1 पतरस 2
2
जिवी:ड टुकू आउर हुनी आलकु निबाड़ लिनकु होड़
1आपे जामा किसीम रअः बुराई, कपट, डाह, अंदाजी रअः देदेखाव, एटाअः कु आला निन्दा तरअः बंचाव केते तहिनपे। 2बालेक चेंगा लेकन खांटी आतमिक तोवा लःअय ललाव तहिनपे, जेकर से ची आपे होना दोवासते उधार रे बढ़ाव सेनपे। 3#सिरिंग 34:8“एता लःअय ची आपे परभु आला माया रअः सिबील के चखाव तदापे।”
4परभु जिवीःड टुकू हेके, जेके होड़कु बेकार समझाव केते उडुंग लियाकु, बकिर परमेसर आली निबाड़ लिनी, किमती हेके, आपे परभु दुबाःड़े दारापेआ। 5आपे होः जिवीःड टुकू लकान आतमा रेनअः ओड़ाअ बनाव तोरापेआ। नोःआँ लकान आपे पबितर पुरोहितकु आला समाज बनाव जुनोःपे, आउर आतमिक बलिदान रकाःबेपे, जेकर से ईसु ख्रीस्त दोवारा परमेसर लःअय गरहाने लकान हुयाअः। 6#जसा 28:16हिना लःअय धरम पुथी रे लिखा लअः एदनाआ
“ईङ सियोन रे मियांड निबाड़ लअः दामी, कोना रअः टुकू दोहोअः दिङ,
जे हुनी रे बिसवास दोहोयाय,
हुनी के ओका लकान रे होः लाजिमोअः एरे पड़ाआ।” 7#सिरिंग 118:22आपे बिसवासीकु लःअय किमतीआ, बकिर जे काकु बिसवासेआ हुंकू लःअय,
“हिना टुकू जेके मिस्त्री कु बेकार ठहराव ताही लअकु,
हिना गी कोना रअः जरूरी टुकू बनाव ना।”
8 #
जसा 8:14,15 “नोकान टुकू जेकर रे हुंकू तोहोःड कोआकु,
नोकान सेरेंग जेकर रे हुंकू जेलेःड केते नुर जुनोआकु।
हुंकू वचन काकु मनाआ हिना लःअय ठोकोर जोमेआकु आउर निआँ नतीजा लःअय ठहराव तदकुआकु होः।”
9 #
उइठ 19:5,6; जसा 43:20;
उइठ 19:5; कन 4:20; 7:6; 14:2; तितु 2:14;
जसा 43:21;
जसा 9:2
बकिर आपे निबाड़ लिनकु बंसवाईर, राजा आली पुरोहितकु आला समाज, पबितर राईज आउर परमेसर आलकु अपन होड़ हेके, जेकर से आपे हुनी आला बड़े-बड़े कामी बखनायपे, जे आपे के अंधार तरअः उडुंग केते हुंकू आला ईंजोत रे राअः आगु लेपेआय। 10#होसे 2:23पहिल रे आपे परजा कापे ताहीना, नहाअः आपे परमेसर आलकु होड़ हेके। आपे पहिल रे दया तरअः बे-दखल ताहिनापे, नहाअः दो आपे किरपा नाम तदापे।
परमेसर लःअय जिवीडोः
11ए दुलार बोकोकु, ईङ आपे तरअः गोहराअ तनिङ ची आपे परदेसी आउर होरा डिंडोअः कु हेके लःअय, आपे के कंहड़ीः दिङ ची आपे दुनिया रेनअः खराब अभिलासा तरअः फरक ताहिनपे, जे आतमा तरअः लड़ाआय। 12एटाअ जाईतकु ताला रे आपे आला चाईल-चकर बेस हुयाअः चाही। जेकर से जे आपे के गुनाहगार लकान कंहड़ी केते निन्दा याकु, हुंकू आपे आला भलाई कामी के नेल केते परमेसर आला हिजोः हिला हुनी आला बड़ाईये कु।
हाकिमकु आला लतार रे ताहिनोः
13परभु लःअय मनवाकु आला बनाव लिनकु जामे हाकिमकु आला लतार रे तहिनपे। महाराजा तरअः जे जामा तरअः बड़ेआय। 14राजपाल आला कबजा रे तहिनपे। हुनी के हुंकू मुरखाहा कु के बदला रूवाड़ आउर बेस काम ककामी कु आला बा-बड़ाई लःअय कुलगोःड लिनकु हेके। 15एता लःअय ची परमेसर आला इकछा एदनाआ ची आपे अपन भलाई काम दोवारा निरबुधिकु होड़ आला नसमझ के सिड़िग्याः ची गुल ताकुपे। 16आपे आजाद होड़कु लकान चलाःपे बकिर अपन बुराई के उ-ऊकु लःअय अपन आजादी के आलपे आड़ इदी के। बकिर परमेसर आलकु बंधाउवा लकान चलाअः पे। 17जामाकु आला आदारेपे, बोकोकु लोः दुलारेपे, परमेसर तरअः बोरपे, राजाकु आला आदारेपे।
ख्रीस्त आबु आली नमुना
18जे धाँगड़ हेके, हुंकू अपन बेस आउर सलोर गोमके आला भाईर कोवान बकिर कुरचाहा गोमके आला कबजा के होः पुरा आदर ते गरहानेपे 19एता लःअय ची जदि जाहें परमेसर आला विचार केते अन्याय ते दुख उठाव केते सहाया दो नोःआँ रे भलाई एदनाआ। 20जदि आपे कसुर केते घुंसा जोम लआपे आउर धीरज ते सहाव लआपे दो, एतान बड़ाई रेनअः बात एदनाआ? बकिर बेस काम कामी केते होः दुख भो-भोगाव पड़ाआ, आउर आपे होना के चुपचाप सहायापे, दो नोःआँ परमेसर आला नजाईर रे भलाई अदाईया। 21हिना लःअय दो आपे के राअः तदपेआकु, एता लःअय ची ख्रीस्त आपे लःअय दुख भोगाव लःअय आउर आपे के मियांड नमुना उदूः लःअय जेकर से ची आपे हुनी लकान चलाअः पे। 22#जसा 53:9हुनी मि कनवः मिन काय पाप लअः आउर हुनी आला आहा तरअः कहियो छल-कपट रअः बात का-उड़ुंग नेना। 23#जसा 53:7जे बेरा हुनी के एगेर लियाकु, दो हुनी उतारा रे काय एगेर लिकुआ आउर जे बेरा हुनी के सताव लियाकु, दो हुनी काय धमकाव लिकुआ। हुनी अपन के परमेसर तेंग रे बाई केदाय जे नेयाय पुरबक बिचारेआय। 24#जसा 53:5,6हुनी अपन होड़ो रे आबु आला पाप के कुरूस रअः काठ रे ईदी लःअय जेकर से ची आबु पाप लःअय गोजोअः बु आउर धरमिकता लःअय जिवीःडोः बु। हुनी आला माईर जोम रे आपे चंगा नेनापे। 25आपे भेंड़ा लकान छिती-छान ताहीनापे, बकिर नहाअः दो आपे अपन आतमा रिनी चरवाहा आउर हो-होरहोई दुबाःड़े रूवाड़ हीःग नापे।
Currently Selected:
1 पतरस 2: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
