Iroomaani 15
15
1Hinin wꞌiimaaniib yꞌakraab, baliib wꞌiimaanuuhna nꞌakw ikatiyeeb dehaay asbirnayeet toonaati. Igarooyeen afirhisnayeet toona kitti laakiin bareeh afirhisnayeet toonaati. 2Kassaan gaalka ishawweetooh daayiinaaytiib neekwineet toonaati aree bareeh afirhistiniina dꞌiitiit neeshtiimeet toonaati. 3Umasiih ugarooyooh afirhisaab kiiki. Laakiin tuun batuuh uktaabiib kataabtu: “Baliin barook neeween oodehayi neew anii kehii dhibiya.” indi. 4Tuuna suur kataabt kastuuh hini allamti jillaay kataabti. Aflaay tarmuumaaywa eektabi sꞌakrooytiiwwa sꞌayaab nimeer.
5Ukwaasana itarmuumaawwa tisꞌakrooywa iniiw. Yasuuꞌaab Umasiih ramtiit, taktaki geeb mꞌasgiib tikweerni jillaay Ukwaasana eeshtamiyeetookna toonaatii dehaay siileelani. 6Aflaay baraak gaal ginꞌiiwwa gaal yafiiwwa Ukwaasana hamidna, Wꞌankwanaayoon Yasuuꞌaab Umasiihi Baaba hamidna.
7Umasiihi agbiliya hookna, aflaay baraakna han ibakii taktak agbilaana. Malya oontꞌaaneet Ukwaasana tehamidna. 8Ani andi hookna: Umasiih, Ukwaasaay sidik rhisiyi jillaay Iyahuudi shagaamana iki. Ukwaasana Iyahuudi hooba waadiyaayaneeb iwaadiya idꞌiyeet toona bareeh rhisiya. 9Aflaay Ijintiili Ukwaasana tirhamaatiyeeh sabbii yhamid ikatiin. Tuun batuuh uktaabiib kataabtu:
“Aflaay Ijintiili bitik ani ihimid hooka andi.
Bariiyook hamaadiit shiila iyaad andi.” diyaabi.
10Masi uuktaab,
“Yaa Ijintiili, Ukwaasanaay oodehayi geeb afirhaana!” diyaabi.
11Masi uuktaab,
“Yaa Ijintiili kassaakna, Wꞌankwana hamidna,
aree baraak idehaya kassaakna, bariiyooh hamaadiit shiila diina.” diyaabi.
12Masi Isyaas,
“Yassii taasii gaal lawi indi,
baruuh yakiit idehayaayi kehii yhikim indi.
Ijintiili barooh sꞌayaami iyadna.” diyaabi.
13Isꞌayaay Ukwaasana baraak aamanteeni been firhaatwa mꞌasigwa baꞌiyaaw hookna. Aree Eeshuuk Imugaddasaayi akrir sꞌayaab baꞌiitibna hookna.
Baawloos Ijintiilee dehaay diigwatamiya
14Isanaayaan, baraak abiiyaakna gwidaat daayiinaaytwa, timmiimaat kanaantwa, taktaki isootiiwwa adgirteeneet toona ani uknaayu akteen. 15Shalikt nikwtaateeb winneet gwꞌagwuuyt dehookna aktib, Ukwaasana hiiyyaayu ikatiyeet tinꞌimaati sabbii, aree bateeh masi shꞌastiyookna aharriiw. 16Ani Ijintiilee dehaay shagaamiiniib, Yasuuꞌaab Umasiihi shagaamana akatiyi sabbii, ufagiiriit waajibt Ukwaasanaay Usakana Udaayiib bhaliiyani. Aflaay Ijintiili Ukwaasana agbiliiniyeet karaama ikatiin. Aashuuk Imugaddasa bareeh sinhastiit Ukwaasana agbiliiniyeeb ikwasiin.
17Ani Yasuuꞌaab Umasiihiib akatiyi sabbii, Ukwaasana daayiib shagaamaniyeet toona adgirani. Aflaay ushagaayiisu winneet habnamani. 18Yasuuꞌa Umasiihi aneeb isidꞌiyeeb ushaga oobhaanaay hadiidi andi. Umasiihi anii geebii idꞌiyeeb ushagaay, Ijintiili Ukwaasana isnaakirna. Baruuh toon toona bhaliiyeewwa ushagaaywa ikwaas. 19Baruuh toon toona alaamaati akrireewwa mꞌuujisaateewwa ikwaas, aree Eeshuuk Imugaddasaayee ikwaas. Aflaay Algudusee Illiirikuum ookiik kassooh usalaliib, ani Umasiihi Usakana Udaayiib winneet bhaliiyan. 20Umasiih hooy biiꞌatookkaani hasheeb Usakana Udaayiinaay isooti ani diimaab ahariw. Aflaay ani weer tak dꞌiyaab ikatiyi asaasi kehii baadꞌiireet toona ahariw. 21Uuktaab bak indi:
“Bariiyooh usakana soomamaab baakay baliin barooh rhi iyadna,
aree baliin barooh maaswaab baakay afhami iyadna.” indi.
22Oon usabbii aree ani diimaab bareekna beeti wꞌaayiit fursa miraab kaaki.
Baawloos Roomaab Beeti Giig Niyaamiya
23Laakiin oontꞌa ani een yhasheeb ushagaayu faaysan. Gwida hawlaayeeka aree yꞌeetiit rheesamtiyookna winneet ahariw. 24Ani Isbaanyaab beeti iibaabt niyaamaniyihoob, toon toona shagaamtiib amankiir. Aflaay ani hasamee rheesamtiyookna aharriiw. Beentooy tꞌiibaabtiib shamaamt hookna aharriiw, aree tꞌaraweetookna winneet hooy afirhan. 25Oontꞌa laakiin Algudus iibi andi, aree beentooy Ukwaasanaay dehay shagaami andi. 26Magadoonyaawwa Akhaaꞌiyaayt tikaniisaawwa Ukwaasanaay dehayi bitik Alguduseeb eefeen imiskiinaayee dehaay naat ifarꞌaneet toonaatiib winneet afirhaaba. 27Baraah toon toona idꞌanee dehaay winneet afirhaaba, aree sidik bareeh eeshtamiineet tuuna waajibtoohna tikati. Iyahuudi ishuukeet barakaateehna Ijintiili geeb yꞌadhidhnayt, Ijintiili han Iyahuudi igarooyeehna dehaay ishtanhaneet teena yꞌadhidhneet tuuna waajibtoohna tikati. 28Aflaay ani oon ushaga faaysiit, bareeyooh dehaay farꞌamaab imhallaga sallamaniyi harꞌii, Isbaanyaab beeti iibaabiit usalaliib rheesami hookna andi. 29Ani bareekna beeti yꞌaniyihoob, Umasiihiit baraka gwidaat haay yꞌaniyeet toona akteen.
30Isanaayaan, Wꞌankwanaayoon Yasuuꞌaab Umasiihiiwwa Eeshuuki reeriiwwa winneet hookna aharriiw. Aflaay anaahookna anii geeb siileelaana aree anii jillaay Ukwaasanaay dehaay siileelaana. 31Ani Yahuudaay eefeen oodehay yꞌaamanaab baakaynee ansiigi jillaay siileelaana. Ukwaasanaay dehay beentooy Alguduseeb eefeen aree aniib ushaga agbileeni jillaay siileelaana, 32aflaay Ukwaasana indiyeek, ani afirhaa yꞌani hookna, aree hiddaab bareeyookna geeb afirhaa fiini andi. 33Umꞌasig iniiw Ukwaasana, kasseekna geebookna badaayi. Aamiin.
Currently Selected:
Iroomaani 15: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
