Popular Bible Verses from इफिसि 4

Share

एटाअकु के होः भलाई आउर सोगारू हुयाअः चाही। जे लकान परमेसर ख्रीस्त रअः चलते आपे के छमा लेपेआय, हिना लकान आपे होः गी एटाअकु के होः छमा कुपे।

आपे जामा बेरा नमर आउर नरम हिरदाय आउर सासहाव वाला बनाअः पे, एटाअकु के होः पेरेम से सहाव कुपे।

जहान गंदा बात आपे आला आहा तरअः आलु उड़ूंगोः चाही, बकिर दरकार मोताबिक हिना उड़ूंगोः जे मड़ांग बढ़ाअः लःअय फयदायोआ, जेकर से ची आ-आयुमकु के भलाई हुयाअः।

आपे जामा बरान रअः पित लकान हटी, जीर-जीर खीस, लड़ाई-झगड़ा, एटाअकु आला निन्दा कंहड़ी आउर जामा लकान बुराई के अपन तरअः उडुंग गोअ तापे।

जब आपे खीस जुनोआपे, अपन खीस आपे के आलपे पाप चिके बोंगा हासुरोः जगुत आपे आला खीस ओहराव जुनोः चाही। आउर ना सैतान के मोका एमाई पे।

दो आपे जे पहिल रअः चाईल-चकर आउर मारी धचाईर के बाई गुल तापे, एता लःअय ची होना बा-बहकाव वाला रअः इकछा रअः चलते बगड़ाव सेना। जेकर से ची मन आउर आतमा रे आपे के नावाँ बनाव सकाव पेकु। आउर मियांड नावाँ धाचाईर के सोलोंगेपे, जे परमेसर रअः भेस रे सच धरमी आउर पबितरता रे सिरजाव ताना।

मेल रअः बंधन रे होना एकता के बनाव दो-दोहो रेनअः कुरनीसे कु जेके पबितर आतमा एमेआय।

हुनी थोड़ेक होड़कु के प्रेरितकु ठहराव लिकुआय, दो थोड़ेक के आगमजानी, दो थोड़ेक के बेस खभाईर के पापरचार वाला दो थोड़ेक के कलीसिया रिनकु चरवाहा आउर उपदेस एमोअ वाला ठहराव केते एमा लिकुआय। नोःआँ लकान हुनी सेवा काम लःअय पबितर होड़कु के बुधियाड़ बनाव लिकुआय, जेकर से ख्रीस्त आला होड़ो रअः बढ़ोतरी हुयाव एकान। जब तक ची आबु जामे बिसवास आउर परमेसर आली होपोन आला गेयान रे मि-जामुक आलबु हुयाव जुन। आउर मियांड सिध मनवा आलबु बनाव जुनोः बु आउर ख्रीस्त लकान पुरा-पुरी जगुत आलबु बढ़ाव जुनोः बु।

नोःआँ लकान आबु चेंगा गी आलबु बनाव ताहिकोअ, जे होड़कु के हे-हेड़े रेनअः काम आउर चंलक ते हुंकू आला भरम रेनअः जोजना, आउर उपदेस रेनअः जामा बरन रअः होय तरअः, बहकाव कुआकु आउर बहकाव जुनोआकु। बकिर आबु पेरेम लोः प्रेरित केते सचाई कंहड़ीबु आउर जामा बात रे ख्रीस्त रे बढ़ाव सेन बु। ख्रीस्त आबु आली बोहोअ हेके।