Luugaay W'injiil 24
24
Ooyak
1Tuhadti bꞌi karuumaab taamꞌa tishakwiina tisoomraat iiktiineet iyheeniit umiimash ibeen. 2Bataah wꞌawi umiimashii kwaaleela imriina, 3laakiin oodi shuumiyaanihoob, bataah Wꞌankwana Yasuuꞌiit tukinaaja miraat kiikeen. 4Bataah beet toonaatiib kwoonee, gaalhoob malu da eera halaka talawiin akway bateeyooh daraag ingadna. 5Taamꞌat imhaniit ifiireesoohna whaashi kehii kuuramiyaan. Laakiin aanda bateeyooh dehaay, “Udhhaniib yꞌayaanaayi mhiin naanhooy tehariwna? 6Yasuuꞌa tooy kiihaay. Tuyatii yakamiya. Baruuh masi Jaliileeb geebookna iifiyi door sooyaneetookna toona shꞌaana! 7Baruuh ‘Wꞌaadami Oor ibakii eenda yꞌamagnaayi ayeeb daasamiini, sallabamiini, aree tooyin tumhayaatiib masi dhhantiit yakiini.’ diyaabu.” idiin. 8Malya bataah Yasuuꞌiib ibhali shꞌiyaan.
9Bataah umiimashii yꞌagarnihoob, kasteeh teen teena ilinguumiya itamna gwirwa, eerawwa sooyaan. 10Taan taamꞌa Maryam Majdaleenaabwa, Yoowannaatwa, Maryam Yaaguubiit toondeewwa, warit bateeyooh geeb iifiintwa teen teena ilinguumiya sooyaan. 11Laakiin baraah taamꞌa iidneeb ibhali hararfirid tꞌiiteena hiisiyaanayt, bateeh aamanaab kiikeen. 12Laakiin Bitrus yakiyaayt, umiimash beeti dhaabiya. Umiimashi kehii kuuramiyaayt nꞌati ishbib, aree ukafani halak nuun weena rhaab kiiki. Malya naan tikayeeb baruuh uukna ajjabamee giigiya.
Yasuuꞌa Malu Kwiriyaatayee Dehaay Lawiya
13Been oombꞌi malu ikwiriyaatayee Imwaas iidneet gariya iibiin. Batuuh Algudusee tamna gwir kiiloomitir tisiig. 14Baraah kastooh toona tutikeenaatiib hadiidsamiin. 15Baraah teen tinaateeb hadiidsameewwa bhaliisameewwa, Yasuuꞌa uukna eeyaayt bareeh ukwayaay hiireersamiya. 16Laakiin baraah baruuh aab iiktiyeeb igamna.
17Yasuuꞌa bareeh raatiya, “Hiireertiini door, naanaatiib hadiidsamtaana?” idi.
Baraah tim ikeeniit ingadna, aree ifiiraahna yhamaashna. 18Bareesooh Kilyoobaas iidni gaal, barooh raatiya, “Een eembꞌi Alguduseeb ikeent teena kanaab baakaay wꞌiibaabkina barook oobhaatwa?” idi.
19Yasuuꞌa raatiya, “Naa naata?” idi.
Baraah igwibiina, “Yasuuꞌaab Unaasiraayii dehaay ikeent teena. Baruuh Ukwaasanaawwa kassooh oodehayi suurii idꞌiyeet tunaatiibwa, hadiidiyaneet tunaatiibwa, akrir iibri nabi iiktiyeet toona rhisiya. 20Ifagiiriya isuurkinaawwa, isuurkinaayaanwa barooh yhakwirniit yat haakamiyaana, aree saliibi kehii idirna. 21Laakiin baruuh Israaꞌiil ishidhhin tak iiktiyeet toona minniimna. Laakiin tuun tuuna kastuuh tikayeekka amsi mhayaat yint tikati. 22Timꞌateesoon galit ajjabisiyaan hoon. Bataah karuumaab yakiyaaniit umiimash ibeen. 23Laakiin Yasuuꞌiit tukinaaja miraat kiikeen. Bataah hinin beeti yꞌagarniit, baruuh dhhaniibi iid malak rhiyaaneet toona hadiidiyaan. 24Malya ijamꞌaayeesoon gali umiimash ibeena, aree taamꞌa diyaat iiktiineet toonaatiit imriin. Laakiin barooh rhaab kiikeen.” idiin.
25Yasuuꞌa bareeyooh dehaay, “Naanhooy kaꞌafhamtaana? Inabiya iidneet toona kastooh kak diiseet aamanteena? 26Umasiih teen teena haay lhameetiit malya umatuunooh shuumiiniyeet toona kitti han?” idi. 27Malya Yasuuꞌa kasseeh iktabeeb bariiyooh kataabt toonaatiib bareeyooh dehaay fassariya. Muusaay badooyaayt, kassaah inabiya diyaab iiktiineet toona bareeyooh dehaay fassariya.
28Baraah iibiineet tugariya idwilnihoob, Yasuuꞌa sagika mhiin beeti iibaabi tak dehaay massalamiya. 29Laakiin baraah winneet barooh inꞌalna, “Hawaad yꞌaabu. Amsi geeboon naaya!” idiin. Aflaay Yasuuꞌa bareeyooh geeb iignifi jillaay oogaw shuumiya.
30Bareeyooh geeb mꞌariitii dehaay isꞌat harꞌii, Yasuuꞌa hadhiib yakisiya, aree yhamidaayt yhadhi ikitꞌa. Malya yhadhi bareeh yhii. 31Oontꞌa bareeh aagwꞌad ingalna, aree barooh ikanna. Laakiin baruuh gaalhoob hooy kwidhiya. 32Baraah taktak raatiyaana, “Oodoor baruuh usalaliib aaktab diyaab iiktiineet toona dehoon hadiidiyihoob, iginꞌaayaan baloolaab kiikeena han?” idiin.
33Baraah been oodoor yakiyaaniit Algudus beeti yꞌagarna. Iktimnihoob, ilinguumiya itamna gwirwa baliin bareeyooh geeb iifiinwa hiddaab ammariyaa imriin. 34Aree baraah, “Tuun sidiku! Wꞌankwana yakiya, aree Siimoonii dehaay lawiya.” idiin. 35Malya aan imalu usalaliib dehaay tikeet toona hadiidiyaan. Wꞌankwana yhadhi ikitꞌihoob, baraah kak barooh ikanneet toona hadiidiyaan.
Yasuuꞌa Ikwiriyaatayee Dehaay Lawiya
36Ikwiriyaatay toona tutikeenaatiib masi hadiidee, Yasuuꞌa uukna bareeyooh bitik ingadaayt, “Mꞌasig geebookna badaayi.” idi.
37Bareeh akra mhiibwa miraakwaaywa hooy daaya. Malaaliinaay rhiyaaneeb hiisiyaan. 38Yasuuꞌa bareeyooh dehaay, “Naanhooy teemhana? Naanhooy eetehakteena? 39Ani aab akatiyeeb yꞌayi shibibna aree iragadaayi shibibna. Uun aneeb uknaayu akati! Tatehaanaateheeb shibibna. Aneeb barii rhiteeneeb tꞌiiteena, umalaaliinaay miitatwa basharwa kiibari.” idi.
40Baruuh een ibhali idiit harꞌii, yꞌayeehwa, iragadaayeehwa bareeh rhisiya. 41Baraah winneet afirhiyaana aree ajjabamiyaanayt, masi aamanaab kiikeen. Malya Yasuuꞌa bareeh raatiya, “Tooy naat tamamtiniina han tibariina?” idi. 42Baraah aashooyt sha asalamaat barooh yhiin. 43Yasuuꞌa batooh bareeyooh suurii yakisiyaayt tamiya.
44Baruuh bareeyooh dehaay, “Masi gwadookna iifiyi door, bak sooyan hookna: kastuuh tuuna aniib kataabt Muusaay whaggiibwa, Inabiyaayi kitabeebwa, tehabayaateeb attiyoodiyaat tuunaawwa ibakii tikati.” idi.
45Malya baruuh eektabi afhistiib bareeh isham. 46Yasuuꞌa bareeyooh dehaay, “Tuun tuuna bak kataabtu: Umasiih lhami indi, aree tooyin tumhaya tuyatii yaki indi. 47Aree kasseeh idehayaayee dehaay, Algudusee badooyiit, oosmiisooh tuubaatwa idanuubi afootiiwwa bhaliimi iyadna. 48Baraakna teen teena kasteeh badehiib dehaay tikatiina. 49Baabu waadiyaayaab ikatiyeet toona dehookna diigwati andi. Laakiin baraakna tibreetee akrir tittiyeewiineeb hadiit tumadiinaatiib daayaana!” idi.
Yasuuꞌa Teebri Beeti Yakamiya
50Yasuuꞌa ikwiriyaatayeeh Beetaanyaab ittiyoodi mhiin beeti imilhihoob, baruuh yꞌayeeh asti yꞌabikaayt bareeh baarakiya. 51Baruuh bareeh baarakiyeet midda, bareesooh giigiyaayt teebri beeti yakamiya. 52Malya ikwiriyaatayaah bariiyooh dehaay asjidiyaaniit winneet afirhaa Algudusee dehaay yꞌagarna. 53Aree baraah kasseeh idamaneehna Ukwaasanaay ugawiib Ukwaasana hamdee hassiyaan.
Currently Selected:
Luugaay W'injiil 24: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
