इफिसि 2

ख्रीस्त तरअः होड़ आला जिनगी

1 # कोलो 2:13 आपे अपन कसुर आउर गुनाह रअः चलते गोएःग तहिनापे। 2एता लःअय ची आपे आला चाईल-चाकर पहिल नोःआँ दुनिया रअः रिती रेनअः मोताबिक, सिरमा रे हक जमाव वाला मुवाँ आतमा आलकु सरदार मोताबिक थिना, आपे होना आतमा रअः मोताबिक चलाअः केनापे, जे नहाअः जगुत परमेसर आला हुकूम का मनाअ कु रे कामीयाय। 3मि बेरा आबु होः हिंकु लोः साँघे समिल तहिनाबु, जब आबु अपन पाप जिनगी होड़ो आउर मन रेनअः जादे इकछा के आउर मन आउर पाप जिनगी होड़ो रेनअः दरकार के पुराय केनाकु। आबु दुनिया रिनकु एटाअ होड़कु लकान चाईल-चकर परमेसर के मुरुक जादे खिसोअ वाला होड़ ताही नेनाबु।

4बकिर परमेसर आला दया ढेर जादे एदनाआ आउर आबु लःअय हुनी आला दुलार बड़ेआ, 5जब आबु अपन गुनाह रअः चलते गोएःग तहिनाबु, ची हुनी आबु के ख्रीस्त लोः जिवीःड लिबुआय। (दया तरअः गी आपे आला उधार हुयाव ताना) 6हुनी ईसु ख्रीस्त लोः आबु के जिवीःड बिरिःड तदबुआय आउर सिरमा रे हुनी लोः दुड़ूः लिबुआय। 7ची हुनी आबु के जे माया ख्रीस्त ईसु रे उदूः लःअय होना दोवारा हुनी हिजोअ जुग रे अपन महान दया उदूगे।

8परमेसर आला दया तरअः आउर आपे आला बिसवास दोवारा आपे आला उधार हुयाव ताना। नोःआँ आपे आला मेहनाईत तरअः नलागे, बकिर नोःआँ दो परमेसर आला दान हेके। 9नोःआँ आपे आला कामी लआ बानी नलागे, ची नोःआँ रे जाहें आलकु घमंड़ के। 10एता लःअय ची आबु हुनी आलकु बनाव लिनबु हेके, आउर ख्रीस्त ईसु रे होना बेस काम लःअय सिरजाव लिबुआय, जेके परमेसर पहिल तरअः आबु लःअय बेस बेवहार काम कामी लःअय तेयार तदाय।

ख्रीस्त रे मि-जामुक

11उईहारेपे ची आपे जनम तरअः “एटाअ जाईत” कु हेके, आउर हुंकू चलते जे होड़ो रे खतना तदाकु बेगर खतना उनकु कहलाआपे। 12हिमीन बेरा आपे बेगर ख्रीस्त रे इसराइल समाज तरअः बाहरी ताहिनापे। आपे परमेसर आला वादा मोताबिक अपन होड़कु लःअय करार रअः भागी कापे थिना। हेतरअ नोःआँ दुनिया रे बेगर आसरा आउर बेगर परमेसर रअः थिनापे। 13आपे पहिल लंका तहिनापे, बकिर ख्रीस्त ईसु लोः मिलाव केते आपे नहाअः दो ख्रीस्त आला मयोम तरअः परमेसर रअः हेनाःड रे हीःग नापे। 14एता लःअय ची हिनी गी आबु आली सानती हेके। जाहुदीकु आउर एटाअ जाईतकु तलारे मेल लिकुआय। बनार के आ-अलगे वाला बाइरी रअः भीत थिना, होना के हुनी अपन होड़ो के खुदे बलिदान एम केते धसाव केदाय। 15#कोलो 2:14आउर अपन मराईन तरअः समुचा हुकूम नेग लोः मुसा आला कनहुन के रद्द केदाय नोःआँ लकान हुनी जाहुदीकु के आउर एटाअ जाईतकु के अपन लोः मिलाव केते मियांड नावाँ मनवा गड़हाव लिकुआय आउर सानती एमा लिकुआय। 16#कोलो 1:20आउर कुरूस रअः चलते बैर-भाव के चबा केते, बनार के मियांड होड़ो बनाव केते परमेसर लोः मेल लिकुआय। 17#जसा 57:19तब हुनी हीःग केते, आपे जे लंका ताहिनापे आउर हुंकू के होः जे हेनाःड ताहिनाकु, मिएड़े केते मेल मिलाप रअः बेस खभाईर सुनावओ लिकुआय। 18एता लःअय ची हुनी चलते आलांग बनाहोड़ मियांड पबितर आतमा तरअः मदाईत तरअः बाबा दुबाःड़े सोदोर दाड़ी केआलाङ।

19आपे नहाअः दो परदेसी चाहे अनजान कापे ताहिः ना, बकिर पबितर होड़कु आलकु समाज तेकर परमेसर आलकु घराना रिनकु बनाव नापे। 20आपे मियांड नोकान ओड़ाअ हेके, जे प्रेरितकु आउर आगमजानीकु आला नेव रे तिंगु ताना। आउर जेकर मुरुक जरूरी कोना रअः टुकू खुदे ख्रीस्त ईसु हेके। 21ख्रीस्त दोवासते गोटा बंगला बराबईर बनाव केते तिंगु ताना आउर परभु रे मियांड पबितर मंदिर बनाव सेना। 22ख्रीस्त दोवारा आपे होः नोःआँ ओड़ाअ रे जोड़ाव तोरापेआ जेकर से आपे के होः आतमा रअः चलते परमेसर लःअय मियांड ताहिनोः ठाँव बनाअः पे।

Currently Selected:

इफिसि 2: ASR

Highlight

Copy

Compare