीकु मुसा आला गदी रे दुड़ूः तानाकु 3हिना लःअय हुंकू आपे के, जे कंहड़ी याकु होना रे चलाअ पे, आउर होना के मनाअ पे, बकिर हुंकू आला काम लकान आलपे कामी के। एता लःअय ची हुंकू कंहड़ी दो कंहड़ी याकु, बकिर काकु कमिया। 4हुंकू मुरुक बोझा तोल केते होड़कु आला खांध रे लदीओ-कुआकु, बकिर आकु अंगड़ी रे होः होना के टु-टुंड़ाअ होः काकु नामा। 5#सं.मत्‍ती 6:1; कन 6:8; गन 15:38हुंकू जामा कामी के होड़कु के दे-देखाव लःअय कामीयाकु। हुंकू अपन बाँईंह आउर समांग रे वचन के बड़े-बड़े फेटा रे, लिखा केते तोलेआकु, आउर सोलोंग गेन्दरअ ताकु रअः आँचड़अ तेके जिलीङेआकु, जेकर से ची होड़कु हुंकू के धरमी समझाआकु। 6भोज कुन रे मड़ांग रे आउर बिनती ओड़ाअ रे मड़ांग ठाँव रे दुड़ुगोः बेस आदा कुआ, 7आउर बजार रे जोहार चिनोः आउर होड़कु तरअः ‘गुरू, कंहड़ीः चिनोः नामाकु नोःआँ जामा के हुंकू मुरुक पतिया आकु।’ 8आपे गुरू आलपे कंहड़ीः चिन कोअ, एता लःअय ची आपे आली मियांड ठुका गुरू एदानिया आउर आपे जामाकु बोको बोयहा कु हेके। 9ओत रे ओके केहोः अपन ‘बाबा,’ आलपे कंहड़ी के, एता लःअय ची आपे आली मियांड ठुका बाबा एदानिया, जे सिरमा रे एदानिया। 10‘अगुवा,’ आलपे कंहड़ीः चिन कोअ, एता लःअय ची आपे आली मियांड ठुका अगुवा एदानिया आउर हुनी ख्रीस्त हेके। 11#सं.मत्‍ती 20:26,27; सं.मर 9:35; 10:43,44; सं.लुका 22:26जे आपे मेसे जामा तरअः बड़ेआय, हुनी आपे आली धाँगड़ पड़ीयो आय। 12#सं.लुका 14:11; 18:14जे अपन के बड़े मेन गेआय, हुनी के छोटे बनाव चिकियाय आउर जे अपन के छोटे मेन गेआय, हुनी के बड़े बनाव चिकियाय।

सात गोड़ भयभयान

(संत.मरकुस 12:40; संत.लुकास 11:39–42,44,52; 20:47)

13“ए ढोंगी धरम पुथी सि-सिखावकु आउर फरीसीकु आपे के भयभयान हुयाव कोआ, आपे मनवाकु लःअय सिरमा राईज रअः दुवार के जापुःड गुल तआ पे, आपे खुदे कापे बोला आउर जे बोल नामाकु, हुंकू के होः कापे बोलोअ चिकुआ।

14-15 # 23:14–15 जामा तरअः बढ़ियाँ मारी पुथी रे नोःआँ 14 पद कनोआँ। “ए ढोंगी, धरम पुथी सि-सिखावकु आउर फरीसीकु आपे के भयभयान हुयाव कोआ! जाहुदी मत के मनाअ-कु आपे समुदर आउर धरती रे परोम जुनोआपे आउर जब हुंकू चेला बनाव जुनोआकु दो आपे हुनी के अपन तरअः जादे दु गुना नरक रिनी होड़ बनाव कुआपे।

16“ए अंधरा नेताकु, आपे के भयभयान हुयाव कोआ, आपे कंहड़ीआपे ‘जदि जाहें बड़े बिनती ओड़ाअ रअः किरया जोमेआय, दो नोःआँ रअः एतान होः मतलोब कनोआँ, बकिर जदि जाहें बड़े बिनती ओड़ाअ रअः सोना रअः किरया जोमेआय, दो हुनी तोल जुनोआय।’ 17ए मुर्ख, आउर अंधराकु एतान बड़ेआ सोना चाहे बड़े बिनती ओड़ाअ जेकर से ची होना सोना पबितर जुनोआ? 18आपे नोःआँ होः कंहड़ीआपे, ची ‘जदि जाहें बिदी रअः किरया जोमेआय, एतान होः कनोआँ, बकिर हुनी होना रे दोहो उना भेंट रअः किरया जोमेआय, दो हुनी तोल जुनोआय।’ 19ए अंधराकु, ओका बड़ेआ भेंट चाहे बिदी, जेकर से ची होना भेंट पबितर जुनोआ? 20हिना लःअय जे बिदी रअः किरया जोमेआय, हुनी होना बिदी रअः आउर होना रे दोहो लेनअ जिनीस रअः होः किरया जोमेआय; 21जे होड़ बड़े बिनती ओड़ाअ रअः किरया जोमेआय, हुनी बड़े बिनती ओड़ाअ रअः भाईर कोवान, बकिर होना लोः होना रे ताही नुई परमेसर आला होः किरया जोमेआय, 22#जसा 66:1; सं.मत्‍ती 5:34आउर जे सिरमा रअः किरया जोमेआय, हुनी परमेसर आला राईज गदी आउर होना रे दुड़ूःउनी आला किरया जोमेआय।

23 # लेवी 27:30 “ए ढोंगी धरम पुथी सि-सिखावकु आउर फरीसीकु, आपे के भयभयान हुयाव कोआ आपे फुदेना, सोंप आउर जीरा रअः, दसवाँ हिस्सा के परमेसर के एमाई यापे, बकिर नेयाय, दया आउर बिसवास जे लकान मुसा आला कनहुन रअः खास बात के तुछ कंहड़ीआपे। नोःआँ के का-कामी एका आउर होना के होः का तु-तुछ आपे लःअय दरकार ताहिना। 24ए अंधरा नेताकु, आपे भुंसड़ी के दाअः तरअः छाँड़ा कुआपे, बकिर ऊँठ के दो ऊ:ड गोअ तआकुआपे।

25“ए ढोंगी, धरम पुथी सि-सिखावकु आउर फरीसीकु, आपे के भयभयान हुयाव कोआ आपे डुभनी के आउर थरिया के बाहरी तरअः दो गितीलेआपे, बकिर भीतरी रे दो रे-रेःग आउर मौज-मस्ती रे पेरेःग उना एदनाअ। 26ए अंधरा फरीसी, पहिल रे डुभनी के भीतर तरअः गितील केपे, जेकर से ची होना बाहरी तरअः होः निमन जुनोः।

27 # प्रे.कामी 23:3 “ए ढोंगी, धरम पुथी सि-सिखावकु आउर फरीसीकु आपे के भयभयान हुयाव कोआ, आपे गोसोः ओना मारघटा लकानापे, जे बाहरी तरअः दो बेस नेलोआ, बकिर भीतरी रे गोएःग उनकु आला जांग आउर जामा लकान खादर रे पेरेःग ओना एदनाअ। 28निआँ लकान आपे होः बाहरी तरअः होड़कु के, धरमी नेलोआपे। बकिर भीतरी तरअः कपट आउर अधरम तरअः पेरेःग उनकु एदान पेआ।

29“ए ढोंगी , धरम पुथी सि-सिखावकु आउर फरीसीकु, आपे के भयभयान हुयाव कोआ, आपे आगमजानीकु आला मारघटा बनायापे आउर धरमीकु आला मारघटा के सिंगरायापे। 30आउर कंहड़ीआपे, जदि आले अपन पुरखाकु समय बेरा जिवीःड ताही कोआले होले, आले आगमजानीकु के गो-गोएःग रे, हुंकू लोः एरले भागी ताही ताकु केआ। 31निआँ लकान आपे अपन बिरोध रे नोःआँ गोवाही एमेआपे ची आपे आगमजानीकु के गो-गोएःगकु आलकु बंसवाईर हेके। 32दो आपे आलकु पुरखाकु सुरू लअः कामी के पुरायापे।

फरीसीकु आउर धरम पुथी सि-सिखावकु के डांड़

33 # सं.मत्‍ती 3:7; 12:34; सं.लुका 3:7 “ए बिंङ, आउर कराईट आलकु छउना, आपे नरक रअः डांड़ तरअः एता लकान बंचाव कोआपे? 34हिना लःअय आपे के उदूगोः दिपीईंग, ईङ आपे दुबाःड़े आगमजानीकु, बुधीमनकु, आउर धरम पुथी सि-सिखावकु के कुलगोःड कुईंग, आपे हुंकू मेसे इकिन के गोएःग किकुआपे आउर कुरूस रे रकाःब किकुआपे, आउर आपे आला बिनती ओड़ाअ रे इकिन बगरा के कोड़राव किकुआपे आउर सहर-सहर रे सताव एका-किकुआपे। 35#एहेः 4:8; 2 इति 24:20,21जे धरमी हाबिल तरअः लेईकेते बरखियस आली होपोन जकरियस जगुत, जेके आपे बड़े बिनती ओड़ाअ आउर बिदी रअः ताला रे गोएःग ताही लिकुआपे, जेतना धरमीकु आला मयोम ओत रे तु नेना, होना जामा आपे आला बोहोः रे पड़ाव कोआ। 36ईङ आपे के सचे कंहड़ी तानिङ ची नोःआँ जामा नोःआँ पीढ़ी रिनकु आला बोहोअ रे पड़ाव कोआ।

जिरोसालेम रे ईईयाम

(संत.लुकास 13:34–35)

37“ए जिरोसलेम, ए जिरोसालेम, आम हुनी हेके जे आगमजानीकु के गोएःग कुआम, आउर आम दुबाःड़े कुलगोःड लिनकु के टुकू तरअः हुमाअ गोएःग कुआपे, ईङ इकिन खेप चहाव निनिंग, ची आपे आलकु बंसवाईरकु के जवार कुईंग जे लकान सीम अपन छउना के अपन अफड़ाअः लतार रे साऊंठाव कुआय, बकिर आपे कापे चहाव नेना। 38#जिर 22:5नेलेपे, आपे आला ओड़ाअ उजड़ाव केते बाई कोआ। 39#सिरिंग 118:26ईङ आपे के सचे बेताः दिपीईंग, नहाअः, तरअः ईङ के एरपे नेलिङा, जब तक नोःआँ एरपे कंहड़ीआ, ‘धनया आय हुनी जे परभु आला नुमू रे हिजोआय।’”

Currently Selected:

संत.मत्‍ती 23: ASR

Highlight

Compare

Copy