Iroomaani 14
14
Taktak Hamooysaana
1Wꞌiimaanuuh nꞌakw ikatiyeeb baliib agbilaana, bareeh halaagaaytiib amgwasaartiit baahaakamaana. 2Dehay gali wꞌiimaanuuhna naatka tamsiiniyeeb hiiseen. Laakiin wari dehay, wꞌiimaanuuhna nꞌakw ikatiyeeb, khadaar oobhaat tameen. 3Uutak naatka tamiiniib, beeb naatka baatamii ootak ibakii biiꞌabaabayeet toonaati. Naatka baatamii uutak aree ootak naatka tamiiniib ibakii gwabab biisꞌabiikeet toonaati. Ukwaasana barooh agbiliya. 4Weer taki kishiya haakamiini baruuk aabwa? Baruuh ooknaay kishiya yaksiini tari dhibsiini. Wꞌankwana barooh yaksiiniyeet toona adgiriini.
5Tak gaal bꞌeeb gaal uraawiika hayiskaab hiisiini, aree tak weer kasseeh eembꞌi gal tꞌiiteeb hiisiini. Gaalka ibhaliyeeh eekna dehaay ingadiyeet toonaati. 6Been bꞌeeb gaal isehaayiis, baruuh beet toona Wꞌankwanaay dehaay danꞌi. Toosha tamiiniib uutak, Ukwaasana yhammiidayt, toosha Wꞌankwanaay dehaay tamiini. Naati tamti han inriib uutak, Ukwaasana yhammiid aree beet toona Wꞌankwanaay dehaay danꞌi. 7Hinin igarooyeen iknaayee dehaay kinkwiri, igarooyeen iknaayee dehaay iyaayi hoon kiihaay. 8Hinin nikweereek, Wꞌankwanaay dehaay nikweer. Niyaayeek aree Wꞌankwanaay dehaay niyaayi. Aflaay needhhaniyeek tari niyaayeek, Wꞌankwanaay nikati.
9Oon usabbii, Umasiih iyaayt malya idhhan. Shaawti baruuh idhhaniibwa yꞌayaabwa kasseeh Ankwanaayoohna ikati. 10Aflaay baruuk usanook naanhooy haakamtiniya? Tari usanook naanhooy abaabtiniya? Hinin kassaan Ukwaasanaay whukwimi kwirsi suurii ningid niyad. 11Tuun batuuh uktaabiib kataabtu:
“Wꞌankwana ‘Ani umidhhaniisu halafooyaabu,
Uudehay kassaah anii suurii kuurami iyadna,
kassaah imiidalab aree Ukwaasanaay dehaay itfidhidh iyadna.’ indi.” diyaabi.
12Aflaay hinin kassaan gaalka Ukwaasanaay suurii ugarooyooh haasabi indi.
13Shaawti taktaki whaakamti nisingid. Usaniyook salal tingiifna tari maagtiib dhibsitniina baadꞌiya. 14Wꞌankwana Yasuuꞌa winneet rhisiyaheeb. Mꞌariit tuukna nhas baakaayt bitehaayeet toona ani winneet aamanani. Laakiin tak gaal naat gaat nhast biihiisayeek, aflaay beet batuuh bariiyooh dehaay nhast kitti. 15Usanuuk baruuk tamtaneet toonaati sabbii lhamiiniyeek, aflaay reer ibtikeekna daayi kiidi. Tumꞌariitiisook usanook baakwidhsaa. Umasiih bariiyooh jillaay ayaabi. 16Baruuk daayiinaayt hiistiniyeet toona amaagna hooy baahadiidsa. 17Ukwaasanaayt tehadꞌaayi mꞌariiti tamtiiwwa gwꞌitiiwwa kiiki. Laakiin batuuh Aashuuk Imugaddasa iyawneet shibootwa, mꞌasigwa firhaatwa tikati. 18Oon usalalii Umasiih shagaamiiniibka, Ukwaasana afirhisiini aree uudehay barooh hamooyseen.
19Shaawti hinin mꞌasigwa taktakeet sꞌakrooywa ikwasi shaga nidꞌeet toonaati. 20Ukwaasanaay ishaga tumꞌariiti jillaay baakwidhsaana. Tumꞌari kastuuh nhastu, laakiin weer tak tisoogiif mꞌariiti tamti daayiib kiiki. 21Shaat bittamayeet tuuna tari haab bitgwꞌayeet tuuna hayiskaatu, tari weena usanook dhibsitniina baadꞌiya.
22Shaawti teen tinaateeb aamantiniyeet toona barook uknaayookwa Ukwaasanaawwa ibtikeekna dibiya. Uutak daayiit hiisiiniyeet toonaatiib ugarooyooh gwabab baasꞌabiik been libaabiya. 23Laakiin uutak tamiiniyihoob eetehak danꞌiib gwababi kina ikati. Bariiyuuh itamti wꞌiimaanii kiiki. Wꞌiimaanii yꞌaat baakaayt tuuna aree kastuuh maagnaayt tikati.
Currently Selected:
Iroomaani 14: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
