इफिसि 5

1आपे परमेसर आलकु दुलार होपोन हेके, हिना लःअय हुनी लकान चलाअ पे। 2#उइठ 29:18; सिरिंग 40:6आउर दुलार रअः होरा रे चलाअ पे, जे लकान ख्रीस्त आबु के दुलार लिबुआय आउर बेस सोहों रअः भेंट चाहे बलिदान रअः भेस रे आबु लःअय अपन के परमेसर के बलिदान एमा तदियाय।

3जे लकान ची पबितर होड़कु लःअय उचित एदनाआ, आपे तलारे बेलाज काम आउर जहान लकान रअः असुधता चाहे लोभ रअः कंहड़ी-गथा होः आलु हुयाअः चाही, 4नोःआँ उचित नलागे ची आपे ताला रे गंदा बात क-कंहड़ी चाही, ना नोकान बात कोवान क-कंहड़ी जे जाहें लःअय फयदा का योआ। मुर्ख रअः बात चाहे खराब लांदा-गथा, बकिर आपे परमेसर के धन्यवाद एमाई पे। 5आपे नोःआँ जरूर पाड़ीपे ची जाहें बेलाज कामी वाला, असुध होड़ चाहे लोभी कु जे मुरती पुजा बराबाई-रा, ख्रीस्त आउर परमेसर आला राईज रे इरकु बोल दड़ीआ।

6जाहें आपे के बेकार बात रे धोखा आलकु एम केपे, एता लःअय ची निआँ काम तरअः गी हुकूम का-आआयुम कु लोः परमेसर आला खीस भड़काआ। 7हिना लःअय हुंकू लोः आलपे गाती कोअ। 8आपे पहिल रे अंधार ताहिनापे, नहाअः परभु आलकु होड़ हेके हिना लःअय मरसल हेके, हिना लःअय मरसल होपोन लकान चलाअः पे। 9एता लःअय ची मरसल रअः जोअः जामा बरान रअः भलाई, धरमिकता आउर सचाई हेके। 10आपे नोःआँ पता लगाव एकाय पे, ची परभु के ओका बात बेस आदाईया। 11होड़कु जे बेकार रअः कामी अंधार रे कामीआकु, हुंकू लोः आलपे गाती कोअ आउर हुंकू आला बुराई के दिसतारे पे। 12हुंकू जे काम उकु-दनाङ कामीआकु, हुंकू आला कंहड़ी-गथा रे होः लाज अदायोः। 13मरसल नोःआँ जामा बात रेनअः बुराई के दिसतारेआय, आउर नोःआँ के सही भेस तोरा-फोर परगट गुलताआय। 14जे कुछ मरसल दुबाःड़े हिजोआ, होना खुदे दिसतार जुनोआ। हिना लःअय कंहड़ी तदाकु,

“ए निन्दोः ई बिरिःड मे,

आउर गोएःग उनकु तरअः जिवीःड बिरिडोः पे,

दो ख्रीस्त आला मरसल आपे रे चमकाव कोआ।”

15हिना लःअय अपन चाईल-चकर रेनअः पुरा-पुरी धेयान एम पे। बे-बुधी कु लकान कोवान, बकिर हुसियारकु लकान चलाअ पे। 16#कोलो 4:5जे मोका एदनाआ बेस काम क-कामी लःअय कुरनीसेपे एता लःअय ची बेरा का बेसा। 17हिना लःअय आपे बोका आलपे बनाव कोअ, बकिर परभु आला मरजी एतान हेके सेके पाड़ीपे। 18झारा-दारू नु केते मतवाड़ आलपे बनाव कोअ, एता लःअय ची नोःआँ रे बेलाज खाता काम रेनअः सोंच हिजोआ, बकिर पबितर आतमा रे पेरेःग सेनपे। 19#कोलो 3:16,17मिएड़े जुमाव केते भजन, स्तुति आउर आतमा रेनअः सिरिंग सिरींगेपे, गोटे मन तरअः परभु आला अदर रे सिरींग-दुरांग एकाय पे। 20आबु आली परभु ईसु ख्रीस्त आला नुमू रे जामा बेरा, जामा जिनीस लःअय, बाबा परमेसर के धन्यवाद एमा इकाई पे।

ख्रीस्त घराना रअः नामुना

21आबु ख्रीस्त के बोर रअः चलते हुनी-नुई रेनअः एटाअकु आला लतार रे ताहिन पे।

22 # कोलो 3:18; 1 पत 3:1 ए लाईंकु, अपन-अपन हेरेलकु लतार ताहिन पे जे लकान आपे परभु आला लतार रे तहिनोआपे। 23एता लःअय ची गोमके हिना लकान गोमकाईन आली बोहोअ हेके, जे लकान ख्रीस्त कलीसिया रिनी बोहोअ हेके आउर हुनी आला होड़ो रेनअः उ-उधार अवला हेके। 24जे लकान कलीसिया ख्रीस्त रअः लतार रे ताहिनोआँ कु, हिना लकान लाईंकु के होः जामा बात रे अपन गोमके रअः लतार रे ताहिनोअ चाही।

25 # कोलो 3:19; 1 पत 3:7 हेरेलकु, अपन लाईंकु के हिना लकान दुलार कुपे, जे लकान ख्रीस्त कलीसिया के पेयार लःअय। हुनी, कलीसिया लःअय अपन के बलिदान एम लःअय, 26जेकर से ची हुनी, हुंकू के पबितर दड़ीकु आउर बचन आउर दाअः रेनअः असनान तरअः सुध दड़ीकुई, 27एता लःअय ची हुनी मियांड नोकान कलीसिया, अपन मड़ांग रे अ-आगु नाम केनाय, जे महिमा तरअः पेरेःग उना हुयाअः चाही, जेकर रे ना दाग, आउर ना नोकान जहान घटकामी, बकिर पबितर आउर बेकासुर उना हुयाअः चाही। 28जे लकान ख्रीस्त कलीसिया लोः दुलार लःअय हिना लकान गोमके अपन-अपन गोमकाईन के अपन होड़ो लकान दुलारी। जे अपन गोमकाईन तेके दुलारीयाय, हुनी अपने के दु-दुलार चाही। 29जाहें अपन होड़ो तरअः बैर काकु दोहोया। बकिर हुनी, होना के असुलेआय आउर होना के देखा-तखायाय, ख्रीस्त कलीसिया लोः निकाने आय, 30एता लःअय ची आबु हुनी आला होड़ो रेनबु अंग हेके। 31#एहेः 2:24धरम पुथी रे लिखा लअः एदनाआ “हेरेल अपन आया-बाबा के बाई किकीनाय, आउर अपन गोमकाईन लोः साँघे ताही कोआय आउर हुंकिन बनाहोड़ मियांड होड़ो कोआकिन।” 32नोःआँ मियांड उकू ओना बात हेके। ईङ समझाईङ ची नोःआँ ख्रीस्त आउर कलीसिया रेनअः नाता पखी चुंडूलेआय। 33जहान होः हुयाअः, आपे मेसे जामे झन अपन लाईं के अपन लकान दुलार कुपे, आउर लाईं अपन हेरेल के आदारी।

Currently Selected:

इफिसि 5: ASR

Highlight

Copy

Compare