संत.मत्ती 22
22
बिहा भोज रअः गाम
(संत.लुकास 14:15–24)
1ईसु हुंकू के फिन गाम उदूगोः दिकुआय, हुनी कंहड़ी लःअय, 2“सिरमा राईज हुनी राजा लकाना। जे अपन होपोन आला बिहा रे भोज एमा लिकुआय। 3हुनी नेवताव लिनकु होड़कु के रा-राअः आगु लःअय आनेःग आलकु बंधाउवाकु के कुलगोःड लिकुआय, बकिर हुंकू काकु हिजोअ नाम केना। 4फिन राजा एटाअ बंधाउवाकु के नोःआँ कंहड़ी केते कुलगोःड लिकुआय, ‘नेवताव लिनकु गुतियाकु के बेता कुपे, दु आले अपन भोज तेयार लअः एदनाअ, ईङ आलकु उरीःग, आउर मोटाव-मोटाव जनवर पुजा लिनकु एदान कुआ। 5गुतियाकु नोःआँ रे काकु धेयान लअः, ओके अपन ओत पखी सेनोः नाकु, दो ओके अपन काम धंधा नेनेल सेन नेनाकु।’ 6आउर एटाअ गुतियाकु राजा आलकु बंधाउवाकु के सःब केते धका-मुका हुमाअ केते, आउर हुंकू के हुमाअ गोएःग लिकुआकु। 7राजा मुरुक खीस नेनाय, हुनी अपन पलटनकु के कुलगोःड केते, हुंकू गो-गोएःगकु के गोएःग चबाअः ची लिकुआकु आउर हुंकू आला सहर रे सेंगेल धराव ची लिकुआय। 8तब राजा आनेःग आलकु बंधाउवा ताय तिकु के बेता लिकुआय, ‘बिहा भोज रअः सरा-जमा दो हुयाव चुकाव ताना, बकिर गुतियाकु नोःआँ लकान काकु ठहराव नेना। 9हिना लःअय आपे चौक रे सेनपे आउर जेतना होड़कु भेटाआकु, जामाकु के बिहा भोज रे राअः आगु कुपे।’ 10हिना लःअय बंधाउवाकु संड़क रे सेन नेनाकु, आउर बेस का बेस जे होड़कु भेटाव नेनाकु, जामा के राअः केते आगु लिकुआकु, आउर बिहा मड़वा रे गुतियाकु पेरेःग नाकु।
11“बकिर राजा गुतियाकु के नेनेल सेन नेनाय दो होनाःड़े हुनी नोकान होड़ के नेल लियाय ची हुनी बिहा रअः गेन्दरअ काय सोलोंग थिलाअ। 12राजा हुनी के बेता लियाय, ‘ए बोको, नोआँड़े बिहा रअः गेन्दरअ बेगार सोलोंग ते एता लकान हीःग नाम?’ हुनी होड़ एतान होः काय साड़ी नेना। 13#सं.मत्ती 8:12; 25:30; सं.लुका 13:28तब राजा धाँगड़ तायतिकु के बेता लिकुआय, ‘नुई आला तीः जांगा के तोल केते बाहरी अंधार रे गिड़ी गुलताईपे। होनाःड़े ईइयाम आउर डाटा रि-रिड़िःग पड़ाव कोआ।’”
14“एता लःअय ची राअः उनकु दो ढेर एदान कुआ, बकिर निबाड़ लिनकु थोड़ेअ केनाकु।”
मालगुजारी एमोअ रअः बारे रे सवाल
(संत.मरकुस 12:13–17; संत.लुकास 20:20–26)
15हिमीन बेरा फरीसीकु सेन केते विचार लअकु, ची आबु ईसु के एता लकान हुनी आला अपन बात रे बझाइयाबु। 16फरीसीकु, हेरोद राजा खुड़हा रिनकु के आउर अपन चेलाकु के, ईसु दुबाःड़े नोःआँ सवाल कुकुली लःअय कुलगोःड लिकुआकु, “ए गुरू, आले नोःआँ पाड़ी आले ची, आम सचे कंहड़ी आम आउर सचाई रे परमेसर आला बेस होरा रअः उपदेस एमा कुआम। आम के ओके रअः होः फिकिर कनोआँ, आम मेःड-मुहांड़ नेल केते काम बातेआ। 17हिना लःअय आले के उदूगेमे, आम आला एतान विचार एदनाअ? रोमी महाराजा कैसर के मालगुजारी एमोअ उचित एदनाआ ची कोवान?”
18हुंकू आला का-बेस चाईल के पाड़ी केते, ईसु कंहड़ी लःअय, “ए ढोंगीकु, आपे ईङ के एता लःअय परीकछाः दिङापे? 19मालगुजारी एमोअ वाला मियांड चाँदी रअः ठर्ड़रा आगु केते ईङ के देखायपे।”
जब हुंकू मियांड चाँदी रअः ठर्ड़रा आगु लअकु, 20दो ईसु हुंकू के बेता लिकुआय, “नोःआँ ओके आला छापा आउर ओके आला लिखा लअः हेके?”
21हुंकू उतारा एम लअकु, “रोमी महाराजा कैसर आला।”
नोःआँ रे ईसु हुंकू के बेता लिकुआय, दो “जे रोमी महाराजा कैसर आला हेके, होना के रोमी महाराजा कैसर के एमाई पे, आउर जे परमेसर आला हेके होना के परमेसर के एमाई पे।”
22नोःआँ आयुम केते हुंकू छकित नाकु, आउर ईसु के बाई केते सेनोः नाकु।
जिवीःड-बिरिडोः रअः सवाल
(संत.मरकुस 12:18–27; संत.लुकास 20:27–40)
23 #
प्रे.कामी 23:8
हेन हिला सदुकीकु ईसु दुबाःड़े हीःग नेनाकु, हुंकू आला विचार एदनाअ ची जिवीःड-बिरिडोः कनोआँ। 24#कन 25:5हुंकू ईसु के कुली लियाकु, “ए गुरू, मुसा कंहड़ी तदाय, जदि जाहें बेगार चेंगा रे गोएःग जुनोआय, दो हुनी आली बोको हुनी राँड़ी के बिहा केते अपन बोको लःअय चेंगा जनमाव कुई। 25नहाअः, आले दुबाःड़े सात बोयहा ताही नेनाकु। जामा तरअः बड़े बोयहा बिहा नेनाय आउर बेगार चेंगा रे गोएःग नाय, आउर अपन आउराईत के आनेःग आली छोटे बोको ताय लःअय गोएःग बाईःग तु लियाय। 26माँईझला आउर सांईझला सातों बोयहा लोः, हिकान गी हुयाव नेना। 27जामाकु तरअः तयोम, हुनी आउराईत होः गोएःग नाय। 28नहाअः, जिवीःड-बिरिडोः आकु, दो सातो मेसे ओके आली आउराईत पाड़ी कोआय? हुनी दो सातो लोः बिहा चुकाव थिनाय।”
29ईसु हुंकू के उतारा एमा लिकुआय, “आपे ना दो धरम पुथी के पड़ीआपे आउर ना परमेसर आला समरथ के, हिना लःअय आपे खराब बिचार रे पड़ाव तनापे। 30जिवीःड-बिरिडोः रे ना हेरेल बिहायोआकु, आउर ना गी आउराईत के बिहा रे एमा कुआकु, बकिर हुंकू सिरमादूतकु लकान ताहिनोआकु। 31जहाँ तक गोएःग उनकु जिवीःड-बिरिडोः रअः सवाल एदनाअ, आपे नोःआँ कापे पढ़ाव ताना एतान? ची परमेसर आपे के बेता तदपेआय, 32#उइठ 3:6‘ईङ अब्राहम आली परमेसर हेके, इसाहक आली परमेसर, आउर याकुब आली परमेसर हेके।’ हुनी गोएःग उनकु आली कोवान, बकिर जिवीःड उनकु आली परमेसर हेके।”
33नोःआँ के होड़कु आयुम केते, हुनी आला उपदेस रे मुरुक छकित नाकु।
जामा तरअः बड़े हुकूम
(संत.मरकुस 12:28–34; संत.लुकास 10:25–28)
34जब फरीसीकु नोःआँ के आयुम लअकु ची ईसु सदुकीकु के, अपन जबाप तरअः सुकुड़-दुम ची किदकुआय, दो हुंकू जवार नाकु। 35आउर हुंकू मेसे मिहोंड़ धरम पुथी सि-सिखावकु गेयानी, ईसु के प-परीकछा लःअय हुनी के कुली लियाय। 36“ए गुरू, मुसा आला कनहुन रे जामा तरअः बड़े हुकूम एतान हेके?”
37 #
कन 6:5
ईसु हुनी के बेता लियाय, “‘परभु, अपन परमेसर के अपन गोटा मन तरअः, अपन गोटा आतमा, आउर अपन गोटा बुका तरअः दुलारीमे।’ 38नोःआँ जामा तरअः बड़े आउर पहिला हुकूम हेके। 39#लेवी 19:18दुसरा हुकूम निआँ लकान एदनाअ, ‘अपन खुड़-खिरकी रिनकु के अपन लकान दुलार कुमे।’ 40#सं.लुका 10:25–28निआँ बनार हुकूम तरअः जामा मुसा आला कनहुन आउर आगमजानीकु आला पुथी टिकाव ताना।”
ख्रीस्त ओके आली होपोन
(संत.मरकुस 12:35–37; संत.लुकास 20:41–44)
41जे बेरा फरीसीकु जवार थिनाकु, हिमीन रे ईसु कुली लिकुआय, 42“ख्रीस्त रअः बारे रे आपे आला एतान सोंच एदनाअ? हुनी ओके आली होपोन हेके?”
हुंकू उतारा एम लअकु, “दाऊद आली।”
43नोःआँ रे, ईसु हुंकू के बेता लिकुआय, “तब दाऊद आतमा रअः उलाईर रे, हुनी के परभु एता लःअय कंहड़ीआय? एता लःअय ची हुनी लिखा तदाय,
44 #
सिरिंग 110:1
“‘परभु ईङ आली परभु के बेता लियाय,
आम तब तक ईङ आला जोम पखा दुड़ूः ताहिनोअ में,
जब तक ईङ आम आलकु मुदाई कु के, आम आला जांगा तरी रे काईंग नुर कुआ।’
45जदि दाऊद हुनी के, ‘परभु’ कंहड़ीआय, दो हुनी, हुनी आली होपोन एता लकान हुयाव सकाव कोआय?”
46नोःआँ रअः उतारा रे ओके होः ईसु के मि सबद होः काकु कंहड़ी दाड़ी लअः, आउर हेन-हिला तरअः ओके केहोः आउर एतान सवाल कुकुली लःअय होः का डिढ़ हुयाव नेना।
Currently Selected:
संत.मत्ती 22: ASR
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
