Yuuhannaay 1
1
Yasuuꞌa Ukwaasanaay Ibhali Tuduniyaatii Dehaay Eeya
1Ibhali hankaab iiktiina, baliin ibhali aree Ukwaasanaay geeb iifiina, ibhali aree Ukwaasana iiktiin. 2Ibhali hankaab Ukwaasanaay geeb iifiin.
3Bariisooh naatka daamta. Daamtaanaaka beet barooh anu naat han kadaamta. 4Bariiyooh umidhhan eefi. Been umidhhan aree oodehayi nuur iikti. 5Uunuur uthibniib buubiini. Laakiin uuthibin oonuur afhamaab kiiki.
6Beentooy Yuuhannaab iidni tak Ukwaasana diigwataab iiktiyi eeya. 7Baruuh been unuuri kehii iibidehi jillaay eeya. Aflaay kassaah uudehay tudiigwat maasiwtiit aamaneen ikatiin. 8Baruuh uukna oonuur kiiki. Unuurii dehaay iibidehi jillaay oobhaat yꞌaabi. 9Usidki nuur been kasseeh tuduniyaatii dehaay yꞌiin oodehayi kehii talawiini.
10Baruuh tuduniyaatiib iifi. Aree tuduniya bariisooh daamtaneek han, tuduniya barooh kanaat kitti. 11Baruuh whaashooh ooknaay eeya. Laakiin udehayuuh uukna barooh ashshaab kiikeen. 12Laakiin gwadi barooh yꞌashishniit haay aamaniyaan. Aflaay bareeh Ukwaasanaay ar haay ikatiini hag yhii. 13Aan baraah takwaakw firaay wꞌaadami niyaamiit ikwasiyeeb tari takiit niyaatee ikatiin firaay kiikeen. Laakiin Ukwaasanaay faray ikatiin.
14Ibhali bashar ikeena, aree uun baruuh geeboon ikwiri. Hinin bariiyooh umatuun rhina, Gaalꞌooriib umatuun Ubaabaay eeyaab, nꞌimaatwa sidikwa ataabi.
15Yuuhanna bariiyooh bhaliiya. Baruuh winneet waawiyaayt, “Uun baruuh ani haay hadiidaab iiktiyeebu, ‘Baruuh anii harꞌii yꞌiini, laakiin aniika winkaabi. Een haay andiyeeb usabab aree baruuh ani faraay baakaay whankaay iifi.’ adi.” idi Yuuhanna. 16Bariiteeh tinꞌimaati guudtii hinin kassaan tibaraka taktaki harꞌii nimri. 17Ukwaasana whag Muusaay geebii yhii hoon. Laakiin tinꞌimaawwa oosdikwa Yasuuꞌaab Umasiihi geebii haay yhii hoon. 18Ukwaasana gaal han rhaab kiiki. Wꞌoor Gaalalaay Ukwaasana tꞌiiteeb masi aree Ubaabaay dar ikatiib, baruuh barooh isookin.
Yuuhannaab Umoosanaayt Diigwat
19Iyahuudi suurkina Alguduseeb iifiin fagiiriyaab gwadibwa, Laawiibwa Yuuhannaay dehaay diigwatiyaaniit raatiyaana, “Baruuk aabwa?” idiin. 20Baruuh ifdhadh nuun tawaay kiiki, “Ani Umasiih kaaki.” idi.
21Baraah barooh raatiyaana, “Aflaay aabwa? Baruuk Eelyaabwa?” idiin.
Baruuh “Ani kaaki” idi.
Baraah “Baruuk Unabiiwwa?” idiin.
Baruuh “Abadan” idi.
22Baraah aakhar, “Aabwa? Sooyaa hoon, baliib idiigwatiyaaneen bayiit sooyi niyad. Ugarooyook aabu tindiya?” idiin.
23Yuuhanna unabi Isyaasiib ibhaliyee dehaay idgi, “Ani gaal umingaayiib waliikiiniinaay hissu, ‘Wꞌankwanaay dehaay usalal takwaakw kwaasna!’ indiinaay whiss akati.” idi.
24Oontꞌa Ifariisi diigwatiyaani diigwatkina gali barooh raatiyaana, 25“Baruuk Umasiih bitkaayeek, Eelyaab bitkaayeek, Unabi bitkaayeek, aflaay naanhooy tinmiisa?” idiin.
26Yuuhanna igwibi, “Ani yamee anmiis. Laakiin bareeyookna bitik gaal baraakna bitkaanneeb yakiini. 27Baruuh anii harꞌii yꞌiiniib ikati, ani bariiteeh tigidhꞌaati mhakwara afandiigee dehaay han kaꞌadgiran.” idi.
28Tuun tuuna kastuuh Urduni bhari dar ooraaw tiifiit Beetaanyaay tiki. Yuuhanna been oomhiin oodehay iimis.
Ukwaasanaay Whu
29Tooyin tumalya Yuuhanna Yasuuꞌaab barooh beeti yꞌee rhiyaayt, “Shibibna, Ukwaasanaay Whu tooy eefi, uun whu tuduniyaati danuub giigsiini! 30Uun baruuh ani haay hadiidaneeb ikati, ‘Anii harꞌii tak yꞌiini, laakiin aniika winkaabu, een haay andiyeeb usabab aree baruuh ani faraay baakaay iifi.’ adi. 31Ani uknaayu barooh kanaab kaaki. Laakiin baruuh Israaꞌiiliib oodehayi bitik atookakinaab iiktiyi jillaay ani yamee misee yꞌan.” idi Yuuhanna.
32Malya Yuuhanna teen tibadeha sooya: “Aashuuk kwibheeriitiit hayꞌaatiit tibreetee nꞌati tikwee rhan aree bariiyooh kehii daayiin. 33Ani barooh iiktiyeet toona masi kanaab kaaki. Laakiin barooh yamee iimsi jillaay aneeb diigwatiyaab Ukwaasana sooyiheeb, ‘Aashuuk tikwi yꞌiit kehii daayee rhitiniyeeb ootak, been baruuh Eeshuuk Imugaddasaayee iimis indiib ikati.’ idiheeb. 34Ani beet toona rhan, aree uun baruuh Ukwaasanaay Wꞌoor ikatiyeet toona badehiib akati.” idi.
Yasuuꞌiib Ikwiriyaatay Yhankaaneeb
35Tooyin tooraaw Yuuhanna beentooy malu kwiriyaatayeeh geeb masi gadee, 36Yasuuꞌaab hasamee rhiyanihoob, baruuh “Ukwaasanaay whu uun ikati!” idi.
37Ikwiriyaatay imalu barooh bak diyee imaasiwnihoob, baraah Yasuuꞌaab iramna. 38Yasuuꞌa nakamiya, aree bareeh ramee rhiyanihoob raatiya, “Naan tehariwna?” idi.
Baraah “Rabbi, naad kwarriya?” idiin. Iyahuudi bhaliyeeb Rabbi “Seedna” miyaadi.
39Yasuuꞌa “Mꞌaanaat shibibna” idi.
Aflaay baraah iramniit baruuh ikwiireeb oomhiin ishbibna, aree been oombꞌi bariiyooh geeb yꞌayimna. Been uudoor asir iifi.
40Siimoon Bitrusi san Andaraawoos, baliib Yuuhannaay ibhali imaasiwniit Yasuuꞌaab iram imalooyeeb gaal iikti. 41Igidiyeesooh Andaraawoos Siimoon oosan imriit sooya, “Hinin Umasiih nimri.” idi. Tuun tukalma Umasiih miyaadi. 42Malya barooh Yasuuꞌaab haay ibi.
Yasuuꞌa Siimoon ishbibaayt, “Oosmook Siimoon Yuuhannaay oor iyadna, laakiin Siifaas ituusim tindiya.” idi. Bitruswa Siifaaswa mhallaah “Liilaaw” miyaadi.
43Tooyin tumalya Yasuuꞌa Jaliil ookiik giig niyaamiya. Baruuh Fiilibus imriit, bariiyooh dehaay, “Ramaheeb” idi.
44Fiilibus Beetsaydaay iikti, Andaraawooswa Bitruswa han tumadiina Beetsaydaay ikwiirna. 45Fiilibus Naatnaaꞌeel imriit sooya, “Muusa, whaggi kitaabiib hooy kitbaab iiktiyeeb, inabiya han hooy kitbaab iiktiineeb beeb nimri. Baruuh Yasuuꞌaab Unaasiraayi, Yuusifiib wꞌoor ikati.” idi.
46Naatnaaꞌeel raatiya, “Naasiraay daayiina eetni han?” idi.
Fiilibus “Mꞌaat shibiba!” idi.
47Yasuuꞌa Naatnaaꞌeel yꞌee rhiyanihoob, bariiyooh hadiidiya, “Sidki Israaꞌiilaayi naat han maagt baabariib tooy eefi.” idi.
48Naatnaaꞌeel raatiya, “Kak tikteenaheeb?” idi.
Yasuuꞌa “Fiilibus baawaliiki hook, utiini hindi whii sꞌee rhan hook.” idi.
49Naatnaaꞌeel “Seedna, baruuk Ukwaasanaay Oorwa! Baruuk Israaꞌiileeb Whadꞌa tikatiya.” idi.
50Yasuuꞌa “Ani utiini hindi whii rhan hook adi akay baruuk aamanta han? Beenaatiika wawinkaana rhi tindiya.” idi. 51Malya Yasuuꞌa, “Oosdik andi hookna, baraak taabri nigaltiit, Ukwaasanaay malak Wꞌaadami Oori kehii astiiwwa nꞌatiiwwa sakee rhi tiyadna.” idi.
Currently Selected:
Yuuhannaay 1: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
