इफिसि 4

ख्रीस्त आला होड़ो रे मि-जामुक

1हिना लःअय ईङ जे परभु आला सेवा रअः चलते जेहेल रे इदानिङा, आपे तरअः गोहराअ तनिङ ची परमेसर आपे के राअः तदपेआय आउर राअः लेनपे लकान चाईल चलाअ पे। 2#कोलो 3:12,13आपे जामा बेरा नमर आउर नरम हिरदाय आउर सासहाव वाला बनाअः पे, एटाअकु के होः पेरेम से सहाव कुपे। 3मेल रअः बंधन रे होना एकता के बनाव दो-दोहो रेनअः कुरनीसे कु जेके पबितर आतमा एमेआय। 4आबु मियांड ठुका होड़ो रिनबु हेके, पबितर आतमा मियांड ठुकाआ, आउर आसरा मियांड ठुकाआ जेकर लःअय आबु राअः लिनबु हेके। 5मियांड गी परभु इदानियाँ, मियांड गी बिसवास एदनअ आउर मियांड ठुका गी बतिस्मा। 6आउर परमेसर मियांड ठुका इदानियाँ जे जामेकु आली बाबा हेके, जे जामाकु तेंग रे राईजेआय, हुनी जामेकु दोवारा कामीयाय आउर परमेसर जामेकु रे डेराया।

कलीसिया रे भरल-पुराल लःअय ख्रीस्त आला बरदान

7बकिर ख्रीस्त जे लकान एमोअ चहाव नेनाय, हिना लकान आबु मेसे जामेकु के खास दान एम तदाय। 8#सिरिंग 68:18हिना लःअय धरम पुथी रे लिखा लअः एदनाआ ची,

“हुनी उसूल रे रकाःब नेनाय

आउर जेहेल उनकु के तोल इदी लिकुआय,

आउर होड़कु के दान एमा लिकुआय।”

9“हुनी रकाःब नेनाय,” नोःआँ रअः माने नोःआँ हेके ची हुनी पहिल रे ओत रअः लतार रे आड़गु ताहिनाय। 10जे लतार आड़गु नेनाय, हुनी हिनी हेके जे सिरमा तरअः होः उसूल रे रकाःब नेनाय, जेकर से ची हुनी जामा पुरा-पुरी गोअ ताय। 11हुनी थोड़ेक होड़कु के प्रेरितकु ठहराव लिकुआय, दो थोड़ेक के आगमजानी, दो थोड़ेक के बेस खभाईर के पापरचार वाला दो थोड़ेक के कलीसिया रिनकु चरवाहा आउर उपदेस एमोअ वाला ठहराव केते एमा लिकुआय। 12नोःआँ लकान हुनी सेवा काम लःअय पबितर होड़कु के बुधियाड़ बनाव लिकुआय, जेकर से ख्रीस्त आला होड़ो रअः बढ़ोतरी हुयाव एकान। 13जब तक ची आबु जामे बिसवास आउर परमेसर आली होपोन आला गेयान रे मि-जामुक आलबु हुयाव जुन। आउर मियांड सिध मनवा आलबु बनाव जुनोः बु आउर ख्रीस्त लकान पुरा-पुरी जगुत आलबु बढ़ाव जुनोः बु।

14नोःआँ लकान आबु चेंगा गी आलबु बनाव ताहिकोअ, जे होड़कु के हे-हेड़े रेनअः काम आउर चंलक ते हुंकू आला भरम रेनअः जोजना, आउर उपदेस रेनअः जामा बरन रअः होय तरअः, बहकाव कुआकु आउर बहकाव जुनोआकु। 15बकिर आबु पेरेम लोः प्रेरित केते सचाई कंहड़ीबु आउर जामा बात रे ख्रीस्त रे बढ़ाव सेन बु। ख्रीस्त आबु आली बोहोअ हेके। 16#कोलो 2:19हुनी नोःआँ बात रेनअः कारन पाड़ी योआय ची होड़ो रेनअः जामा अंग मिसा तेरे गढ़ाआ आउर होना साँघे ताहिनोआ जे लकान हरेक अंग कामीयाय जे लकान होना के क-कामी चाही। नोःआँ लकान गोटा होड़ो बढ़ाआ आउर दुलार ते होड़ो अपने के बढ़ायाय।

ख्रीस्त रे नावाँ जिनगी

17ईङ आपे के नोःआँ कंहड़ी तानिङ आउर परभु आला नुमू रे नोःआँ चेतावनी एमाअ दिपीईंग ची आपे एटाअः जाईतकु रअः बहकाव लकान जिनगी नहाअः तरअः आलपे चलाव कोअ जे बेकार रअः बात कुन रे सोंचायाकु। 18हुंकू आला बुधी रे अंधार ना, हुंकू अपन बेसमझ आउर मन रअः केटेःग रअः चलते परमेसर पखी तरअः भेटाअः जिनगी तरअः लंका इदानकुआ, 19आउर हुंकू बेलाज नाकु आउर लंपट कामी एहेःब केदाकु आउर जमा रकम रअः गादुस कामी एहेःब केदाकु। 20बकिर आपे ख्रीस्त आला नोकान सिकछा कापे नाम लआ! 21बकिर आपे सचे गी हुनी आला आयुम लआपे, आउर होना सचाई जे ईसु रे डेरायाय, होना रअः मोताबिक आपे के चेलाकु भेस रे सिकछा होः एमा तदपेआकु। 22#कोलो 3:9दो आपे जे पहिल रअः चाईल-चकर आउर मारी धचाईर के बाई गुल तापे, एता लःअय ची होना बा-बहकाव वाला रअः इकछा रअः चलते बगड़ाव सेना। 23जेकर से ची मन आउर आतमा रे आपे के नावाँ बनाव सकाव पेकु। 24#कोलो 3:10; एहेः 1:26आउर मियांड नावाँ धाचाईर के सोलोंगेपे, जे परमेसर रअः भेस रे सच धरमी आउर पबितरता रे सिरजाव ताना।

25 # जखरि 8:16 हिना लःअय आपे झुठ कंहड़ी बाई गोअ तापे! जामे झन एटाअकु लोः होः जामा बेरा सच कंहड़ी पे, एता लःअय ची आबु जामा मियांड होड़ो रिनकु अंग हेके। 26#सिरिंग 4:4जब आपे खीस जुनोआपे, अपन खीस आपे के आलपे पाप चिके बोंगा हासुरोः जगुत आपे आला खीस ओहराव जुनोः चाही। 27आउर ना सैतान के मोका एमाई पे। 28जे चोरे केनापे, हुंकू नहाअः तरअः आलपे चोर के, अपन तीः तरअः बेस काम कामीपे। नोःआँ लकान ची हुंकू रांगेःगकु के होः थोड़ेक मदाईत एमा कुपे। 29जहान गंदा बात आपे आला आहा तरअः आलु उड़ूंगोः चाही, बकिर दरकार मोताबिक हिना उड़ूंगोः जे मड़ांग बढ़ाअः लःअय फयदायोआ, जेकर से ची आ-आयुमकु के भलाई हुयाअः। 30परमेसर आला पबितर आतमा के आलपे सोक चिके, जेकर से आपे लःअय छुटकारा रअः दिन हिला लःअय आपे रे मरका लगाव तदाय। 31आपे जामा बरान रअः पित लकान हटी, जीर-जीर खीस, लड़ाई-झगड़ा, एटाअकु आला निन्दा कंहड़ी आउर जामा लकान बुराई के अपन तरअः उडुंग गोअ तापे। 32#कोलो 3:13एटाअकु के होः भलाई आउर सोगारू हुयाअः चाही। जे लकान परमेसर ख्रीस्त रअः चलते आपे के छमा लेपेआय, हिना लकान आपे होः गी एटाअकु के होः छमा कुपे।

Currently Selected:

इफिसि 4: ASR

Highlight

Copy

Compare