2 तिमुथी 2
2
ख्रीस्त ईसु आलकु सचे सिपाही
1हिना लःअय ए ईङ आली होपोन, होना दया तरअः जे ख्रीस्त ईसु रे एदनाआ, तगड़ा बनाव जुनोः मे। 2आम के ढेर गोवाहकु मड़ांग रे ईङ तरअः जे सिकछा भेटाव ताना, होना के हुंकू बि-बिसवास लकान होड़कु के जिमा-उकु मे, जे एटाअ होड़ के होः सिकछा एमोअ दाड़ी कु। 3ईसु ख्रीस्त आली बेस पलटन लकान आम ईङ लोः बिपाईत सहाव एकाय मे। 4नोकान जाहें होः जे पलटनकु लकान सेवाअ दाय, अपने के रोज रअः जिनगी रेनअः जाल रे काय दागोआ एता लःअय ची अपन पलटनकु आली ब-बहाली वाला के खु-खुस रेनअः फिकीर रे ताहिनोआय। 5जाहें खिलाड़ी के होः खेल-कुद रअः कनहुन काय पलाने दो इनाम एरे भेटाव सकाआ। 6मे-मेहनाईत किसान के जामा खिती रेनअः पहिला हिस्सा भेटाअः गी हेके। 7ईङ जे बात बेताअः देमेईंग होना बात के बेस केन बिचारेमे। परभु आम के जामा बात के समझाअ लःअय मदाईत केमेआय।
8ईसु ख्रीस्त के उईहार एकाई मे, जे गोएःग उनकु मेसे जिवीःड-बिरीःड तनाय आउर जे दाऊद आली बंसवाईर हेके। निआँ बेस खभाईर रेनअः मोताबिक परचारेईंग। 9निआँ लःअय ईङ बिपाईत झेलायीङ, नोःआँ जगुत ची मियांड गुनाहगारकु लकान जेहेलीङ। बकिर परमेसर आला वचन दो तोल ऊना कनोआँ। 10निआँ चलते परमेसर आलकु निबाड़ लिनकु लःअय जामा बिपाईत सहायीङ, जेकर से ची हुंकू होः ईसु ख्रीस्त तरअः भेटाअः वाला उधार के का-अन्तोः महिमा लोः नाम दाड़ी कु।
11नोःआँ वचन बि-बिसवास लकान एदनाआ;
“जदि आबु हुनी लोः गोएःग तनाबु,
दो हिनी लोः जिवीःड कोआबु होः।
12 #
सं.मत्ती 10:33; सं.लुका 12:9 जदि आबु धीरज ते सहाव एकायाबु,
दो हुनी लोः राईज केआबु होः,
जदि आबु हुनी के काईंग पाड़ीआ मेन गेआबु,
दो हुनी होः आबु के काईंग पाड़ीआ बेता किबुआय,
13जदि आबु अनबिसवास ताहिनबु रे होः,
सेरे होः हुनी बि-बिसवास लकान बनाल ताहिनोआय,
एता लःअय ची हुनी अपन चाईल-चकर रेनअः बिरोध रे एरे सेनोः दड़ीआ।”
गरहन लिनकु का-कामीकु
14होड़कु के नोःआँ बात रेनअः उईहार एकाअ चिकुमे आउर परमेसर मड़ांग रे गोवाह बनाव केते हुंकू के चौंचित ची एकाअ मे ची हुंकू सबद के इदी केते लड़ाई-झगड़ा आलकुय। जेकर तरअः एतान फयदा कनोआँ बकिर आ-आयुमकु के बगड़ाव गोअ ताकुआय। 15अपन के परमेसर के ग-गरहन लकान बनाव केते, आउर नोकान मियांड बेस से-सेवाई बनाअः रेनअः जतन एकाय मे, जेकर से ची लाजोअ रेनअः दरकार आलु हुयाअः। परमेसर आला सचाई बचन रअः माने के उदूगेआय।
16परमेसर रअः बिरोध वाला बात तरअः आउर बेकार रेनअः बात तरअः बंचाव ताहिनोअ मे। एता लःअय ची नोःआँ बात होड़कु के परमेसर तरअः लंका इदी कुआय। 17आउर हुंकू आला सिकछा सेया उना घाव लकान बहकाव सेन कोआ। हुमिनयुस आउर फिलेतुस निकान एदानकिना। 18जे सचाई तरअः नोःआँ कंहड़ी केते लंकाअ नाकु ची आबु आला जिवीःड-बिरिडोः हुयाव चुकाव ना। आउर उकिन झन आला बिसवास के उलट-पुलट गोअ तआकु। 19#गन 16:5बकिर परमेसर जे नेव के लाः तदाय, होना मजगुता आउर होना बात रे नोःआँ मरका लगाव लआ एदनाआ, “परभु हुंकू के पाड़ीआय, जे हुंकू अपन आलकु हेके”, आउर “जे परभु आला नुमू इदीयाकु,” “हुंकू के अधरम तरअः बंचाव ताहिनोअ चाही।”
20जहान बड़े ओड़ाअ रे सोना आउर चाँदी रेनअः भाईर बसान का-ताहिनोआ, बकिर काठ आउर हास रेनअः होः ताहिनोआ, थोड़ेक खास काम लःअय ताहिनोआ आउर थोड़ेक नेकान काम लःअय। 21हिना लःअय जदि होड़ अपन के जामे बुराई तरअः सुधोआय, दो हुनी खास काम रिनी बनाव कोआय आउर पबितर बनाव केते अपन गोमके लःअय काम रिनी पाड़ी कोआय। आउर जहान होः बेस काम लःअय तेयार ताही कोआय।
22जवानी बेरा रेनअः घिंड़-घिंड़ सोंच विचार तरअः लंका ताहिन मे, आउर जे सुध मन तरअः परभु आला नुमू इदी केते गोहराआकु, हुंकू लो: धरमी जिनगी, बिसवास, पेरेम आउर सानती के ओतोंगेमे। 23हुरमुठ, बेकार रेनअः कंहड़ी-उपड़ीङोः तरअः जामा बेरा बंचाव ताहिन मे। एता लःअय आम पाड़ी आम ची नो:आँ तरअः लड़ाई-झगड़ा सिरजाआ। 24आउर परभु आली बंधाउवा के दो झगड़ान गी कोवान चाही। हुनी के दो जामाकु रे द-दया चाही। बकिर जामेकु के मेल-पेरेम आउर हुनी के सिकछा एमोअ लःअय तेयार ताहिनोअ चाही। 25आउर बिरोधी कु के नरम केते समझाव कु, हुयाव सकाआ ची हुंकू परमेसर आला दया तरअः मन रूवाड़े कु आउर सचाई के चिनहाय कु। 26आउर हुंकू चौंचित केते सैतान आला फंदा तरअः छोड़ाव जुनोः कु, एता लःअय ची हुंकू सैतान आला मरजी पुपुरा लःअय हुनी आला फंदा रे दाअः तानाकु।
Currently Selected:
2 तिमुथी 2: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
