इफिसि 1

जोहार

1 # प्रे.कामी 18:19–21; 19:1 हुंकू पबितर होड़ आउर ख्रीस्त ईसु रे सचा बिसवासीकु आला नुमू रे जे इफिसुस सहर रे एदान कुआ, पौलुस पखी तरअः जे परमेसर आला मरजी रे ख्रीस्त ईसु आली प्रेरित ठहराव तनाय।

2आबु आली बाबा परमेसर आउर परभु ईसु ख्रीस्त पखी तरअः आपे के दया हेतरअ सानती भेटाव एकान।

जामा होड़कु लःअय परमेसर पखी तरअः आतमिक असीस

3आबु आली परभु ईसु ख्रीस्त आली परमेसर आउर बाबा आला स्तुति हुयाअः। हुनी आबु के ख्रीस्त रे सिरमा रअः जामा बरन आतमिक आसीस एम तदाय। 4हुनी दुनिया सिरजअः तरअः पहिल रेगी आबु के ख्रीस्त रे निबाड़ तदबुआय, ची आबु हुनी आला दुलार रे पबितर आउर बेकासुर ताहिनबु। 5हुनी अपन पेरेम रेनअः चलते पहिल रेगी ठहराव लःअय ची ईसु ख्रीस्त तरअः आबु हुनी आलकु बालपोंस होपोन हेके। एता लःअय ची नोःआँ परमेसर के खुस लियाय आउर निआँ गी का-कराव चहाव नेनाय। 6जेकर से हुनी आला होना बड़े दया रेनअः महिमा रअः स्तुति हुयाअः, जेके हुनी अपन दुलार होपोन तरअः बकसिस रे आबु के एम लःअय। 7#कोलो 1:14आबु के होना रे ख्रीस्त आला मयोम रअः चलते छुटकारा, माने कि ढेर गुनाह रेनअः छमा भेटाआ, हुनी आला होना दया रेनअः मोताबिक भेटाव ताना जे मुरुक बड़ेआ। 8जेके हुनी आनेःग आला ढेर लूर आउर समझ संहित आबु रे ढेर जादे एम तदाय। 9परमेसर अपन इकछा रेनअः मोताबिक अपन जोजना आबु के दिसतार लःअय, जे मनवा तरअः उकू ओना थिना। 10परमेसर अपन जोजना ख्रीस्त दोवारा पु-पुरा लःअय ठनाव लःअय, होना नोःआँ हेके ची ठीक बेरा हिजोः रे हुनी सिरमा आउर ओत रेनअः जामा के ख्रीस्त रे एकजुट जवारे।

11जामा अपन मकसद आउर मरजी मोताबिक ककामी वाला परमेसर पहिल रेगी ताय लःअय अपन जोजना मोताबिक ख्रीस्त रे आबु के काठ होपोन हुयाअः लःअय निबाड़ लिबुआय। 12ची आबु जेतना पहिल ख्रीस्त रे आसरा दोहो थिलाअबु हुनी आला महिमा रअः स्तुतियेबु।

13आपे होः सचाई रअः वचन आयुम लआपे, जे आपे आला उधार रअः बेस खभाईर हेके, होना तयोम आपे ख्रीस्त रे बिसवास लआपे आउर आपे रे परमेसर पबितर आतमा रअः मरका लगाव लःअय, जेकर वादा लआ थिना। 14आबु के छुटकारा नानम जगुत आबु जरूर हकदार नाम केआबु कंहड़ी केते नोःआँ पबितर आतमा बेयाना हेके, जेकर से परमेसर आला महिमा हुयाअः।

पौलुस इफिसि रिनकु लःअय धन्यवाद रअः बिनती

15नोःआँ चलते ईङ होः, जे बेरा तरअः ईङ परभु ईसु रे आपे आला बिसवास आउर जामे पबितर होड़कु रअः प्रति आपे आला पेरेम रअः बारे रे आयुम तदिङ, 16आपे लःअय जामा बेरा परमेसर के धन्यवाद एमोअ काईङ बाईया, आउर अपन बिनती रे आपे के उईहार एका पेईङ। 17ईङ बिनती यींग ची आबु आली परभु ईसु ख्रीस्त आली परमेसर, जे महिमामय आपा हेके, आपे के पबितर आतमा एमापे, जे आकिल रआ आतमा आउर परमेसर के दि-दिसतार रअः आतमा हेके, जेकर से आपे परमेसर के सचमुच पाड़ीपे। 18ईङ नोःआँ होः बिनती यिङ ची आपे आला मन रेनअः मेःड खोलाव जुनोः, जेकर से ची आपे नोःआँ नेल दाड़ीपे ची हुनी दोवारा रा-राअः रेनअः चलते आपे आला आसरा इकिन महान एदनाआ, आउर पबितर होड़कु लोः उतराधिकारी भेटाआ, होना इकिन बड़े आउर महिमा तरअः पेरेःग उना एदनाआ। 19आउर आबु जे बि-बिसवासकु भीतरी ककामी वाला हुनी आला महान समरथ नोकान एदनाआ ची होना रअः एतान होः थाह कनोआँ होना के होः पाड़ीपे। 20#सिरिंग 110:1जे महान सकती परमेसर ख्रीस्त रे देखाव लःअय, हुनी गोएःग उनकु मेसे हुनी के जिवीःड बिरिःड लियाय आउर सिरमा रे अपन जोम पखी दुड़ूः लियाय। 21सिरमा रे जामे स-सासन कु आउर हाकिमकु, सवांगिया आउर प-परभुता कु केतनो होः ताहीनोः कु, आउर हुंकू आला नुमू केतनो महान एता लःअय आलु ताहिन, हुंकू जामे तेंग रे परमेसर नोःआँ जुग लःअय आउर हिजोअ जुग लःअय ख्रीस्त के ठाँव एमा तदियाय। 22#सिरिंग 8:6#कोलो 1:18हुनी जामा कुछ ख्रीस्त आला जांगा लतार रे दोहो केदाय, आउर हुनी के जामे जिनीस रे हक एमा केते, कलीसिया के एमा लिकुआय। 23कलीसिया ख्रीस्त आला होड़ो हेके, आउर हुनी आला भरल-पुराल हेके। ख्रीस्त जामा रे जामे कुछ पुरायाय।

Currently Selected:

इफिसि 1: ASR

Highlight

Copy

Compare