Luugaay W'injiil 23
23
1Kassaah umajlisiib iifiin uudehay yakiyaaniit, Yasuuꞌaab whaakim Biilaatoos haay ibeen. 2Baraah Yasuuꞌaab atehimtiib badooyaaniit, “Oon barooh udehayoon amaag salal sꞌabkee nimri. Baruuh Iroomaani Gaysarii dehaay titilbaati kwisuuy imooriib. Aree baruuh, ‘Ani Umasiih, whadꞌa akati.’ indi.” idiin.
3Biilaatoos Yasuuꞌaab raatiya, “Baruuk Yahuudi hadꞌaabwa han?” idi.
Yasuuꞌa igwibi, “Een baruuk tindiya.” idi.
4Biilaatoos ifagiiriya isuurkinaawwa, oodehay ugwidaanaay dehaaywa, “Oon ootak maagnaayt hooy karhan.” idi.
5Laakiin baraah kassaah hiddaab, “Uun baruuh utꞌaliimiisooh kassooh Yahuudaay oodehay yayakisiya. Baruuh Jaliilee badooyaayt tooy ookiik iktim.” idiin.
6Biilaatoos een ibhali imaasiwihoob, raatiya, “Uun uutak Jaliilee ikati han?” idi. 7Baruuh Yasuuꞌa Heeroodis yhukwimeeb whaashii iiktiyeet toona ikanihoob, barooh Heeroodis beeti giigisiya. Heeroodis han been oodoor Alguduseeb iifi.
8Heeroodis Yasuuꞌaab rhiyihoob, shꞌiika barooh rhiyeet toona yhiriwayt winneet afirhiya. Yasuuꞌiib gwidaana maasiwaabu, aree barooh mꞌuujisaat dꞌiyee rhitiib yhariw. 9Heeroodis Yasuuꞌaab gwidaana raatiya. Laakiin Yasuuꞌa bariiyooh dehaay gwibiyaab kiiki. 10Ifagiiriya isuurkinaawwa, whaggi koojaawwa beentooy ingidna, aree barooh gwidaat maagnaaytii atehimiyaan. 11Malya Heeroodiswa ikajaraahwa Yasuuꞌaab haay kashiyaana, aree akraab amaag waraayaan. Barooh daawri halak istookwniit Biilaatoos beeti isꞌagirna. 12Biilaatooswa Heeroodiswa suur ashoob iiktiineek han, been oombꞌi araw ikeen.
Yasuuꞌa Yat Yhakam
13Biilaatoos ifagiiriya isuurkinaawwa, yhaakmaawwa oodehaywa waliikiyaayt, 14bareeyooh dehaay, “Oon ootak oodehay amaag salal isꞌabiik miyaadiib haay eetaanheeb. Ani barooh suurookna raatan, laakiin barooh haay asꞌabiikeet maagnaay hooy miraab kaaki. 15Heeroodis han maagnaayt han hooy miraab kiikayt, barooh hinin beeti isꞌagir. Uun baruuh yat astehaltiniina dꞌiyaab kiiki. 16Shaawti barooh jasaayiit iifdig andi.” idi. 17Biilaatoos Wꞌiidi doorka bareeh abuukiib gaal dehaay iifdig.
18Laakiin uudehay kassaah tageega hissii, “Oon ootak diraa! Baarabaas dehoon fidiga!” idiin. 19Uun Baaraabaas suur tumadiinaatiib iki finaay gaal diraabuuyt usijniib daamaabi.
20Biilaatoos masi bareeh infaraad. Yasuuꞌaab iifdigeet toona yhariw. 21Laakiin uudehay masi waliikiyaana, “Barooh sallabaa! Barooh sallabaa!” idiin.
22Biilaatoos bareeh mhay doora sakanaaya, “Uun uutak naa maagnaayt gwibbaabu? Baruuh haay itoodiireet maagnaay hooy miraab kaaki. Shaawti barooh jasaayiit malya iifdig andi.” idi.
23Laakiin baraah wawin hissaayee waliikiyaan. Baruuh sallabamiiniyeet toona yhariwna, aree baraah yhiriwneet tiki. 24Aflaay Biilaatoos baraah yhiriwneet toona sakiya. 25Baruuh been ootak rookaatiibwa madareebwa abaak usijniib iifiib, beeb baraah oofduug yhiriwneeb barooh dehaay ifdig. Aree Yasuuꞌaab baraah yhiriwneet toonaatiit bareeh nuuniya.
Yasuuꞌa Sallabamiya
26Ikajar Yasuuꞌaab fidnaab haay giigee, Siimoon iidni tak, Geerawaani haashii iiktiib yꞌabikna. Baruuh tudirꞌaatii itꞌigir. Ikajar oon ootak usaliibi hindi yaksiisiyaaniit, Yasuuꞌii harꞌii hiireerisiyaan. 27Gwida dehay barooh iramna. Gwidaat mꞌat han barooh waawiyaana, aree barooh nawwaatiyaan. 28Yasuuꞌa bateeyooh nakamiyaayt, “Alguduseet tꞌarit, anii dehaay biiwaawaana. Igarooyeekna dehaaywa yꞌareeyeekna dehaaywa waawaana. 29Damaan yꞌi indi, uudehay ‘Taamꞌa tigiduudiya iyaamuuhna nikwaab biikaayneet, aangwaahna kwadhishaab biikaayneet baliit libaabiyaan!’ iyadna. 30Been oodoor
baraah irbaayee dehaay, ‘Kehoon dhibaana!’ iyaad iyadna,
aree ikanbilee dehaay, ‘Kwibisna hoon!’ iyaad iyadna.
31Uudehay teen teena whindi sootaay ikatiyihoob idꞌaneek, aflaay whindi balamiiniyihoob naan iikti tindi?” idi.
32Malu da warib, mhallaah maagnaayt sakaaba. Baraah han itoodiirnee dehaay Yasuuꞌi geeb galeelamiyaan. 33Baraah “Kalhoob” ittiyuud mhiin iktimnihoob, Yasuuꞌaab toomaag sakanaayi geeb beentooy sallabiyaan. Bareeh gaal bariiyooh umaygwadii dehaay, ooraaw bariiyooh utarhagwadii dehaay sallabiyaan.
34Yasuuꞌa “Baab, bareeh afooya! Baraah naan sakeeneeb kiikanna.” idi. Aree ikajar gurꞌaat igidniit bariiyeeh yhalaka imꞌadhdhaadhna.
35Uudehay beentooy ingadniit barooh iishbibna. Yhaakma bariiyooh faaydee, “Oodehay eeraw ishidhhan. Ukwaasanaay Umasiih Uwaasama ikatiyeek, tꞌa ugarooyooh baꞌishidhhin!” idiin.
36Ikajar han eeyaaniit barooh haay kashiyaan. Barooh haab beeti yꞌabikna. 37Baraah “Baruuk Iyahuudi hadꞌa tikatiyeek, ugarooyook shidhhana!” idiin.
38Yasuuꞌi mhakwal laaftaat kataabtu: “Uun baruuh Iyahuudi hadꞌa ikati.” miyaad kataabi.
39Beentooy usaliibi kehii atishꞌigaab toomaag sakanaayee gaal barooh neewiya: “Baruuk Umasiih kittaa han? Ugarooyook shidhhana, hinin han shidhhana hoon!” idi.
40Laakiin been uuraaw oon ootak idnin, “Baruuk Ukwaasana kitrikwiya? Baruuk han oon utakiit jasaamaab kittaa han? 41Hinin maagnaay saknaayt jasaamnay, beet tumaagtuun astehaltiniyeeb ijasa nimeer. Laakiin uun uutak amaagna naat gwibbaab baakaay gwadoon jasaamiini.” idi.
42Malya baruuh Yasuuꞌii dehaay, “Yasuuꞌa, tehadꞌaayeetiyook hadꞌaab akiit eetniyihoob, shꞌaaheeb!” idi.
43Yasuuꞌa bariiyooh dehaay, “Oosdik andi hook, amsi geebu tujanna daayi tindiya.” idi.
Yasuuꞌiit Tooyat
44Oontꞌa nabhoob, gaalhoob kastuuh tuubuur thibinamta. Kassuuh uumbꞌi wꞌasir ookiik thibin iki. 45Tuuyin thibnamta. Ukwaasanaay ugawiit sitaara malu mhiin tikitꞌa. 46Yasuuꞌa win hissii waliikiya, “Baab! Ani ishuuki yꞌayeeyook daasan.” idi. Een idiit malya iya.
47Iroomaani daabit toona tutikeet rhiyi door, Ukwaasana yhamid aree, “Uun baruuh sidik daayi tak akay iifi.” idi. 48Uudehay kassaah beet toona tutikeet iishbibni jillaay beentooy immarraayna. Malya beet toona rhiyaani harꞌii, baraah winneet gadabaa yꞌagarna. 49Laakiin baliin barooh iktiin kassaah, Jaliilee barooh iramt taamꞌa han hooy haayee, sagi mhiin ingadniit teen teena ishbibna.
Yasuuꞌa Itoobaas
50Oontꞌa beentooy Yuusif iidni tak, umajlisii gaal iiktiib iifi. Baruuh daayi taku aree sidki taki. 51Been baruuh umajlisi mikirwa baraah sakiineet toonaawwa agbilaab kiiki. Baruuh Yahuudaayt tumadiina Raamaay yꞌaabu aree Ukwaasanaayt tehadꞌaayi yhigit. 52Yuusif Biilaatoos ibaayt, Yasuuꞌiit tukinaaja hooy yhariw. 53Malya baruuh tukinaaja usaliibii tikwisiyaayt, nꞌakw halakiib ishaamim. Oonaay suurii gaal han hooy atoobsaab biikaayi mhiin, liilaawiib faraak miimashiib tukinaaja daasiya. 54Been uumbꞌi jimꞌaatu, aree tuusab badootiib diwlaa tiifi.
55Yasuuꞌi geeb Jaliilee yꞌaat taamꞌa baliit Yuusif iramniit umiimash rhiyaana aree tukinaaja kak daasamtaneeb rhiyaan. 56Malya bataah igawaayeehna yꞌagarniit daayiit shakwiina isoomirna. Laakiin Muusaay whag waseeyaab iiktiyeet toonaatiit, bataah toosab fiiniyaan.
Currently Selected:
Luugaay W'injiil 23: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
